Magau nomparenta ala Haman rapatesi
7
Nalaumo magau bo i Haman karongganina manggoni bo manginu mpasanggani-nggani ante Ester. 2 Tempo ira dananginu anggur, nekutana woꞌumo magau ka Ester, “Nuapa to mupodota? Ulimo! Natantumo kuwai ka iko nuapa to muperapi nau santongo nggari poparentaku.”3 Nesonomo Ester, “Ane aku nikonoa raramu pade ane rapoiyo komi pomperapiku, aku merapi ane mamala aku bo pura-pura todeaku to Yahudi neꞌe rapatesi komi. 4 Sabana aku bo pura-pura to Yahudi nipobalumo ala rapatesi. Ane rapana kami aga nipobalu ala majadi batua, aku nekalino mboto, daꞌa nompakasusa komi.”
5 Pade nekutanamo Magau Ahasyweros, “Sema nabia nowia etu? Ri umbamo iꞌa?”
6 Nesonomo Ester, “Bali to nadota mompandasa kami etumo i Haman, tau to najaꞌa eꞌi!”
Nangepe tesa etu naeka mpu'umo i Haman ri ngayo magau njambokona. 7 Narau mpuꞌumo magau, pade nekanggoremo iꞌa nggari mejana nesuwu mpaka ri lalowo sapo magau. Ninjani Haman natantumo magau kana mombasuku iꞌa. Etu sabana iꞌa batena naroo ri jaꞌi Ester, ante patujuna merapi ampu ala neꞌe rapatesi.
8 Notinggadungganakamo i Haman ri pekatoko Ester ala merapi ampu ri jaꞌina. Ewa nisuka tempo etu woꞌu, natinggulimo magau nggari lalowo sapo magau. Nanggita i Haman iwetu nongaremo magau, “Nokuya, danabiapa woꞌu iko mombabaga ronguku ri ngayoku bo ri sapoku ri seꞌi?”
Sangga nangepe tesa magau etu, naratamo tau to nipakatantu mantulungi magau nalau nombabungu lenje i Haman, tandaina iꞌa kana rasuku mamate. 9 Pade nangulimo samba'a topantulungi magau ri setu to nosanga ka i Harbona, “Magau, namosu sapo i Haman naria tinja rompulu bo rongu metere kalangana to nipowiana rapombaloe Mordekhai, tau to nompakasalama komi bopia.”