Ezra
Magau Koresh nompaloga tau-tau to Israel to nipobatua manjili mpaka ri kota ira
1
Ri mpae pamulana tempo poparenta i Koresh, magau to Persia, i PUE nombawai dota rara ka Magau Koresh ala mompakadupa tesa i PUE to nipasimbayu Nabi Yeremia nggaulu. Naria parenta Magau Koresh nipatolele ri njumaongu poparentana, nabelo ka ante tesa, nabelo ka ante sura. 2 “Iweꞌimo parenta i Koresh, magau to Persia: PUE Alatala to Neliu Nggakuasa ri suruga nombawai ka aku pura-pura poparenta ri dunia. Iꞌa nompakau aku mombabangu sapo mpepue ka Iꞌa ri Kota Yerusalem ri Bagia Yehuda. 3 Isema-sema ri tatongo komi to najadi todea-Na mamala manjili mpaka ri Kota Yerusalem ri Bagia Yehuda, pade mombabangu mpanjili Sapo Mpepue ka Alatala nto Israel, Alatala to netoꞌo ri Kota Yerusalem. Perapi Iꞌa mosanggani-nggani ante ira. 4 Pade butu mbaꞌa todea-Na to naria ri petoꞌo ira nipobatua to madota manjili kana ratulungi ntau to nosinggamosu ante ira. Tau-tau etu kana mombawai ka ira salaka, bulawa, mbara-mbara ntanina, pompatuwu, mosanggani ante pesomba-pesomba to rawai nggari dota rara ira mboto ka Sapo nu Alatala ri Kota Yerusalem.”5 Jadi topanggeniaka-topanggeniaka mbira ira santina to Yehuda bo to Benyamin, topanggeni-topanggeni agama, tau-tau to Lewi, bo butu mbaꞌa tau to nipakadota Alatala rarana nompakasadia-dia manjili mpaka ri Kota Yerusalem mombabangu mpanjili Sapo Mpepue ri setu. 6 Pade tau-tau to nosinggamosu ante ira nantulungi ante nombawai ka ira parewa-parewa salaka, bulawa, mbara-mbara ntanina, pompatuwu, pewai-pewai to nasuli olina, bo pesomba-pesomba to niwai ira nggari dota rara ira mboto.
7 Pade Magau Koresh nompakau tau mombasuwuraka parewa-parewa to naria riara Sapo Mpepue nggaulu to niala Magau Nebukadnezar nggari Yerusalem pade nibolina riara petoꞌo pesomba ka wiata-wiata to nisombana. 8 Koresh, magau to Persia etu, nompakau tau mombasuwuraka pura-pura parewa etu pade mombawai etu ka i Mitredat, topomboli doi magau. Pade iꞌa nombareke pura-pura etu ka i Sesbazar, topanggeniaka nto Yehuda.
9 Eꞌimo kadea parewa-parewa etu: tolumpulu ongu gumba bulawa, sanjobu ongu gumba salaka, rompulu bo sasio ladi, 10 tolumpulu ongu sanggiri bulawa, patatu sampulu ongu sanggiri salaka, bo sanjobu ongu parewa-parewa ntanina.
11 Parewa-parewa bulawa bo salaka etu pura-pura kadeana limanjobu patatu ongu.
Pura-pura etu nikeni i Sesbazar tempo tau-tau to Israel to nipobatua etu nanjili nggari Tana Babel mpaka ri Kota Yerusalem.