ESTER
Magau besi Wasti nangewa parenta nu rongona Magau Ahasyweros
1
1-2 Tempo nggaulu naria magau Persia to nosanga ka Ahasyweros. Iꞌa noparenta satu rompulu bo papitu propinsi nompamula nggari India sampe ri Etiopia. Iꞌa netoꞌo ri petoꞌo pekalendu ri kota Susan.3 Sangga naganapa tolumpae Ahasyweros noparenta, iꞌa nompowia posusa bete ka pangga-pangga bete bo ka pura-pura topokarajaana ri setu. Bo pura-pura balengga tantara Persia bo Media narata woꞌu ri posusa etu. Wetu woꞌu pura-pura gubernur bo to nalanga panggana ri pura-pura propinsi etu. 4 Posusa to nikawiana etu onombula kasaena. Wetu woꞌu kasaena iꞌa nompopokita kasugi bo kagaya poparentana bo mbara-mbara to naria ri sapo magau.
5 Naopu etu nikawia magau woꞌumo posusa ka pura-pura todea ri petoꞌo pekalendu ri kota Susan, nabelo ka tau nasugi nabelo ka tau nakasiasi. Posusa etu nikawia saminggu kasaena ri lalowo sapo magau. 6 Lalowo sapo magau niwera mpakaramba ante kae powombo to nagawu bo nabula, bo nipoꞌu lui nalusu to nakamumu bo nikaꞌi ri gala-gala salaka to nipataka ri tinja-tinja watu bula. Pade ri wayo tinja etu nidika pekatoko-pekatoko bulawa bo salaka ri jaula to nipakaramba ante watu bula to nenggila bo watu lei to nagaya ante kuli mutiara to nenggila bo watu pirus to nagawu. 7 Tempo etu magau nompakasadia anggur neliu nggadea pade nitoli riara mpengele-ngele petoꞌo panginu to nikawia nggari bulawa. 8 Pura-pura torata nipaloga manginu, pade magau woꞌu nanguli ka pura-pura topantarima torata ri setu ala mombawai panginu ka torata nantuki nuapa to nipokono ira.
9 Tempo magau danowia posusa, rongona to nosanga ka Wasti woꞌu nompowia posusa ka pura-pura besi to naria ri sapo magau. 10 Sangga nagana pitueo magau nadamba-damba sabana nadea gagamo panginuna nipokiona pitumbaꞌa tau to nipakatantu mombatande iꞌa. Ira to nipokiona etumo i Mehuman, i Bizta, i Harbona, i Bigta, Abagta, i Zetar bo i Karkas. 11 Ira nipakau malau mangala Magau besi Wasti pade manggeni iꞌa marata ri ngayona ante mompake songgo kamagau ri balenggana. Magau madota mompopokita kagayana ka pura-pura pangga bete bo ka pura-pura toratana, sabana magau besi etu nagaya mpuꞌu. 12 Tapi tempo tau to nisuro magau etu nompakasampe tesa ka rongona, rongona etu daꞌa nadota narata. Nangepe etu narau mpuꞌumo rara magau.
13 Nantuki kabiasa ira ri setu magau nerapi pombarata nggari tau-tau to nataꞌuna riara atura bo ada. 14 Tau to nataꞌu to naoso nipokio magau etumo; i Karsena, i Setar, Admata, i Tarsis, i Meres, i Marsena bo i Memukan. Ira pura-pura pangga bete nggari Persia bo Media, pade ira eꞌi tau to naria pekatokona ri poparenta magau etu. 15 Nangulimo magau ka ira papitu mbaꞌa etu, “Nipakaukumo topantande-topantande aku malau mangala ronguku Magau besi Wasti ala mompakau iꞌa marata ri jaꞌiku. Tapi iꞌa daꞌa nadota. Mantuki aturata ri seꞌi nuapa masipato rapowiata ka iꞌa?”
16 Nangepe etu nangulimo i Memukan ka magau bo pangga bete ri setu, “Ante powiana etu daꞌa aga magau to nipakaeyana, tapi pura-pura pangga bete ri sapo magau eꞌi bo pura-pura langgai ri poparenta magau eꞌi woꞌu. 17 Sabana ane inggu magau besi etu raepe pura-pura besi, natantumo ira woꞌu kana manjauru rongona langgai. Natantumo ira kana manguli, iapa magau nompakau rongona marata, daꞌa woꞌu narata. 18 Jadi ane rongo pangga-pangga bete nggari Persia bo Media mangepe etu natantumo ira kana manjapuaka rongo ira langgai pade rongo ira langgai kana manggarau. 19 Sabana etu ane rapodota magau, aginamo rapakatantu Magau besi Wasti etu mana mamala mantingayo komi. Kabotu etu kana rapajadi atura-atura ka tau Persia bo Media ala daꞌa mamala rabali. Maopu etu alamo besi ntanina to neliu nggabelo ingguna nggari Magau besi Wasti manjambei pekatokona. 20 Ane kabotu komi etu matiepe ri pura-pura poparenta eꞌi natantumo pura-pura besi kana mombabila rongona langgai nabelo ka to nasugina nabelo ka to nakasiasina.”
21 Tesa i Memukan etu nikasituju magau bo pura-pura pangga betena. Jadi nikawia magaumo nantuki tesa etu. 22 Nipakatuna sura ka pura-pura propinsi riara poparentana nantuki potulisina mboto, bo ka pura-pura tau nantuki basana mboto nanguli ka pura-pura tau riara basana mboto iweꞌi: “Riara butu-butu ongu njapo totuꞌa langgaimo to majadi balengga.”a