Tau-tau to Yahudi nangewa bali ira
9
Naratamo tempona tanggal sampulu toluongu wula sampulu rongu to niuli wula Adar, etumo eo to nipakatantu tau to Yahudi kana rapatesi. Eo etu eo to nipopea-pea bali nto Yahudi ala mombadagi ira, tapi kaopuna tau to Yahudimo to nombadagi bali ira. 2 Ri butu-butu propinsi riara poparenta Magau Ahasyweros, tau-tau to Yahudi nasiromu nasintuwu nangewa tau to madota mowia ja'a ri jaꞌi ira. Ri umba-umba tau naeka mpuꞌu nanggita ira, sampe daꞌa ria tau to nabia mangewa ira. 3 Pura-pura pangga bete, gubernur, bupati bo topokarajaa ri pura-pura propinsi nosabingga ka to Yahudi, apa naeka ka i Mordekhai. 4 Sabana nakuasamo i Mordekhai ri sapo magau, bo kareba etu natolele ri pura-pura propinsi. Pade nantambai kasaena nantambai kakuasana.5 Jadi tau to Yahudi nombadagi pura-pura bali ira. Nitimbe ira ante guma pade nipatesi mpakaropu. Nipowia iramo dota-dota ka tau to nomporau rara ira.
6 Ri petoꞌo pekalendu ri kota Susan, tau to Yahudi nompatesi tau limatu mbaꞌa kadeana. 7-10 Ri olo tau to nipatesi etu, naria sampulu mbaꞌa ana langgai i Haman ana i Hamedata, bali bete nto Yahudi. Ira etu nosanga ka i Parsandata, i Dalfon, Aspata, i Porata, Adalya, Aridata, i Parmasta, Arisai, Aridai bo i Waizata. Tapi tau to Yahudi daꞌa nangago mbara-mbara ira.
11 Ri eo etu woꞌu tau nompakilu ka magau kadea ntau to nipatesi ri petoꞌo pekalendu ri kota Susan. 12 Nangepe lele etu nangulimo magau ka rongona Ester, “Tau to Yahudi nompatesi tau ri petoꞌo pekalendu ri kota Susan limatu mbaꞌa kadeana, nosanggani ante sampulu mbaꞌa ana langgai Haman. Natantu neliu nggadeapa ri propinsi-propinsi ntanina. Nuapapa woꞌumo to muperapi? Ulimo, natantumo etu kana rapowia.”
13 Nesonomo Ester, “Ane rapodota komi, palogamo tau to Yahudi to netoꞌo ri kota Susan mowia naile ewa nuapa to nikawia ira eo eꞌi. Pade paloga woꞌu watabaku ana-ana i Haman raloe.”
14 Nasitujumo magau ante pomperapi Ester. Nisuwurakanamo sura parenta ri kota Susan, pade watabaku ana-ana i Haman niloemo ri tinja. 15 Pade ri tanggal sampulu ampa wula Adar, tau-tau to Yahudi ri kota Susan nasiromu mpanjili bo nompatesi toluatu mbaꞌa woꞌumo ri kota etu. Tapi tempo etu woꞌu ira daꞌa nangago mbara-mbara bali ira.
16 Tau-tau to Yahudi ntanina to netoꞌo ri propinsi-propinsi to niparenta magau woꞌu nasiromu nasintuwu nanjaliku koro ira. Ira nombadagi bali ira, pade nompatesi pitumpulu bo lima njobu mbaꞌa tau to nomporau rara ira. Tapi ira daꞌa nangago mbara-mbara bali ira etu. 17 Kajadia etu najadi tanggal sampulu toluongu wula Adar, pade eo karoeona, tanggal sampulu ampa, nangosarakamo ira. Pade eo etu nipajadi ira eo posusa bo kadamba-damba rara. 18 Tapi tau to Yahudi ri kota Susan nanggawia posusa tanggal sampulu alima sabana ira namala nompatesi bali ira tanggal sampulu toluongu bo sampulu ampa. Pade ira nangosaraka tanggal sampulu alima ala mamala madamba-damba manggawia posusa. 19 Etumo sabana tau to Yahudi ri kota-kota nggedina nompajadi tanggal sampulu ampa eo posusa bo kadamba-damba rara. Pade ira nosiwai ka hadia bo panggoni.
Nompakatantu eo bete Purim
20 Naopu etu i Mordekhai nantulisi pura-pura kajadia etu. Pade nipakatuna sura ka pura-pura to Yahudi riara poparenta Magau Ahasyweros, nabelo ka to namosuna, nabelo ka to nakawaona. 21 Isi sura etu parenta ala manggawia posusa ri tanggal sampulu ampa bo sampulu alima wula Adar butu-butu mpae. 22 Sabana ri eo-eo etumo ira nombadagi bali ira, sampe kasusa rara ira najadi kadamba rara. Etumo sabana ira nantora eo etu ewa eo posusa bete ante mosiwai ka panggoni bo mombawai hadia ka tau to nakasiasi. 23 Jadi tau to Yahudi nantuki parenta to nitulisi Mordekhai etu. Posusa to nipowia ira etu nipajadi ira kabiasa butu-butu mpae.
24 Haman ana i Hamedata muli Agag, bali bete tau to Yahudi, nowia lamoro to niuli woꞌu “purim,”a ala mompakatantu eo pompatesi tau to Yahudi. Niniana mamimo mompakaropu ira. 25 Tapi tempo magau nangepe nia jaꞌa i Haman mompatesi to Yahudi, nisuwurakana sura parenta nompakatantu ala nia jaꞌa etu mawela i Haman mboto, sampe iꞌa bo ana-anana niloe pura. 26 Etumo sabana eo bete etu niuli Purim, nggari tesa “pur.” Jadi tau to Yahudi nantora pura nuapa to nitulisi Mordekhai ri sura etu, pade nantora nuapa to nirasai ira bo nikita ira. 27 Etu sabana ira nompowia saongu atura ka koro ira mboto, bo ka muli ira ante tau ntanina to nesua todea to Yahudi. Nantuki atura etu butu-butu mpae ira kana mantora bo manggawia posusa ri roeo to nipakatantu i Mordekhai etu. 28 Pade nipakatantu woꞌu eo Purim etu kana rakawia ri butu-butu sapo nto Yahudi bo ri butu-butu ngata sampe ri kota-kota. Sampe ri muli-muli ira daꞌa mamala manggalinga nuapa to najadina etu.
29 Ntaninapa nggari setu, Magau besi Ester ana Abihail, nantulisi sura nosanggani-nggani ante i Mordekhai to Yahudi etu. Sura karongganina etu nompakaroso isi sura i Mordekhai nompakatantu eo bete Purim etu. 30 Sura-sura etu nipakatu ka pura-pura tau to Yahudi ri satu rompulu bo papitu propinsi riara poparenta Magau Ahasyweros. Riara sura etu ira nerapi doa ala katuwu tau to Yahudi batena masana bo maama. 31 Ira woꞌu nanguli ka tau to Yahudi, ala ira bo muli-muli ira mantora eo Purim ri eo to nipakatantu, nasimbayu ewa ira mboto nompakatantu eo mapuasa bo motumangi. Wetu woꞌu, weꞌi-weꞌi pura-pura tau to Yahudi kana manggawia posusa Purim.b 32 Iwetumo parenta Ester nompakatantu atura-atura eo bete Purim. Pade atura-atura etu nitulisi riara saongu buku.