Mordekhai nerapi tulungi ka Ester
4
Tempo Mordekhai nangginjani pura-pura nuapa to najadina, iꞌa nombaseka pakeana pade nompake pakea nggari karu bo nombadika sowu ri balenggana ewa tandaina nasusa mpuꞌu rarana. Pade nolumakomo iꞌa ri kota, notumangi ante suara namangga bo mpuꞌu-mpuꞌu nasusa rarana. 2 Tempo iꞌa narata ri ngayo bobaa sapo magau, nenontomo iꞌa, sabana tau to nompake pakea nggari karu daꞌa namala mesua ri sapo magau. 3 Pade ri pura-pura propinsi tau-tau to Yahudi nantete, sabana nangepe parenta magau. Ira napuasa, notumangi bo nantete. Pade nadea nggari olo ira nompake pakea nggari karu bo naturu ri sowu.4 Tempo randoo-randoo bo langgai-langgai to nipakatantu mantande Magau besi Ester nantesa ka iꞌa nuapa to nipowia i Mordekhai, nasusa mpuꞌu rara Ester. Pade Ester nompakatu baju ka i Mordekhai ala manjambei baju karu to nipakena, tapi daꞌa nitarimana. 5 Naopu etu nipokio Ester woꞌumo i Hatah to nipakatantu nantande iꞌa, pade nipakauna malau mompekutana i Mordekhai nuapa to najadi bo nokuya iꞌa sampe nowia iwetu.
6 Jadi nalaumo i Hatah nosirata ka i Mordekhai ri lapanga kota ri ngayo bobaa sapo magau. 7 Pade i Mordekhai notesa ka iꞌa nuapa to najadina. Bo nitesana woꞌu kadea salaka to rawai Haman majadi kas magau ane pura-pura tau to Yahudi rapatesi. 8 Niwaina wo'u isi sura parenta magau to nipatolele ri kota Susan to nompakatantu tau to Yahudi kana rapatesi pura. Nipakauna i Hatah manggeni sura etu ka Ester, pade mantesa mpakanoto isina ka i'a. Niulina ka i Hatah i'a kana mantewai ka Ester ala malau mantingayo magau merapi ala tau to Yahudi rapoasi matana.
9 Nangepe tesa i Mordekhai etu, nalaumo i Hatah nompakasampe tewai Mordekhai etu ka Ester. 10 Tapi Ester nompakau iꞌa manjili mpaka ri jaꞌi Mordekhai ante tewai iweꞌi: 11 “Ri kota eꞌi naria atura mantingayo magau to ranjani pura-pura tau, nompamula nggari tau to nipakatantu mantande magau sampe tau to netoꞌo ri propinsi-propinsi. Nantuki atura etu, butu mbaꞌa tau mantingayo magau ri lalowo sapo magau, nabelo ka langgai, nabelo ka besi, ane daꞌapa rapokio magau, iꞌa kana rasuku mamate. Aga sangele jala makabasaka nggari atura etu, ane magau mangulunjaka lembau bulawana ka tau etu. Tapi nariamo tolumpulu mbengina eꞌi aku daꞌa nipokio mantingayo magau.”
12 Nalaumo i Hatah nompakasampe tewai Ester etu ka i Mordekhai. 13 Pade Mordekhai nompakau i Hatah nompapola pesonona ka Ester iwe'i: “Neꞌe musarumaka ane tau to Yahudi rapatesi iko masalama sabana iko netoꞌo ri sapo magau. 14 Ane iko daꞌa madota merapi tulungi ka magau ala mompakasalama kita tau to Yahudi, natantumo kana maria tau ntanina mompakasalama ira. Tapi ane iko batena malino ewa eꞌi, iko mboto kana mamate pade sampesuwu nu umamu maopu mamate. Isema mangginjani, bara iko nipelisi majadi rongo magau ala mantulungi todeamu ri tempo to nasusa ewa eꞌi.”
15 Nangepe etu nipakatu Ester woꞌumo pesonona ka i Mordekhai iweꞌi: 16 “Pasiromumo pura-pura tau to Yahudi ri kota Susan ala mosambaya bo mapuasa ka aku. Uli ka ira, ‘Neꞌe manggoni bara manginu tolumbengi bo tolueo kasaena.’ Aku mboto bo randoo-randoo topantande aku kana mapuasa woꞌu. Maopu etu pade aku malau mantingayo magau, naupa etu nombaliunaka atura. Ane aga etumo tanu kupomate, pakambamo aku mamate.”
17 Naopu etu nalaumo i Mordekhai nanggawia pura-pura nuapa to nitewai Ester ka iꞌa.