Ester nionggotaka majadi rongo magau
2
Naopu bara sakuya kasaena, tempo magau mana nanggarau, iꞌa batena nompekiri powia rongona i Wasti pade nompekiri nuapa to nipawela ka iꞌa. 2 Etu sabana tau to nipakatantu mombatande magau nombawai pombarata ka iꞌa ante nanguli, “Nabelopa kami mangelo ka magau randoo-randoo to nagayana. 3 Aginapa magau mangonggotaka pangga-pangga bete ri pura-pura propinsi ala mamala mompasiromu randoo-randoo to nagayana, pade manggeni ira pura-pura ri peto'o besi-besi ri sapo magau, ri petoꞌo pekalendu ri kota Susan eꞌi. Aginamo ira raparasaya ka i Hegai to nombaurusi pura-pura randoo ri setu. Iꞌa kana mompakasadia pura-pura to niparaluu ira ala ira mantambai magaya. 4 Maopu etu pelisi komimo besi to nipokono komi pade porongomo iꞌa, ala manjambei Magau besi Wasti.” Nangepe tesa etu nasitujumo magau, pade nikawianamo.5 Ri petoꞌo pekalendu ri kota Susan naria sambaꞌa to Yahudi nosanga ka Mordekhai ana i Yair. Iꞌa muli Simei bo Kis nggari suku Benyamin. 6 Tempo ngata Yerusalem nidagi Nebukadnezar magau to Babel, Mordekhai nikeni nipatani mpaka ri tana Babel nosanggani-nggani ante Yoyakin,a magau to Yehuda, bo nadea woꞌu tau ntanina. 7 Naria wo'u sampesuwu sangganina, samba'a besi to nabelo potonga korona bo nagaya mpu'u lenjena to nosanga ka Ester. Sangana riara basa Ibrani etumo Hadasa. Namatemo indo umana, jadi iꞌa netoꞌo ri jaꞌi Mordekhai pade nipajadi ewa anana mboto.
8 Naopu parenta magau etu nipatolele, nadea mpuꞌu besi-besi nipasiromu ri petoꞌo pekalendu ri kota Susan, bo ri olo ira naria woꞌu Ester. Iꞌa woꞌu nikeni riara sapo magau ala mamala raparasaya ka i Hegai, sabana iꞌamo to nipakatantu mombajagai besi-besi ri setu. 9 Nadamba mpuꞌu rara i Hegai nanggita Ester sampe nipokonona. Kaliu-liu randoo etu nipakasadiana ka nuapa-nuapa niparaluuna ala mantambai kagayana, pade nipakasadiana ka iꞌa woꞌu panggoni to nabelona. Naopu etu Ester nikeni nolinja ri petoꞌo to neliu nggagayana ri sapo magau besi etu, pade naria pitu mbaꞌa besi to nipelisi bo nipakatantu majadi topantulungi iꞌa. 10 Da'a nipopanjani Ester i'a tau to Yahudi, sabana nitagi Mordekhai. 11 Eo-eo Mordekhai nolumako-mako ri ngayo lalowo sapo petoꞌo besi-besi etu, ala mangginjani nuapa to najadi ri jaꞌi Ester.
12 Nantuki atura, pura-pura besi kana rapasiayu mpakagaya sampe magana sampae. Onombula kasaena mompake minya to nigalo nu dupa, pade onombulapa woꞌu mompake minya ntanina to nawongina. Naopu etu butu mbaꞌa besi randoo etu kana mantingayo Magau Ahasyweros. 13 Tempo besi etu mantingayo magau, iꞌa namala mompake nuapa-nuapa to nipodotana. 14 Pade iꞌa nikeni mpaka ri jaꞌi magau tempo nggawengina. Pade to nailena iꞌa nikeni woꞌumo mpaka ri sapo to nipetoꞌo samarue-samarue magau. Tau to nombaurusi samarue magau sangana i Saasgas. Pade besi etu mana mamala mantingayo magau ane daꞌa rapokonona, pade sangana woꞌu mana rapokio.
15 Naratamo lelena Ester mosintomu ka magau. (Iꞌa ana Abihail, sampesuwu sanggani Mordekhai to nompajadi iꞌa anana mboto.) Tempo nalau mantingayo magau, Ester nopakea nantuki tesa i Hegai, balengga topojaga sapo besi-besi. Sangga nanggita Ester nogumaa puramo tau. 16 Ester nikeni nosintomu ka Magau Ahasyweros ri mpae kapapituna iꞌa noparenta, ri wula sampulu to niuli wula Tebet.
17 Ester nipodamba rara bo nipokono magau neliu nggari pura-pura randoo ntanina. Pade i'a nipotowe magau mpu'u. Jadi nipoposonggo magau ka i'amo songgo kamagau ewa tandaina i'amo majadi rongo magau manjambei rongona i Wasti.
18 Naopu etu nipowia magau posusa mombabila Ester. Nigagana pura-pura pangga betena bo pura-pura topokarajaa ri sapo magau mantuki posusa etu. Bo nipakatantuna eo mpenonto ka pura-pura todeana ri pura-pura propinsi riara poparentana, pade nibagina hadia to neliu nggadeana.b
Mordekhai nompakasalama magau
19 Tempo randoo-randoo nipasiromu karongganina, Mordekhai najadi pangga bete ri sapo magau. 20 Ri tempo etu daꞌapa nipopanjani Ester iꞌa tau to Yahudi, nantuki tewai i Mordekhai ka iꞌa. Iꞌa batena nantuki pepatuduki Mordekhai ewa tempo iꞌa dananggedi pade iꞌa nipatuwu sampesuwu sangganina etu.
21 Naria saeo i Mordekhai nokarajaa riara sapo magau. Tempo etu naria rombaꞌa pangga bete nosanga ka i Bigtan bo i Teres to nipakatantu nombajagai pewobo sapo magau. Najuꞌa rara ira rombaꞌa etu ri jaꞌi Magau Ahasyweros sampe ira nopatuju mompatesi iꞌa. 22 Nia ira etu ninjani Mordekhaimo, pade nasalisa nitesana ka Ester. Pade Ester nompasimbayu tesa i Mordekhai etu ka magau. 23 Tempo parakara etu niparesa, nanotomo mpuꞌu-mpuꞌu tesa etu nakono. Jadi niloemo ira rombaꞌa etu. Pade nantuki parenta magau kajadia etu nitulisi woꞌu riara buku tuntu magau.