Ester nantingayo Magau Ahasyweros
5
Tempo eo katolueona Ester napuasa, iꞌa nompake baju kamagauna. Pade nalaumo iꞌa ri lalowo ri ngayo pewobo riara sapo magau ri petoꞌo polibu magau. Tempo etu magau nekatoko nantingayo pewobo etu. 2 Tempo iꞌa nanggita Magau besi Ester ri sawalikuna, naasimo matana, sampe iꞌa nombaulunjaka lembau bulawana ka Ester. Nanggita etu, nalaumo Ester nanjoko wuntu lembauna etu. 3 Pade nekutanamo magau ka Ester, “Rongoku Ester, nuapa to mupodota? Nuapa pomperapimu? Ulimo, nau santongo nggari poparentaku eꞌi muperapi kana kuwai ka iko.”4 Nesonomo Ester, “Ane rapodota komi, magau, karatamo ante i Haman ngina mantuki posusa to nipakasadiaku ka komi.”
5 Jadi magau nompakau tau malau mompokio i Haman masalisa marata mantuki posusa to nipowia Ester.
Pade nalaumo magau nosanggani-nggani ante i Haman nanggoni ri posusa to nipowia Ester. 6 Datempo ira nanginu anggur, nekutanamo magau ka iꞌa, “Nuapa to mupodota? Nuapa-nuapa muperapi, naupa santongo nggari poparentaku eꞌi, natantumo kana kuwai ka iko.”
7 Nesonomo Ester, “Eꞌimo to nipodotaku: 8 Ane aku nikonoa raramu pade ane rapoiyo komi pomperapiku, karata bali naile ante i Haman ri posusa to kukawia. Damo ri posusa etu pade kuuli ka komi nuapa kuperapi.”
Haman nonia mompatesi Mordekhai
9 Nadamba mpuꞌu rara i Haman tempo natingguli nggari posusa to nipowia Ester. Tapi sangga naratapa ri bobaa sapo magau, pade nikitana Mordekhai daꞌa nadota nenggore bara nombabila iꞌa, narau mpuꞌumo rarana. 10 Tapi nitaꞌamakana rauna pade nanjili ri sapona. Sangga naratapa ri sapona, nipokiona wega-wegana bo rongona i Zeres nekatoko mpasanggani-nggani ante iꞌa. 11 Tempo etu i Haman nompakalanga rarana ante nanguli, “Nasugi mpuꞌumo aku, bo nadea anaku langgai. Pade aku niwai magau ka pekatoko to nalangana bo pangga neliu nggalangapa nggari pura-pura tau ntanina.” 12 Pade niulina wo'u, “Da'a aga iwetu, tapi aga akumo to nigaga nantuki magau nanggoni ri posusa to nipowia Magau besi Ester. Pade naile nggawengi sangganipa kami nigaga malau ri posusana. 13 Tapi pura-pura etu daꞌa ria gunana ka aku ane damaria kukita i Mordekhai to Yahudi etu mekatoko ri bobaa sapo magau.”
14 Nangepe etu nangulimo rongona i Zeres bo pura-pura wegana ka i Haman, “Ane wetu pakaumo tau mombabangu tinja rapombaloe rompulu bo rongu metere kalangana. Pade naile mpadondo njiina kalaumo perapi ka magau ala i Mordekhai raloe ri tinja etu. Maopu etu iko mamala malau ri posusa etu ante rara masana.” Nipekiri Haman nabelo mpuꞌu pombarata etu. Jadi nasalisamo iꞌa nompakau tau mompowia tinja rapombaloe.