Magau Ahasyweros nompaloga tau-tau to Yahudi mangewa bali ira
8
Ri eo etu woꞌu Magau Ahasyweros nombawai ka Ester pura-pura kakalumana i Haman, bali ntau to Yahudi. Tempo etu nangulimo Ester ka magau, i Mordekhai etu sampesuwu sangganina. Etu sampe i Mordekhai nipaloga mantingayo magau nau daꞌa nipokio. 2 Pade magau nangosu sinji nggari koya mpalena to niala bali nggari jaꞌi Haman, pade niwaina ka i Mordekhai. Pade Ester nangonggotaka i Mordekhai nombaurusi kakalumana i Haman.3 Naopu etu nalaumo Ester mantingayo magau. Notimbakotumo i'a ri ngayona ante notumangi nerapi ante mpu'u-mpu'u, ala ne'e rapakadupa nia ja'a to nipowia i Haman to Agag etu ka tau to Yahudi. 4 Nanggita Ester, magau nombaulunjaka lembau bulawana ka iꞌa.
Jadi nekanggoremo Ester pade nanguli, 5 “Ane rapokono bo rakasituju komi, pade ane aku nikonoa raramu, tulungi powia sura parenta ala tesa riara sura to nipowia i Haman ana Hamedata muli Agag etu neꞌe rapakadupa. Sabana isi sura etu naria parenta mompatesi tau to Yahudi to naria riara poparenta eꞌi. 6 Da'a kupakule manggita todeaku bo sampesuwu-sampesuwuku rapakaropu!”
7 Nangepe etu, nangulimo Magau Ahasyweros ka Ester bo i Mordekhai, “Kakalumana i Haman niwaikumo ka Ester, pade i Haman niloekumo ri sampeka tinja, sabana iꞌa madota mompatesi tau to Yahudi. 8 Tapi sura to nitulisimo ante sanga magau pade nicap ante sinjina daꞌa namala rabali isina. Jadi weꞌi-weꞌi tulisimo sura parenta ntanina ka tau to Yahudi nantuki pombarata komi mboto ante nompake sangaku. Pade sura etu kana racap ante sinjiku.”
9 Jadi ri eo etu woꞌu, etumo tanggal rompulu toluongu, wula toluongu to niuli wula Siwan, i Mordekhai nomparenta tau nantulisi sura ka pura-pura pangga bete ri satu rompulu bo papitu propinsi, nompamula nggari India sampe ri Etiopia. Sura-sura etu nitulisi riara basa bo potulisi ri pura-pura propinsi. Pade nipakatu woꞌu ka tau to Yahudi riara basa bo potulisi to Yahudi. 10 Sura-sura etu nitulisi bo niteke i Mordekhai nompake sanga Magau Ahasyweros, pade nicap ante sinji magau. Naopu etu nipakaunamo tau manggeni sura-sura etu mpaka ri propinsi-propinsi ri bagia poparenta magau etu, ante nesawi jara magau to nagasina mpuꞌu.
11 Isi sura etu nanguli magau nombawai loga ka tau-tau to Yahudi ri butu-butu propinsi masintuwu mangewa bali ira. Ane ira rasuaki bali nggari umba-umba propinsi, ira kana mamala mangewa bali-bali ira, bo mompatesi mpakaopu rongo bo ana-ana ira, pade mangago mpakaopu mbara-mbara bali ira etu. 12 Parenta etu kana rapajala ri pura-pura propinsi ri poparenta Magau Ahasyweros ri tanggal sampulu toloungu wula sampulu rongu to niuli wula Adar.a 13 Isi sura parenta etu kana rapajadi atura bo rapatolele ka pura-pura tau ri pura-pura propinsi, ala tau to Yahudi mainga bo masadia mangewa balina ane eo etu marata.
14 Nangepe parenta magau, nompari-mparimo tau nanggaliwo nanggeni sura ante nesawi jara magau. Pade sura etu woꞌu nibasa ka todea ri petoꞌo pekalendu ri kota Susan.
15 Naopu etu nesuwumo i Mordekhai nggari sapo magau nompake baju kamagau to nagawu bo nabula, baju ndoe to nakamumu nggari kae to nalusu, bo songgo bulawa to neliu nggagaya. Tempo nangepe parenta to nikawia i Mordekhai, nadamba mpuꞌumo tau ri kota Susan. 16 Tau to Yahudi nombarasai nawoe bo nadamba rara, nasana bo nibila ntau. 17 Pade ri umba-umba propinsi bo kota nipombabasa sura parenta etu, nadamba mpu'umo tau to Yahudi, sampe ira nowia posusa mpasanggani-nggani. Pade daꞌa aga etu, nadea woꞌu tau ntanina madota majadi todea to Yahudi, sabana ira naeka ka tau to Yahudi.