PUE nompakau to Israel mompalasi Bulu Sinai
33
Pade nangulimo i PUE ka i Musa, “Palasimo petoꞌo eꞌi pade kalaumo mosanggani-nggani ante todea to nikenimu nggari Tana Masir mpaka ri tana to nijanjiku ka Abraham, Ishak bo Yakub ante muli ira. 2 Aku kana mompakau malaekaku manggeniaka komi. Pade Aku kana mompopalai to Kanaan, to Amori, to Het, to Feris, to Hewi bo to Yebus nggari tana etu. 3 Kalaumo komi mpaka ri tana to naboya-boya bo nagana pura. Tapi Aku mboto daꞌa malau mpasanggani-nggani ante komi sabana komi tau-tau to nakoꞌo rara. Neꞌe-neꞌe kupakaropu komi ri tatongo jala!”4-5 Naopu etu i PUE nompakau i Musa manguli ka tau-tau to Israel iweꞌi: “Komi tau-tau to nakoꞌo rara. Ane kuporoa komi, nau aga sampalai, natantumo Aku kana mompakaropu komi. Jadi wonjumo pura-pura ramba komi ewa tandaina kasusa rara komi, pade Aku mompekiri mompakatantu nuapa masipato kupowia ante komi.” Nangepe tesa i PUE mangontiaka ira iwetu, nasusa mpuꞌumo rara ira, 6 pade niwonju iramo pura-pura ramba to nipake ira. Jadi naliu ira nompalasi Bulu Sinai,a to Israel mana nompake ramba-ramba.
Tenda raposintomu ante i PUE
7 Butu nggani to Israel notenda, i Musa nangala saongu tenda nipatakana nakawao sakedi nggari potenda ira. Tenda etu niulina “Tenda Posintomu” pade isema-sema madota mangginjani dota i PUE kana malau mpaka ri tenda etu. 8 Ane i Musa nalau mpaka ri tenda etu pura-pura todea kana nenggore ri pewobo tenda ira nanggita iꞌa nesua riara tenda etu. 9 Pade ane nesuapa i Musa, kana nanaꞌumo kulimu nolenje mpotinja netaꞌa ri pewobo tenda. Pade ri setu i PUE notesa ka i Musa. 10 Ane to Israel nanggita kulimu etu netaꞌa ri pewobo tenda etu, ira pura-pura notimbakotu sampe ri tana ri ngayo tenda ira sambaꞌa bo sambaꞌa ala mombasomba i PUE. 11 PUE notesa nosintingayo ante i Musa nasimbayu ewa tau nosimpotesa ante roana. Pade naopu etu i Musa kana nanjili mpaka ri potenda todea. Tapi Yosua ana i Nun sambaꞌa langgai to namuda to najadi topantulungi i Musa batena naroo ri tenda posintomu etu.
PUE nojanji manggalendu todeana
12 Nangulimo i Musa ka i PUE, “Komi nompakau aku manggeni todea eꞌi mpaka ri tana to nijanjimu. Tapi daꞌapa niulimu isema mupakau mantulungi aku. Niulimu Komi nosinjani ante aku pade nikonoa raramu. 13 Ane aku nikonoa raramu, kuperapi patuduki ka aku jalamu, PUE, ala aku mpuꞌu-mpuꞌu mosinjani ante Komi, pade batena mukonoa rara. Pade tora woꞌumo todea eꞌi nipelisimu majadi todeamu.”
14 Nangulimo i PUE, “Aku mboto kana manggeniaka komi pade mompakasana rara komi.”
15 Nesonomo i Musa, “Ane Komi daꞌa manggeniaka kami neꞌe rapakau kami mompalasi petoꞌo eꞌi. 16 Iwenu tau mangginjani aku bo todeamu eꞌi nikonoa raramu ane Komi daꞌa malau mpasanggani-nggani ante kami? Natantumo kariamu ri tatongo kami to nompoposisala kami ante tau-tau ntanina ri dunia eꞌi.”
17 Nangulimo i PUE ka i Musa, “Pomperapimu etu kana kupoiyo sabana iko niposinjaniku bo nikonoa raraku.”
18 Pade nerapimo i Musa, “PUE, tulungi popokita ka akumo kuasa bo kagayamu.”
19 Nesonomo i PUE, “Aku moliu ri ngayomu ante pura-pura kabeloku, pade Aku mompatolele sangaku, i PUE, ala muepe. Aku kana mompopokita kabelo raraku bo asi mataku ka isema-sema kupodota. 20 Tapi lenjeku daꞌa kupopokita ka iko, sabana isema-sema manggita lenjeku kana mamate.”