Nowia Peti Pojanji
Kel. 25:10-22
37
Bezaleel nompowia Peti Pojanji nggari kayu akasia, kandatena 110 senti, rembana bo kalangana simbau 66 senti. 2 Riarana bo ri sawalikuna peti etu nilapina ante bulawa to daꞌa ria galona, pade wiwina nilili bulawa. 3 Pade nipowiana pataongu gala bulawa raposuaraka kayu pokowana pade nipatakana ri kada nu peti etu patanggada, rongu gala sabingga. 4 Nipowiana woꞌu kayu pokowa nggari kayu akasia. Nilapina ante bulawa, 5 pade nisuarakana kayu pokowa etu riara gala ntimalina.6 Pade nipowiana tutu nu peti nggari bulawa to daꞌa ria galona, kandatena 110 senti bo rembana 66 senti. 7 Nipowiana woꞌu rombaꞌa malaeka kerub nggari bulawa nipempe ri tampa nu peti ntimali-mali. 8 Kerub ri tampa nu peti ntimali etu nipajadina saongu bagia ante tutu nu peti 9 pade nipoposintingayo sambaꞌa bo sambaꞌa. Kapi nu kerub etu nenggaka nompakaulu tutu nu peti etu. Pade lenje kerub etu nompetiro tutuna.
Nowia meja rapomboli roti pesomba
Kel. 25:23-30
10 Bezaleel nowia meja nggari kayu akasia, kandatena 88 senti, rembana 44 senti bo kalangana 66 senti. 11 Meja etu nilapi puramo ante bulawa to daꞌa ria galona pade wiwina nilili bulawa. 12 Pade nipowiana wiwi nu meja, kalangana 7,5 senti. Wiwi nu meja etu nilili bulawa. 13 Nipowiana pataongu gala bulawa raposuaraka kayu pokowa pade nipatakana ri soki patanjoki kada nu meja. 14 Gala mombatande kayu pokowa nipataka namosu wiwi nu meja etu. 15 Kayu pokowa nipowia nggari kayu akasia pade nilapi bulawa. 16 Pade nipowiana woꞌu baki-baki, suraya-suraya, panombo-panombo bo jolo-jolo rapotoli ue anggur to rapesomba. Pura-pura parewa etu nipowiana nggari bulawa to daꞌa ria galona.
Nowia kada mpoindo
Kel. 25:31-40
17 Bezaleel nowia kada mpoindo nggari bulawa to daꞌa ria galona. Potande bo puꞌuna nipowia nggari bulawa nipempe. Bunga-bunga raporamba, sesena bo pantakana nipajadi saongu ante potandena bo puꞌuna.
18 Ri puꞌuna etu nipowia onompenga ranggana, tolumpenga sabingga. 19 Butu-butu rangga etu nipowia ka ramba ewa tolunjese bunga badam ante sese bo pantakana. 20 Ri puꞌuna nipowia patanjese bunga badam ante sesena bo pantakana. 21 Pade ri wayo sapasa rangga ntimali nipataka saongu sese nu bunga. 22 Njumaongu kada mpoindo ante pantakana bo rangga-ranggana nipowia nggari sanggoto bulawa daꞌa ria galona to nipempe. 23 Ri kada mpoindo etu nipowiana papitu poindo, pade nipowiana woꞌu parewa mompakagasa sumbuna bo dulana. Etu pura-pura nipowia nggari bulawa to daꞌa ria galona. 24 Nipakena 35 kilo bulawa to daꞌa ria galona rapowia kada mpoindo bo pura-pura parewana.
Nowia meja mpotunju dupa
Kel. 30:1-5
25 Pade i Bezaleel nowia saongu meja mpotunju dupa nggari kayu akasia. Meja etu nosulapa, kandatena bo karembana simbau 45 senti, pade kalangana 90 senti. Ri sokina patanjoki nipowia tandu najadi saongu ante meja etu. 26 Bagia baꞌana bo pura-pura wiwina bo tandu-tandu nilapi ante bulawa to daꞌa ria galona bo wiwina nilili bulawa. 27 Nipowiana woꞌu rongu gala bulawa ri wayo lili bulawa ntimali-mali raposuaraka kayu pokowa meja etu. 28 Kayu pokowa etu nipowia nggari kayu akasia bo nilapi ante bulawa.
Nowia minya ada bo dupa
Kel. 30:22-28
29 Pade i Bezaleel nowia minya ada bo dupa to daꞌa ria galona to nawongi mpuꞌu, ewa powia topande mowia minya wongi.