Haman nompowia nia najaꞌa ala mompatesi tau to Yahudi
3
Bara sakuya kasaena naliu etu, Magau Ahasyweros nangonggotaka sambaꞌa to nosanga ka i Haman najadi tau to nalanga panggana. Haman etu ana i Hamedata, muli nggari Magau Agag.a Haman etu nionggotaka pade nipajadi tau to neliu nggalanga panggana nggari pura-pura pangga bete ntanina. 2 Magau nomparenta pura-pura pangga betena to nokarajaa ri sapo magau ala mombabila bo mekou ri jaꞌi Haman. Tapi aga i Mordekhai daꞌa nadota nekou ri jaꞌina. 3 Nanggita etu nekutanamo pura-pura topokarajaa ri sapo magau ka i Mordekhai, “Nokuya iko nombasapuaka parenta magau?” 4 Eo-eo ira nompasuꞌu iꞌa ala mantuki parenta magau, tapi iꞌa daꞌa nadota. Nangulimo i Mordekhai iwei: “Aku to Yahudi. Daꞌa mamala aku mekou ri jaꞌi manusia.” Nangepe etu, nitesa iramo tesa i Mordekhai etu ka i Haman ala mangginjani nuapa to rapowia i Haman ka i Mordekhai.5 Tempo i Haman nanggita i Mordekhai daꞌa nadota notimbakotu ri ngayona mombabila iꞌa, narau mpuꞌumo rarana. 6 Tempo ninjanina Mordekhai sambaꞌa tau to Yahudi, nipakatantunamo iꞌa kana mompatesi Mordekhai. Pade daꞌa aga iꞌa, tapi pura-pura to Yahudi to netoꞌo riara poparenta Magau Ahasyweros woꞌu kana rapatesina.
7 Sangga naganapa sampulu rompae Magau Ahasyweros noparenta, ri wula saongu to niuli wula Nisan, i Haman nompakau tau nowia lamoro ala mangginjani wula nuapa iꞌa manggawia nia jaꞌana etu. Riara basa Persia nowia lamoro niuli “purim.” Jadi nipakatantumo wula sampulu rongu to niuli wula Adar.
8 Naopu etu nalaumo i Haman nanguli ka magau iweꞌi: “Magau, naria sangele todea to nosimpotatare nakampatani netoꞌo riara poparentamu eꞌi. Ira nosisala mpuꞌu ante todea ntanina. Ada ira nosisala ante ada tau ntanina, ira daꞌa natundu ri atura-atura magau ri seꞌi. Jadi daꞌa masipato komi mompaloga ira metoꞌo ri pura-pura propinsi to niparenta komi eꞌi. 9 Ane magau masituju, aginamo rapowia saongu parenta ala ira pura-pura rapatesi. Ane rapoiyo komi pombarataku eꞌi, aku mombawai toluatu patampulu njobu kilo salaka riara kas magau.”
10 Nangepe etu niosu magaumo sinji nggari koya mpalena to nipake mompakaꞌasa sura parentana, pade niwaina ka i Haman ana Hamedata muli Agag bali nto Yahudi etu. 11 Nangulimo magau, “Damo aga iko, salaka bo tau-tau etu kuwai ka iko. Kawiamo mantuki dotamu.”
12 Jadi tanggal sampulu toloungu wula saongu, i Haman nompokio tau-tau to nabiasa nantulisi sura ri sapo magau. Ira nipakau nantulisi sura nantuki to nipakatantu i Haman. Sura etu nitulisi ka pura-pura gubernur bo pangga bete bo pura-pura to nakuasa ri pura-pura propinsi. Sura etu nitulisi riara basa bo potulisi to nipake ri propinsi etu nompake sanga magau pade nicap ante sinji magau. 13 Naopu etu sura-sura nikeni nasalisa-lisa mpaka ri pura-pura propinsi. Isi sura etu iweꞌi:
“Tanggal sampulu tolongu wula sampulu rongu, etumo wula Adar, pura-pura tau to Yahudi, nabelo ka totuꞌa, nabelo ka ngana, nabelo ka besi, nabelo ka ngana muda kana rapatesi pura ante daꞌa ria ampuna. Pade ri eo etu woꞌu pura-pura mbara-mbara ira kana raago mpakaopu.” 14 Parenta etu kana rapajadi atura bo rapatolele ri pura-pura propinsi ala pura-pura tau masadia-dia ri eo to nipakatantu etu.
15 Jadi nalaumo tau to nipakau nasalisa-lisa manggeni sura mpaka ri pura-pura propinsi nantuki parenta magau. Parenta etu nipatolele woꞌu ri petoꞌo pekalendu ri kota Susan. Naopu etu nekatokomo Magau Ahasyweros bo i Haman mpasanggani nanginu anggur, tapi nagado puramo tau ri kota Susan sabana nangepe parenta nggari magau etu.