36
Ane i Bezaleel, Aholiab bo pura-pura tau to nombarata kapandena nggari jaꞌi PUE, ninjani ira mowia mpengaya to niparaluu mompowia Tenda Mpepue. Ira kana mowia pokarajaa etu nantuki jonjo to niparenta i PUE.”Nadea mpuꞌu pewai tau-tau to Israel
2 Musa nompokio i Bezaleel, Aholiab bo pura-pura tau to nombarata kapande nggari jaꞌi PUE bo nadota mantulungi mowia pokarajaa etu. 3 Pade niwaina ka ira pewai-pewai nto Israel to niwai rapowia Tenda Mpepue. Tapi daꞌa nenonto to Israel nanggeni pewai-pewai ira butu-butu eo. 4 Jadi nalaumo pura-pura topande to nokarajaa Tenda Mpepue etu nompalasi pokarajaa ira lau 5 nanguli ka i Musa, “Pewai-pewai to nikeni ntodea rapowia pokarajaa to niparenta i PUE neliu nggari to niparaluu.”
6 Jadi i Musa nompopanjani ka todea ri njumaongu potenda etu naganamo pewai rapowia Tenda Mpepue. Mana paraluu ratambai. Jadi todea mana nanggeni pewai ntanina, 7 sabana nelabi kaganana mompakaopu pura-pura pokarajaa etu.
Topande nowia Tenda Mpepue
Kel. 26:1-37
8 Pade tau to nataꞌu ntoto nggari tatongo topande etu nowia Tenda Mpepue. Tenda etu nipowia ira nggari sampulu bala kae linen to nalusu to nitanu ante bana naramata, nakamumu bo nalei, nisuji ante gambara malaeka kerub. 9 Sabala-sabala nasimbayu kabetena, kandatena 12 metere bo rembana 2 metere. 10 Lima bala kae niposiumpu najadi saongu powombo, pade lima bala ntanina nipowia iwetu woꞌu. 11 Ri wiwi powombo etu nipowia ira pokaꞌi nggari kae naramata, 12 limampulu pokaꞌi ri saongu-saongu powombo nosintingayo. 13 Pade nipowia ira woꞌu limampulu pekaꞌi bulawa rapompakasaongu robala powombo etu.
14 Naliu etu ira nowia ata nu tenda nggari sampulu sabala kae nipowia nggari wulu ntowau. 15 Butu-butu bala nasimbayu kabetena, etumo kandatena 13 metere, bo rembana 2 metere. 16 Lima bala niposiumpu najadi saongu powombo, bo ono bala ntanina niposiumpu najadi saongu powombo woꞌu. 17 Limampulu pokaꞌi nipataka ri wiwi powombo pamulana bo limampulu woꞌu ri wiwi powombo karobalana. 18 Pade nipowia ira limampulu pekaꞌi nggari tambaga rapangumpu rongu powombo etu majadi ata nu tenda. 19 Naopu etu nipowia ira rongu tutu rapotutu ata nu tenda, saongu nggari kulimba bimba tuamana to nalei, pade saongu nggari kulimba to nalusu.
20 Naliu etu nipowia ira dopi-dopi nggari kayu akasia nipatido rapoleru nu tenda, 21 simbau 4 metere kalangana bo rembana 66 senti. 22 Ri butu-butu dopi nipowia rongo potosu nosintoto. Pura-pura dopi nu tenda nipowia iwetu. 23 Ri bagia pulu nu tenda nipowia rompulu mbeba dopi, 24 ante patampulu ongu polampi salaka, rongu-rongu polampi sambeba dopi rapesua potosu-potosu to nipowia. 25 Ri bagia tasina nipowia rompulu mbeba dopi 26 ante patampulu ongu polampi salaka, rongu-rongu sambeba. 27 Ri bagia puri nu tenda, etumo ri sabingga kasolona, nipowia ira onombeba dopi biasa 28 bo rombeba niposidu ri sokina ntimali. 29 Rombeba dopi ri sokina niposiumpu nggari kelena sampe ri kalangana pade nipataka ka gala. Iwetu woꞌu to nipowia ri sokina ntimali. 30 Jadi naria walumbeba dopi ante sampulu onoongu polampi salakana, rongu-rongu polampi ri kele nu sambeba dopi.
31 Naopu etu nipowia ira sampulu limampeka polondona nggari kayu akasia, limampeka sabingga puluna, 32 bo limampeka sabingga tasina, pade limampeka ri bagia purina, etumo ri sabingga kasolona. 33 Kayu polondo ri tatongona nipataka ante kalangana 2 metere, nalau ri tampana ntimali-mali. 34 Dopi-dopi nu tenda bo kayu polondona etu nilapi bulawa puramo, pade nipataka ka gala-gala bulawa raposuaraka kayu polondo etu.
35 Pade nipowia ira woꞌu powombo rapotombi riara tenda etu. Powombo etu nipowia nggari kae linen nalusu to nitanu ante bana naramata, nakamumu bo nalei, pade nisuji ante gambara malaeka kerub. 36 Nipowia ira tinja nggari kayu akasia to nilapi bulawa, polampina to nipowia nggari salaka, pade pekaꞌi bulawa rapombaloe powombo etu.