Tenda Mpepue nipopenggore pade nipatani ka i PUE
40
Nangulimo i PUE ka i Musa, 2 “Ri tanggal saongu, wula saongu popenggoremo Tenda Mpepue, etumo tenda kuposirata ante komi. 3 Suaraka riarana Peti Pojanji to noisi sampulu parenta pade patakamo powombo ri ngayona manggalendu peti etu. 4 Suarakamo meja pade pasiayumo parewa-parewa ri bungguna. Pade suarakamo kada mpoindo pade patakamo poindona ratunju. 5 Dikamo meja mpotunju dupa to nipowia nggari bulawa ri ngayo Peti Pojanji, pade loemo powombo ri pewobo nu tenda.6 Dikamo meja petoꞌo rapompalabu pesomba ri ngayo pewobo nu tenda. 7 Tuꞌumo dula palangga rapombarama ri olo tenda ante meja mpesomba, pade isimo dula etu ante ue. 8 Pade patakamo powombo ri ntiku-ntiku lalowo nu tenda pade loemo powombo ri bobaana.
9 Naopu etu alamo minya ada pade tolimo minya etu ka tenda bo mpengaya parewana riarana. Ante iwetu pura-pura etu rapatani ka Aku pade majadi anu to nagasa riara mpanggitaku. 10 Kawia iwetu woꞌu ka meja petoꞌo rapompalabu pesomba ante parewa-parewana ala rapatani ka Aku bo majadi magasa mpuꞌu riara mpanggitaku. 11 Pade kawia iwetu woꞌu ka dula ante kadana rapombarama ala rapatani ka Aku.
12 Naopu etu pakaumo i Harun ntaliana momai ri pewobo tenda pade diumo ira ante ue. 13 Popasua ka i Harun pakea mpepue, pade tolimo minya ada ri korona ala iꞌa rapatani mobago manggeni pesomba ka Aku. 14 Pade pakaumo ana-anana momai pade pasua ka iramo kameja. 15 Tolimo minya ada ka ira nasimbayu ante uma ira ala ira mamala mantulungi manggeni pesomba ka Aku. Ante nitoli minya ada iwetu ira nionggotaka majadi topanggeni agama sampe muli nu muli ira.” 16 Nangepe etu i Musa nompowia pura-pura to niparenta i PUE ka iꞌa etu.
17 Jadi ri tanggal saongu wula saongu ri mpae karompaena naliu to Israel nompalasi Tana Masir, nipopenggoremo Tenda Mpepue. 18 Musa nombadika polampi-polampi tinjana, pade nipopenggorena dopi-dopina pade nipataka kayu-kayu polondona bo nipatinda tinja-tinjana. 19 Pade nijinina ata nu tenda ante tutu bagia sawaliku ata etu ewa to niparenta i PUE.
20 Nisuarakana rongu watu to nitulisi noisi sampulu parenta riara Peti Pojanji. Pade nipatakana tutu nu peti etu pade nisuarakana kayu pokowa riara galana. 21 Pade nidikana peti etu riara tenda pade niloena kae powombo rapanggalendu ri ngayona, ewa niparenta i PUE ka iꞌa.
22 Pade nidikana meja riara Tenda Mpepue ri bagia tasina ri sawaliku nu kae powombo panggalendu 23 pade nituꞌuna roti pesomba ri bunggu meja etu ri ngayo i PUE ewa to niparenta i PUE ka iꞌa.
24 Kada mpoindo nidikana riara tenda ri bagia puluna, nosintingayo ka meja etu, 25 pade poindo-poindona nitunjuna ri ngayo i PUE ewa niparenta i PUE ka iꞌa.
26 Meja mpotunju dupa to nipowia nggari bulawa nidikana riara tenda ri ngayo kae powombo panggalendu, 27 pade nitunjuna dupa ri bungguna ewa niparenta i PUE ka iꞌa.
28 Naopu etu niloena powombo pewobo nu tenda, 29 pade ri ngayo pewobo etu nidikana meja petoꞌo rapompalabu pesomba. Ri bunggu meja mpesomba etu nituꞌuna pesomba rapalabu bo pesomba gando bo lana ewa niparenta i PUE ka iꞌa.
30 Nidikana dula rapombarama ri olo tenda bo meja mpesomba, pade niisina ante ue. 31 Naopu etu i Musa, bo i Harun ntaliana nombarama kada bo pale ira ri setu. 32 Butu nggani ira nesua ri Tenda Mpepue bara nompakamosu meja mpesomba ira nombarama ri setu ewa to niparenta i PUE ka i Musa.
33 Pade nipataka ira powombo ri ntiku-ntiku lalowo nu tenda etu, pade niloe ira kae powombo bobaa lalowo. Iwetumo i Musa nompakaopu pura-pura pokarajaa etu.
Reme bo kuasa i PUE nesua nompakaponu Tenda Mpepue
Bil. 9:15-23
34 Naopu etu nanaꞌumo kulimu nombabungu Tenda Mpepue etu, pade reme bo kuasa i PUE nesua riarana. 35 Musa daꞌa namala mesua riarana sabana kulimu nanaꞌu nombabunguna pade reme bo kuasa i PUE naponu riarana.
36 Riara pura-pura polumako nto Israel, ane kulimu etu neore nggari Tenda Mpepue, to Israel kana nalai nolinja nggari petoꞌo potenda ira etu. 37 Tapi ane kulimu etu daꞌa neore, ira daꞌa nalai nggari petoꞌo potenda ira sampe kulimu etu neore woꞌumo. 38 Jadi ri eona kulimu i PUE etu naroo ri baꞌa Tenda Mpepue, pade tempo nggawengina naria apu riara kulimu etu ala mamala rakita nto Israel. Iwetumo to najadi riara pura-pura polumako ira.