Nowia meja petoꞌo rapompalabu pesomba
Kel. 27:1-8
38
Bezaleel nangala kayu akasia pade nipowiana meja petoꞌo rapompalabu pesomba. Meja etu nosulapa, kandatena bo rembana simbau 2,2 metere, bo kalangana 1,3 metere. 2 Ri soki-soki baꞌana nipowia tandu to najadi saongu ante meja etu. Njumaongu etu nilapi tambaga. 3 Nipowiana woꞌu pomboli sowu, sero, loya-loya, garpu bo petoꞌo pomboli apu. Parewa etu nipowia puramo nggari tambaga. 4 Nipowiana kaoa tambaga nisua pade nidikana ri wayo wiwi nu meja ala kalanga nu kaoa etu santongo kalanga nu meja. 5 Pade nipowiana pataongu gala tambaga raposuaraka kayu pokowa pade nipatakana ri soki patanjoki nu kaoa tambaga etu. 6 Pade nipowiana kayu pokowa nggari kayu akasia to nilapi ante tambaga. 7 Naopu etu kayu pokowa etu nisuarakana riara gala-gala ri sabingga meja ntimali etu. Meja etu nipowia nggari dopi nitombi.Nowia dula palangga rapombarama
Kel. 30:18
8 Nipowiana woꞌu dula ante kadana nggari tambaga. Tambaga etu niratana nggari pompewayo-pompewayo nu besi to nipakatantu mobago ri pewobo Tenda Mpepue.
Nowia lalowo nu Tenda Mpepue
Kel. 27:9-19
9 Naopu etu i Bezaleel nowala lalowo Tenda Mpepue ante powombo nggari kae linen to nalusu. Ri bagia puluna kandate powombo etu 44 metere. 10 Powombo etu nitande rompulu mpeka tinja tambaga simbau ante polampi tambaga bo pekaꞌina bo polondona nipowia nggari salaka. 11 Ri bagia tasina wala powombo etu nipowia iwetu woꞌu. 12 Ri bagia kasolona kandatena 22 metere, pade powombona nipataka ante sampulu mpeka tinja bo sampulu ongu polampina, ante pekaꞌi bo polondona nipowia nggari salaka. 13 Ri bagia pebuluna to naria bobaa, kandatena 22 metere. 14-15 Ri sabingga njidi bo nggana nu bobaa etu nipataka powombo, kandatena simbau 6,6 metere ante tolumpeka tinja bo toluongu polampina. 16 Pura-pura powombo ri ntiku-ntiku lalowo etu nipowia nggari kae linen to nalusu. 17 Polampi tinjana nipowia nggari tambaga pade pekaꞌina ante polondona nipowia nggari salaka, pade wuntu nu tinjana woꞌu nilapi salaka. Pura-pura tinja ri lalowo etu niposiumpu ka roana ante polondo salaka.
18 Kae powombo bobaa nu lalowo etu nipowia nggari kae linen nalusu to nitanu ante bana naramata, nakamumu bo nalei pade nipakaramba ante posuji. Kandatena 9 metere bo kalangana 2 metere, nasimbayu ante powombo lalowo. 19 Kae powombo bobaa etu nitande patampeka tinja to nipataka ri pataongu polampi tambaga. Pura-pura pekaꞌi bo polondona nipowia nggari salaka pade wuntu baꞌa nu tinja bo polondona nilapi salaka. 20 Pura-pura panto rapompataka tenda bo lalowona nipowia nggari tambaga.
Kadea nu bulawa, salaka bo tambaga to nipake nowia Tenda Mpepue
21 Ri seꞌi nitulisi kadea nu bulawa, salaka bo tambaga to nipake riara Tenda Mpepue, etumo petoꞌo pomboli rongu watu to nitulisi noisi sampulu parenta nu Alatala. Kadeana etu nitulisi tau-tau to Lewi nantuki parenta i Musa. To Lewi etu nikeniaka Itamar, ana i Harun topanggeni agama. 22 Bezaleel ana Uri, makumpu i Hur nggari muli Yehuda nowia pura-pura to niparenta i PUE ka i Musa. 23 Iꞌa nitulungi Aholiab ana Ahisamakh nggari muli i Dan. Aholiab sambaꞌa topande mpouki, nowia nia pade toposuji kae linen nalusu ante bana naramata, nakamumu bo nalei. 24 Kadea nu bulawa to nionggotaka ri ngayo i PUE majadi pesomba rapowia Tenda Mpepue ante pura-pura parewana 1000 kilo, nitimba nantuki potimba ri Tenda Mpepue.
25 Kadea nu salaka to nipesomba todea to Israel 3,430 kilo, nitimba nantuki potimba ri Tenda Mpepue. 26 Salaka etu to nibayari nto Israel to nitulisi sangana riara popabila. Pura-pura tau kana nombayari oli to nipakatantu, etumo 6 gram sambaꞌa nitimba nantuki potimba ri Tenda Mpepue. Riara popabila etu nitulisi sanga langgai noumuru rompulu mpae labi, kadeana 603,550 mbaꞌa. 27 Nggari salaka etu, 3,400 kilo nipake nompowia satu ongu polampi tinja nu Tenda Mpepue bo tinja ka powombo to nombatombi riara nu tenda. Katomo nu polampi saongu-saongu 34 kilo. 28 Labi nu salaka etu 30 kilo nipake i Bezaleel nowia polondo-polondo bo pekaꞌi-pekaꞌi nu tinja pade nombalapi wuntu nu tinja-tinja etu.
29 Kadea nu tambaga to nionggotaka ri ngayo i PUE majadi pesomba 2,425 kilo. 30 Tambaga etu nipake nowia polampi tinja ri pewobo nu Tenda Mpepue, meja mpesomba ante kaoana, pura-pura parewa nu meja mpesomba, 31 polampi tinja mpowombo ri ntiku-ntiku lalowo bo bobaa nu lalowo, pura-pura panto rapompataka tenda bo njumantiku lalowona.