Boas nomporongo Rut
4
Boas nalau ri bobaa ngata pade nekatoko ri setu. Tempona iꞌa danekatoko-toko ri saꞌa noliumo langgai to namosu posampesuwuna to nitesana ka i Rut. Jadi nipokio Boasmo i'a, “Sampesuwuku, kamai mekatoko ri seꞌi sampalai!” Jadi nalau mpu'umo i'a nekatoko. 2 Pade niperapi Boasmo sampulu mbaꞌa totuꞌa ngata mekatoko ri setu. Pade nekatoko mpu'umo ira. 3 Tempo ira nekatoko notesamo i Boas ka sampesuwuna etu, “Nanjilimo Naomi nggari tana Moab. Weꞌi-weꞌi iꞌa madota mompobalu tana sampesuwuta Elimelekh. 4 Nipekiriku nabelopa kana kupopanjani ka iko. Ane iko madota mangolina, ulimo ri ngayo todea eꞌi bo ri ngayo totu'a-totu'a ngata. Ane daꞌa, ulimo pakanoto, sabana aga kita rombaꞌa to masipato mangoli tana eꞌi; iko ruru pade aku.”Nesonomo tau etu, “Iyo aku mangolina.”
5 Pade nanguli woꞌumo i Boas, “Nabelomo. Tapi ane iko mangoli tana etu nggari ja'i Naomi, iko woꞌu kana mangala i Rut besi nggari Moab balu ana i Naomi. Sabana tana etu batena bagia tau to namate etu.”a
6 Nesonomo tau etu, “Ane wetu da'a kupakule mangolina, sabana ane aku mowia iwetu, aku aga mompakagado muliku nggapurina. Aginamo iko mangolina.”
7 Tempo etu tau ane mobalu bara mosinjula bara nuapa, kana rawonjuna sandalana pade rawaina ka topangoli etu rapompakaroso tesa. Iwetumo akala to Israel mompakaroso posioli. 8 Jadi tempo iꞌa nanguli ka i Boas, “Ikomo mangolina,” niwonjunamo sandalana pade niwaina ka i Boas.
9 Jadi nangulimo i Boas ka totuꞌa-totuꞌa ngata ante roa-roa ntanina ri setu, “Eo eꞌi komi najadi sabi niolikumo tana nggari ja'i Naomi pura-pura tana nggari ja'i Elimelekh ntaliana, etumo i Kilyon bo i Mahlon. 10 Pade weꞌi-weꞌi kuala woꞌu i Rut besi to Moab, balu i Mahlon, majadi rongoku. Ante iwetumo tana etu batena majadi tana muli Mahlon. Pade mulina woꞌu batena maria ri tatongo sampesuwuna ri ngata ira. Toramo sampesuwu-sampesuwu eo eꞌi komi najadi sabiku.”
11 Nangulimo totuꞌa-totuꞌa ngata bo tau ntanina, “Iyo, kamimo najadi sabimu. Perapi PUE mompajadi rongomu etu ewa i Rahel bo i Leab anu noana nadea sampe najadi todea to Israel. Perapi ikomo ngina malanga panggana ri Efratac bo sangamu rapakabete ri Betlehem. 12 Perapi doa maria ngana rawai PUE ka komi raote besi to danamudana etu mompajadi mulimu madea nasimbayu ewa muli i Peres, ana Yehuda bo i Tamar.”d
Boas bo mulina
13 Jadi niala i Boasmo i Rut bo niporongona. Ira nosampaturu pade ante kuasa i PUE, natianamo i Rut pade nangote samba'a ngana langgai. 14 Jadi nangulimo besi-besi ka i Naomi, “Ratoiyata i PUE! Eo e'i niwai-Namo makumpu langgai ka komi to mamala mompeili komi ngina. Perapi ngana etu majadi tau to nalanga panggana ri Israel. 15 Maniamu etu nabelo ntoto ri ja'imu. Nabelopa i'a pade papitu ngana langgai. Etupa niotena wo'umo makumpumu langgai ka komi, ala mombawai dota rara to nabou ka komi bo mompeili komi ri tempo nggatu'amu.”
16 Niala i Naomi ngana etu nisalungguna bo nipiarana. 17 Besi-besi ri sinjori sapo ira nompoposanga ngana etu Obed. Niuli iramo, “Naomi noana samba'a ngana langgai!”
Obed etumo najadi uma Isai, bo Isai najadi uma i Daud.