Atura-atura Eo Mpenonto
35
Musa nompasiromu pura-pura to Israel pade nanguli ka ira, “Iweꞌimo parenta-parenta i PUE ka komi: 2 Naria ono eo mokarajaa, tapi eo kapapituna kana rareke komi eo nagasa, eo mpenonto ka i PUE ala mangosaraka. Isema-sema mokarajaa ri eo mpenonto etu kana rasuku mamate. 3 Eo etu neꞌe komi mompakawaa apu riara sapo komi.”Pewai to rapowia Tenda Mpepue
Kel. 25:1-9
4 Nangulimo i Musa ka to Israel, “Iweꞌimo parenta i PUE: 5 ‘Kenimo pewai ka i PUE nggari nuapa to naria ante komi rapowia Tenda Mpepue. Isema-sema nadota rarana kana manggeni ka i PUE bulawa, salaka bo tambaga, 6 kae linen to nalusu, bana wol naramata, nakamumu bo nalei, kae nipowia nggari wulu towau, 7 kulimba bimba tuamana to nalei, kulimba nalusu, kayu akasia, 8 lana zaitun rapotunju poindo, rampa-rampa rapowia minya ada bo dupa nawongi, 9 watu ake bo watu sinji to nasuli ntanina rapompataka ri baju efod bo tutu bombara topanggeni agama.
10 Pura-pura topande to nataꞌu nggari tatongo komi kana marata mompowia mpengele-ngele to niparenta i PUE, etumo: 11 Tenda Mpepue, ata bo tutuna, pekaꞌina, dopi-dopi, kayu rapolondo, tinja pewobo bo polampina, 12 Peti Pojanji ante kayu pokowana, tutuna bo kae powombo to manggalendu peti etu, 13 meja ante kayu pokowana, pura-pura parewana bo roti rapesomba ka i PUE, 14 kada mpoindo rapompataka poindo to mewanta ante pura-pura parewana, poindo bo lanana, 15 meja mpotunju dupa ante kayu pokowana, minya ada, dupa, kae powombo ri pewobo tenda, 16 meja petoꞌo rapompalabu pesomba ka i PUE, ante kaoana to nipowia nggari tambaga, kayu pokowana bo pura-pura parewana, dula tambaga ante kadana, 17 powombo-powombo lalowona ante tinja bo polampina, powombo rapompiku bobaa lalowo, 18 panto bo kaloro rapompataka tenda bo powombo lalowona, 19 pakea mpepue ka topanggeni agama tempo ira mobago riara Petoꞌo Nagasa ri Tenda Mpepue, nabeloka pakea i Harun bo pakea ana-anana tempo ira nantui bago topanggeni agama.’ ”
Tau-tau to Israel nanggeni pewai ira to rapowia Tenda Mpepue
20 Naopu etu nalaumo pura-pura to Israel nggari jaꞌi Musa, 21 pade isema-sema nadota rarana nanggeni pewai ka i PUE rapompakagana nuapa-nuapa to niparaluu mowia Tenda Mpepue. Nikeni ira woꞌumo pura-pura to niparaluu mepue ka i PUE pade nuapa-nuapa to niparaluu mowia pakea topanggeni agama. 22 Isema-sema nadota rarana, nabeloka langgai, nabeloka besi, narata nanggeni tudo bulawa, nganti-nganti, sinji, bili bo mpengaya-ngaya ramba-ramba bulawa ntanina. Etu pura-pura nionggotaka nipesomba ira ka i PUE. 23 Isema-sema to naria kae linen nalusu, bana naramata, nakamumu bo nalei, kae nipowia nggari wulu ntowau, kulimba bimba tuamana nalei, kulimba to nalusu nanggeni mbara-mbara etu rapesomba ka i PUE. 24 Pura-pura tau to namala nanggeni salaka bo tambaga majadi pesomba ka i PUE, pade isema-sema naria kayu akasia nanggeni etu ala rapake mowia Tenda Mpepue ante parewana. 25 Besi-besi to napande nowia bana nanggeni bana naramata, nakamumu bo nalei, nosanggani-nggani ante kae linen to nalusu to nipowia ira. 26 Pura-pura besi to nadota rarana to napandena nowia bana nggari wulu ntowau. 27 Topanggeniaka-topanggeniaka nanggeni watu ake bo watu sinji ntanina to nasulina rapataka ri baju efod bo tutu bombara topanggeni agama. 28 Nikeni ira woꞌu lana zaitun rapotunju poindo bo rampa-rampa rapowia minya ada bo dupa. 29 Pura-pura to Israel to nadota rarana, nabeloka langgai, nabeloka besi, nanggeni pesomba ira ka i PUE rapake ri pokarajaa to niparenta i PUE ka i Musa. Etu pesomba to nikeni ira ka i PUE ante namomi rara.
Bezaleel bo Aholiab nipelisi i PUE mowia Tenda Mpepue
Kel. 31:1-11
30 Naopu etu nangulimo i Musa ka to Israel, “Bezaleel ana Uri, makumpu i Hur nggari muli Yehuda nipelisi i PUE 31 pade niwaina ka Nosa Nagasa nu Alatala ante kapandena, pangginjani, pompakule pade mpengele-ngele kataꞌuna to niparaluu mowia mpengele-ngele to nagayana. 32 Nataꞌu iꞌa mokarajaa bulawa, salaka bo tambaga. 33 Nataꞌumo iꞌa mosampu watu sinji to nasuli olina pade morandu kayu pade mpengele-ngele kataꞌuna ntanina. 34 Pade Bezaleel nosanggani-nggani ante Aholiab ana Ahisamakh nggari muli i Dan, niwai i PUE ka pompakule mompatuduki kapande ira etu ka tau ntanina. 35 Ira niwai i PUE ka kapande riara mpengele-ngele pokarajaa. Napande ira nokarajaa mpengele-ngele ase. Napande ira nowia ramba to nagaya-gaya. Napande ira nowia kae to nisuji bana naramata, nakamumu bo nalei. Napande ira nantanu kae linen to nalusu bo kae-kae ntanina. Napande ira nowia nia bo nompowia mpengele-ngele pokarajaa.