Nowia pakea topanggeni agama
Kel. 28:1-14
39
Pade i Bezaleel bo Aholiab nantanu kae nggari bana naramata, nakamumu bo nalei rapowia pakea rapake topanggeni agama tempo ira mobago ri Petoꞌo Nagasa riara Tenda Mpepue. Pade nipowia ira woꞌu pakea mpepue ka i Harun nantuki parenta i PUE ka i Musa.2 Baju efod nipowia ira nggari kae linen to nalusu, ante bana bulawa, naramata, nakamumu bo nalei. 3 Ira nombapempe mpakanipi bulawa etu pade nikoto ira nipadii majadi bana nanipi, pade nitanu ira mpasanggani-nggani ante kae linen nalusu bo bana naramata, nakamumu bo nalei. 4 Naliu etu nipowia ira rongu lui pompoꞌu ri winga baju efod, pade nijau ntimali-mali ri wiwi baꞌana ala mamala raposiumpu. 5 Pade pompoꞌu kope baju efod to nitanu mpakalusu nipowia ira nggari bana nasimbayu, etumo nggari bana bulawa, naramata, nakamumu bo nalei, pade nijau sampe najadi saongu bagia ante baju efod. Etu pura-pura nipowia nantuki parenta i PUE ka i Musa.
6 Pade nisampu ira watu-watu ake nipataka riara lili bulawa to nirandu. Pade ri watu etu niuki ira sanga sampulu rombaꞌa ana Yakub ewa tau nombauki stempel. 7 Watu-watu etu nipataka ira ri lui winga nu baju efod majadi tandai mombatora muli sampulu rombaꞌa ana Israel etu, ewa to niparenta i PUE ka i Musa.
Nowia tutu bombara
Kel. 28:15-30
8 Pade nipowia ira tutu bombara topanggeni agama nantuki kapande ira. Tutu bombara etu nipowia nggari kae to nasimbayu ewa baju efod, etumo nggari bana bulawa, naramata, nakamumu bo nalei bo kae linen nalusu. 9 Tutu bombara etu nosulapa, pade nitilu rontilu, kandatena bo rembana simbau 22 senti. 10 Ri tutu bombara etu nipataka ira patanjala watu sinji to nasulina. Ri jala pamulana naria watu delima, watu krisolit bo watu baiduri sepah. 11 Ri jala karonjalana naria watu zamrud, watu nilam bo watu intan. 12 Ri jala katolunjalana naria watu lazuardi, watu akik bo watu kecubung. 13 Ri jala kapatanjalana naria watu beril, watu yakut bo watu ratna cempaka. Pura-pura watu etu nipataka ri wiwi bulawa nirandu. a 14 Ri saongu-saongu watu etu niuki saongu sanga nggari sampulu rombaꞌa ana Israel majadi tandai mombatora muli nu ana-ana Israel.
15 Pade nipowia ira rompenga rante ka tutu bombara etu nggari bulawa daꞌa ria galona to nikaloro ewa lui. 16 Nipowia ira woꞌumo rongu wiwi bulawa nirandu rapompataka rongu watu ake ri lui winga baju efod bo rongu gala bulawa rapataka ri wuntu baꞌana tutu bombara etu. 17 Naopu etu nisuaraka rante bulawa rompenga riara gala-gala etu, 18 pade rongupa wuntu rante etu nipataka ri rongu wiwi bulawa to nirandu sampe tutu bombara etu namala raposiumpu ante bagia ngayo baju efod. 19 Pade nipowia ira woꞌu rongupa gala bulawa to nipataka ri wuntu kelena tutu bombara etu riarana sampe nosirata ka baju efod. 20 Pade nipowia ira rongu gala bulawa ntanina to nipataka ri bagia ngayo nu lui winga baju efod, namosu ri posiumpu mpojauna kelena ri baꞌa pompoꞌu kope baju efod. 21 Gala tutu bombara niposiumpu ante lui naramata ri gala to nijau ri baju efod sampe tutu bombara etu batena naria ri baꞌa pompoꞌu kope pade daꞌa mamala montoya, ewa to niparenta i PUE ka i Musa.
Nowia pakea ka topanggeni agama ntanina
Kel. 28:31-43
22 Baju ndoe to nipake riara nu baju efod nikawia nggari kae naramata. 23 Tambolo nu baju etu nipowia ri tatongona pade wiwina nipakaroso ante lele to nitanu ala daꞌa maseri. 24 Ri wayo nu baju ndoe etu nipataka ira ramba nolenje mpowua delima to nipowia nggari bana naramata, nakamumu bo nalei. 25 Pade nipowia ira woꞌu banggula bulawa nggedi ri olo ramba wua delima etu 26 sampe banggula-banggula etu niposiolo-olo ante ramba wua delima ri wayo nu baju etu. Baju etu nipowia ka topanggeni agama tempo iꞌa nobago ka i PUE nantuki parenta i PUE ka i Musa.
27 Pade nipowia ira kameja ka i Harun ntaliana, 28 bo songgo, poruka mbuku nggari kae linen, 29 bo pompoꞌu kope nggari kae linen nalusu, nisuji ante bana naramata, nakamumu bo nalei nantuki parenta i PUE ka i Musa.
30 Pade nipowia ira sangele ramba nggari bulawa to daꞌa ria galona, sangele to nagasa riara mpanggita i PUE. Ri ramba etu nitulisi, “Nagasa riara mpanggita i PUE.” 31 Ramba etu nipataka ri songgo bagia koluna ante lui naramata nantuki parenta i PUE ka i Musa.
Pokarajaa niparesa i Musa
Kel. 35:10-19
32 Kaopuna naopu puramo pokarajaa nowia Tenda Mpepue etu. To Israel nowia pura-pura nantuki to niparenta i PUE ka i Musa. 33 Pade nikeni ira Tenda Mpepue ante mpengele-ngele parewana ka i Musa, etumo pekaꞌi, dopina, kayu polondona, tinja bo polampina, 34 tutu nu tenda to nipowia nggari kulimba bimba tuamana to nalei, tutuna to nipowia nggari kulimba nalusu, kae powombo, 35 Peti Pojanji to noisi rongu watu to nitulisi, nosanggani-nggani ante kayu pokowana bo tutuna, b 36 meja ante pura-pura parewana bo roti rapesomba, 37 kada mpoindo bulawa to daꞌa ria galona, poindona ante mpengele-ngele parewana, lana poindo, 38 meja mpotunju dupa bulawa, minya ada, dupa, kae powombo pewobo nu tenda, 39 meja tambaga ante kaoana tambaga, kayu pokowana ante mpengele-ngele parewana, dula rapombarama ante kadana, 40 kae powombo lalowo tenda ante tinja bo polampina, powombo bobaa lalowo ante kaloro bo panto-pantona, pura-pura parewa to nipake riara Tenda Mpepue, 41 bo pakea-pakea ka topanggeni agama tempo ira mobago riara Petoꞌo Nagasa, etumo pakea i Harun bo pakea ana-anana.