Mordekhai nibila magau
6
Tempo nggawengina etu Magau Ahasyweros daꞌa napisi naturu. Jadi niperapina ala buku tuntu kamagauna rabasa ka iꞌa. 2 Riara buku etu naria nitulisi, Mordekhai nopakilu ewa nia ira i Bigtan bo i Teres bopia mompatesi magau. Ira rombaꞌa etu tau to niparasaya nojaga pewobo magau. 3 Nangepe tesa etu nekutanamo magau, “Pebila nuapamo to niwai ka Mordekhai etu?”Nesonomo tau topokarajaa ri sapo magau, “Daꞌapa ria nuapa-nuapa to niwai ka iꞌa.”
4 Pade nekutana woꞌumo magau, “Isemapa topokarajaa ri jaꞌiku danaria riara sapo magau?” Tempo etu i Haman dako nesua ri lalowo sapo magau. Iꞌa madota merapi ka magau ala mombaloe i Mordekhai ri tinja to nipakasadiana etu.
5 Nesonomo topokarajaa ka magau, “Haman naria ri lalowo sapo magau madota mantingayo komi.”
Nangulimo magau, “Pakaumo iꞌa mesua.”
6 Sangga nesuapa i Haman, nangulimo magau ka iꞌa, “Naria tau to kuwai ka pebila to nabetena. Nuapa to masipato kuwai ka iꞌa?”
Nipekiri Haman riara ntaꞌina, “Daꞌa naria tau ntanina rawai ka pebila etu, aga aku.” 7 Etumo sabana i Haman nombasono magau iweꞌi: “Ane komi madota mombabila sambaꞌa tau, 8 ala ka iꞌamo baju kamagau to nabiasa nipake komi mboto. Pade ala woꞌu saongu jara to nabiasa nipesawi komi to nipataka tanda kamagau ri balenggana. 9 Waimo baju bo jara etu ka sambaꞌa pangga bete magau. Pade baju etu kana rapopasua ka tau to rawai ka pebila etu, pade iꞌa etu kana rakeni mantalili lapanga riara kota eꞌi. Pangga bete etu kana mongare-ngare ri koluna, ‘Iweꞌimo to nipowia magau ka tau to nibilana!’”
10 Nangulimo magau ka i Haman, “Kalaumo masalisa mangala baju bo jara etu, pade waimo pura-pura pebila etu ka i Mordekhai, tau to Yahudi etu. Iꞌa nabiasa nekatoko ri bobaa sapo magau. Powiamo ewa nuapa pura to niulimu paneꞌa, neꞌe sampe maria to mukalinga.”
11 Jadi nalaumo i Haman nangala baju nipopasuana ka i Mordekhai. Pade nikenina Mordekhai nesawi jara nantalili lapangan ri kota etu ante nongare-ngare, “Kitamo! Iweꞌimo to nipowia magau ka tau to nibilana!”
12 Naopu etu nanjilimo i Mordekhai mpaka ri bobaa sapo magau. Tapi Haman nompari-mpari nanjili ante nombasalibumbu lenjena sabana naeya mpuꞌu matana. 13 Nitesana pura-pura to najadi etu ka wega-wegana bo rongona i Zeres. Nangepe etu nangulimo wegana bo rongona, “Etu tandaina nompamulamo iko nidagi Mordekhai tau to Yahudi. Iko da'a ntoto mamala mangewa i'a. Natantumo iko kana radagina.”
14 Tempona ira danotesa-tesa, naratamo tau to nipakau magau mantomunaka i Haman. Pade i'a nikeni ira nasalisa-lisa mpaka ri posusa to nikawia Ester.