PUE nompakaroo rara Yosua
1
Naliu kamate i Musa, batua i PUE etu, notesamo i PUE ka Yosuaa ana i Nun, wakele i Musa. 2 Niuli-Na, “Ninjanimumo batua-Ku i Musa namatemo. Jadi we'i-we'i komi bo pura-pura todea Israel kana masadia-dia malau mombawote Binangga Yordan, pade mesua ri Tana Kanaan to Kuwai ka komi pura-pura. 3 Ri umba-umba tana mulonggo kana Kuwai ka komi pura-pura, ewa to nitesaku ka i Musa bopia. 4 Tana Kanaan etu kana Kuwai ka komi, nompamula nggari karawa baina ri puluna sampe ri Bulu Libanon ri tasina, bo nggari binangga bete, etumo Binangga Efrat, pura-pura tana tau to Het, sampe mpaka ri Tasi Bete ri sabingga kasolo nu eo. Pura-pura tana etu kana majadi bagia komi to Israel. 5 Yosua, sampe kaopu katuwumu daꞌa ntoto maria samba'a mompakule mombadagi iko. Sabana Aku i PUE batena momporoa iko nasimbayu ewa Aku nomporoa i Musa nggaulu. Aku daꞌa mompalasi iko. 6 Pakaroo bo pakarosomo raramu, sabana iko kana manggeniaka todea eꞌi majadi pue Tana Kanaan etu. Sabana nijanji-Kumo tana etu kana Kuwai ka totu'a komi nggaulu. 7 Aga pakaroo bo pakarosomo raramu. Iko kana mainga-inga ala mantuki pura-pura atura to niwai batua-Ku i Musa ka iko. Neꞌe muliunaka nau aga sakedi, ala ri umba mukalau kana moasele. 8 Buku i Musa etu kana tunggai mubasa ka todea-Ku. Tondoakamo isi buku etu eo wengi, ala iko tunggai mantuki pura-pura to nitulisi riarana. Ane iko mantuki pura-pura etu, katuwumu kana masana bo moasele mabelo. 9 Toramo! Niparenta-Kumo iko, pakaroo bo pakarosomo raramu! Neꞌe iko maeka bo makini rara, sabana Aku i PUE Alatalamu, batena momporoa iko ri umba-umba mukalau."Yosua nomparenta todea Israel masadia-dia mesua ri Tana Kanaan
10 Pade Yosua nomparenta topanggeniaka-topanggeniaka todea Israel, 11 ala mompesayo pura-pura potenda tau to Israel bo momparenta ira iwe'i: “Pakasadiamo bakumu, sabana tolueopa kita kana mombawote Binangga Yordan ala malau metoꞌo ri tana to rawai PUE Alatalata ka kita.”
12 Naopu etu nangulimo Yosua ka suku Ruben, suku Gad, bo sabagia nggari suku Manasye, 13 "Toramo tewai i Musa, batua i PUE, ka komi, iwe'i: PUE Alatalata nombawai ka'amana ka komi bo nombawai ngata ri sabingga pebulu nu eo Binangga Yordan e'i wo'u ka komi. 14 Pura-pura rongo komi besi ante ana-ana komi, ante binata to nipiaramu mamala meto'o ri sabingga pebulu nu eo Binangga Yordan e'i. Tapi pura-pura langgai to namala nosibali nggari ja'i komi kana masadia ante parewa mposibali bo mokolu ka tau to Israel ntanina mombawote Binangga Yordan. 15 Komi kana mantulungi sampesuwu-sampesuwumu to Israel ntanina etu, sampe ira mamala meto'o ri tana sabingga kasolo ri Binangga Yordan etu to niwai PUE Alatalata ka ira. Ane maoupumo i PUE mombawai kaꞌamana ka pura-pura to Israel, pade mamala komi matingguli mpaka ri tanamu mboto ri sabingga pebulu nu eo Binangga Yordan e'i, to niwai i Musa batua i PUE etu ka komi.b
16 Jadi nesonomo suku Ruben, suku Gad, bo sabagia nggari suku Manasye etu ka Yosua, “Nuapa-nuapa to muparenta ka kami kana rakawia kami, bo nau mpaka ri umba kami mupakau, kami kana malau. 17 Kami kana matundu ri ja'imu nasimbayu ewa kami natundu ri jaꞌi Musa! Perapi doa i PUE Alatalata batena momporoa komi, ewa I'a nomporoa i Musa! 18 Isema-sema daꞌa matundu riara parentamu bo daꞌa mangepe tesamu i'a kana rapatesi. Aga pakaroo bo pakarosomo raramu!"