Rongu watu to nitulisi nabou
Ul. 10:1-5
34
Naliu etu nangulimo i PUE ka i Musa, “Paꞌamo rongu watu nasimbayu ewa to niwaiku bopia. Ri watu etu kutulisi tesa nasimbayu ante ri watu to nitulisi to nipakaregemu. 2 Pakasadia-dia naile mpadondona mantende Bulu Sinai mantingayo Aku ri bunggu bulu etu. 3 Daꞌa mamala tau ntanina momporoa iko bara maria ri umba-umba ri bulu etu. Nau japi bo bimba neꞌe rapalamba ira mangguku ri kente nu bulu etu.”4 Jadi nipaꞌa i Musamo rongu watu to ratulisi nasimbayu ewa watu bopia. Pade to naile mpadondo njiina nembangumo iꞌa lau nantende mpaka ri bunggu Bulu Sinai ewa to niparenta i PUE ka iꞌa. Nikenina woꞌu rongu watu to ratulisi etu. 5 Pade nanaꞌumo i PUE riara kulimu nenggore ante i Musa ri bulu etu. Pade nipatolelenamo sangana, i PUE. 6 Noliumo i PUE ri ngayo i Musa ante nanguli, “Akumo i PUE, PUE Alatala. Nabete mpuꞌu kabelo raraku bo asi mataku. Neliu nggadea toweku. Aku namala raparasaya bo daꞌa nasalisa marau. 7 Aku mompopokita toweku ka njobu-njobu mbaꞌa tau pade mombaampungi kasala, pesapuaka bo silaka ira. Tapi tau to nasala daꞌa kukabasaka nggari pesuku. Aku mombasuku ana-ana bo makumpu-makumpu ira sampe mulina katoluntapi bo kapatantapina sabana silaka ntotuꞌa ira.”
8 Nangepe etu kaliu-liu i Musa notimbakotu sampe ri tana mombasomba i PUE. 9 Niulina, “O Pue, ane aku mpuꞌu-mpuꞌu nikonoa raramu, kuperapi ala Komi mboto malau mpasanggani-nggani ante kami. Naupa todeamu eꞌi nakoꞌo rara kuperapi ala Komi mombaampungi sala bo silaka kami, pade tarimamo kami majadi todeamu mboto.”
Pojanji i PUE nipakabou
Kel. 23:14-19, Ul. 7:1-5, 16:1-17
10 Pade nangulimo i PUE ka i Musa, “Weꞌi-weꞌi Aku mompowia pojanji ante komi to Israel. Ri ngayo mata komi Aku kana mowia kabaraka-kabaraka anu daꞌapa naria najadi ri ngata nuapa-nuapa ri njumaongu dunia eꞌi. Pura-pura tau ri ngata rapetoꞌo komi kana manggita kabaraka-kabaraka etu, sabana Aku, i PUE, kana mowia ka komi anu rapogumaa. 11 Tukimo atura-atura to kuwai ka komi eo eꞌi. Aku kana mompopalai tau to Amori, to Kanaan, to Het, to Feris, to Hewi bo to Yebus nggari tana to rakalau komi. 12 Neꞌe mowia pojanji ante pue ngata ri tana to rakalau komi etu ala neꞌe ira majadi ewa tandoko mombasoꞌo komi. 13 Tapi geromo petoꞌo mpesomba ira, geromo tinja watu nakarampua ira pade towomo tinja nipatinda ka Asyera. a 14 Neꞌe ntoto komi mepue ka pue-pue ntanina, sabana Aku, i PUE, majuꞌa raraku manggita etu. Aku niuli ‘To Najuꞌa Rara.’
15 Neꞌe mowia pojanji ante pue ngata to netoꞌo ri tana etu. Sabana tempo ira malau mepue ante manggeni pesomba ka pue-pue ira, ira kana mombagaga komi woꞌu, pade komi kana mantuki manggoni panggoni nipesomba ka pue-pue ntanina etu. 16 Ane ana-ana langgai komi momporongo ana-ana besi ira, ana-ana langgai komi etu kana rapadidi rongo ira etu mompalasi Aku pade mombasomba pue-pue to nisomba ira.
17 Neꞌe rapowia parantau rapepue komi nggari mpengele-ngele ase.
18 Tukimo Posusa Roti Daꞌa Nidika Ragi. Ewa to niparentaku ka komi bopia, komi kana manggoni roti daꞌa nidika ragi pitu eo kasaena riara wula Abib, sabana ri wula etu komi nesuwu nompalasi Tana Masir.
19 Pura-pura ngana langgai ulumbua bo binata-binata tuamana ulumbua nireke bagiaku. 20 Komi kana mombatolo ana keledai ulumbua ante mombawai saongu ana bimba manjaliku iꞌa. Ane komi daꞌa madota mombatolo iꞌa, tambolo nu keledai etu kana rakotosaka komi. Pura-pura ana langgai ulumbua kana ratolo komi.
Daꞌa ria sambaꞌa mamala mantingayo Aku ane daꞌa manggeni pesomba.
21 Naria loga ono eo komi mokarajaa, tapi ri eo kapapituna komi kana menonto mangosaraka, naupa mawela tempo motuja bara tempo mokato.
22 Tukimo Posusa Pokatob tempo komi mompamula mokato gando komi. Pade tuki woꞌumo Posusa Mompasiromu Asele Ntanac ri kaopu mpae tempo mompui wua-wua.
23 Tolunggani sampae pura-pura langgai kana marata mantingayo Aku, i PUE to Neliu Nggalanga, Alatala nto Israel. 24 Aku kana mompopalai nadea tau nggari tana kuwai ka komi, pade Aku kana mompakaluo tana rapetoꞌo komi. Pade tempo komi malau mantuki tolungele posusa etu daꞌa ntoto maria tau mabia mangago tana komi, nau aga sambaꞌa.
25 Tempo komi mombawai binata rasambale majadi pesomba, neꞌe rawai mpasanggani-nggani ante roti to nidika ragi. Neꞌe rapalamba panggoni Posusa Paska maboli sampe naile. Pura-pura kana rapakaopu wengi posusa etu.
26 Butu-butu mpae asele ntana komi pamulana kana rakeni rapesomba ri Sapo i PUE Alatala komi.
Neꞌe raporiapu bau ana bimba atau towau ante ue njusu indona.”
27 Pade nangulimo i PUE ka i Musa, “Tulisimo tesa-tesa eꞌi, sabana nantuki tesa etu Aku nowia pojanji ante iko bo tau-tau to Israel.” 28 Patampulu eo bo patampulu mbengina i Musa netoꞌo ri bulu etu nosanggani-nggani ante i PUE, pade daꞌa nanggoni bara nanginu. Ri setu iꞌa nantulisi tesa-tesa pojanji etu ri rongu watu to nitulisi, etumo Sampulu Parenta i PUE.
Musa notua nggari Bulu Sinai
29 Tempo i Musa notua nggari Bulu Sinai nanggeni rongu watu to nipotulisi Sampulu Parenta i PUE, lenjena nenggila sabana iꞌa notesa ante i PUE. Tapi daꞌa ninjani i Musa mboto lenjena nenggila iwetu. 30 Tempo i Harun bo pura-pura todea nanggita lenje i Musa nenggila, naekamo rara ira mompakamosu iꞌa. 31 Tapi i Musa nompokio ira, pade i Harun ante pura-pura topanggeniaka nto Israel nompakamosu iꞌa. Pade notesamo i Musa ka ira. 32 Naopu etu pura-pura tau to Israel nasiromu namosu iꞌa, pade iꞌa nompasimbayu pura-pura atura to niwai i PUE ka iꞌa ri bunggu Bulu Sinai.
33 Naopu notesa ante ira, i Musa nombasalibumbu lenjena. 34 Tapi butu nggani iꞌa nesua riara tenda mantingayo i PUE ala motesa ka Iꞌa nibukana posalibumbu etu sampe iꞌa nesuwu. Naopu nesuwu nipasimbayuna ka ira pura-pura tesa to niparenta i PUE ka iꞌa, 35 pade ira nanggita lenjena nenggila. Jadi nisalibumbuna woꞌumo lenjena sampe iꞌa nalau notesa woꞌu ante i PUE.