Rut ante i Boas ri pomporo pae jelai
3
Bara sakuya tempo kaliuna etu, nangulimo i Naomi ka i Rut, “Kana kupasimbuku mangelo langgai momporongo iko ala iko masana. 2 Iko nokarajaa mpasanggani ante besi-besi ri tinalu i Boas. Boas etu sampesuwuta. Jadi, epemo! Wengi eꞌi iꞌa malau motapi pae ri pomporona. 3 Pandiumo bo pakemo wongi-wongi bo pasuamo baju gayamu. Pade kalaumo ri pokarajaa Boas ri pomporona. Popeamo ri setu sampe iꞌa maopu manggoni bo manginu, tapi neꞌe sampe ranjanina iko maria ri setu. 4 Kitamo ri umba rapaturuna, pade sunggeraka buya pobaba ri kadana bo paturumo namosu ri kadana. Damo raulina ka iko nuapa to masipato mupowia.”5 Pade nangulimo i Rut, “Kutuki pura nuapa to niuli komi.”
6 Jadi nalau mpu'umo i Rut ri pomporo i Boas. Ri setu nitukina pura nuapa to niuli matuꞌana. 7 Naopu i Boas nanggoni bo nanginu nasanamo rarana. Nalaumo i'a naturu namosu potambunaka pae. Pade i Rut narata nggalino nombasunggeraka buya pobaba kada i Boas, bo naturu ri sinjori kadana. 8 Natongo wengi sampenjani nanotomo rara i Boas bo negoli. Natekajamo iꞌa naria samba'a besi naturu ri sinjori kadana. 9 Nekutanamo i Boas, “Isema tano iko?”
Nesonomo i'a, “Aku i Rut batuamu! Komi sampesuwu kami to namosu to masipato mompeili katuwuku. Poasi mata komimo aku.”a
10 Nesonomo i Boas, “Anaku, perapi PUE mombawai belo ka iko. Ane rapoposisala ante to nipowiamu ka matuꞌamu, powiamu eꞌi nompopokita nelabipa kabete towemu. Etu nompakanoto iko namala mangelo rongo to danamudana, nau tau nasugi bara nakasiasi, tapi etu daꞌa nipowiamu. 11 Jadi ne'e makini raramu, pura-pura pomperapimu kutuki, apa pura-pura tau ri ngata eꞌi nangginjani iko tau nabelo. 12 Nakono mpuꞌu aku sambaꞌa tau masipato mompeili katuwumu, apa aku sampesuwumu. Tapi danariapa sambaꞌa ntanina to masipato mompeili katuwumu, pade neliu nggamosupa posampesuwumu ante i'a pade aku. 13 Wengi eꞌi paturumo ri seꞌi. Naile mpadondo aku malau mompekutana bara madota iꞌa mompeili iko bara daꞌa. Ane madota iꞌa, nabelomo. Tapi ane daꞌa rapokonona, aku mojanji ante Alatala to natuwu, aku mompeili iko. Jadi paturu ri seꞌimo sampe bobayana.”
14 Jadi naturumo i Rut ri sinjori kada i Boas. Naile mpadondona danarumau ntoto, Rut nembangu ala da'a rakita ntau. Apa daꞌa nipokono i Boas ranjani ntau i Rut narata naturu ri sa'a. 15 Nangulimo i Boas ka i Rut, “Wole se'imo kae salele nipobilimu.” Niwolena mpu'umo salelena, pade i Boas nombaboli buli pae jelai ri salele i Rut etu kira-kira rompulu kilona. Pade nionggotakana ri winga i Rut. Naopu etu nalaimo i Boas mpaka ri kota.
16 Naratapa i Rut ri sapo nekutanamo matuꞌana, “Anaku, iwenumo kajadina?”
Jadi nitesa i Rut puramo anu nipowia i Boas ka i'a. 17 Niulina, “Niwaina woꞌu rompulu kilo pae jelai eꞌi ka aku, pade niulina ala aku neꞌe manjili ante pale ntoya marata ri ja'i komi.”
18 Nesonomo i Naomi, “Popeamo sampe mukita wenu ngina kaopuna etu. Boas da'apa naosa rarana ane da'apa naopu raurusina parakara eo eꞌi woꞌu.”