Ana Japi bulawa
Ul. 9:6-29
32
Tempo tau-tau to Israel nanggita nasae gagamo i Musa daꞌapa notua nggari bulu, naratamo ira nantatiku i Harun pade nanguli ka iꞌa, “Daꞌa ninjani kami nuapa to najadi ante i Musa to nanggeni kami nesuwu nggari Tana Masir. Jadi powia ka kamimo sanu to mamala rapepue ala manggeniaka kami.”2 Nangepe tesa etu nangulimo i Harun ka ira, “Wonjumo nganti-nganti bulawa to nipake rongo-rongo bo ana-ana komi, pade kenimo ka aku.” 3 Jadi niwonju iramo nganti-nganti bulawa nikeni ka i Harun. 4 Etu pura-pura niala i Harun pade nigonuna ante apu, pade nitolina bulawa to naue etu riara sangele potepena. Naopu etu nipaꞌana majadi parantau nolenje mpoana japi pomawa. Nanggita etu nangulimo tau-tau to Israel, “To Israel! Eꞌimo pueta to nanggeni kita nesuwu nggari Tana Masir!”
5 Tempo i Harun nanggita etu nipowianamo saongu petoꞌo mpesomba ri ngayo parantau ana japi etu pade niulina, “Naile kana maria posusa mombabila i PUE.” 6 Jadi naile mpadondona nembangumo todea nalau nanggeni pesomba rapalabu bo pewai ntanina majadi pesomba posinggabelo. Nekatokomo ira ri setu nanggoni bo nanginu mpebasa nadamba-damba, pade nekanggoremo ira nogau sala.
7 Naopu etu nangulimo i PUE ka i Musa, “Potuamo masalisa, sabana todeamu to nikenimu nesuwu nggari Tana Masir nowia to najaꞌana. 8 Nasalisa mpuꞌu ira nombaliunaka parentaku. Nipowia ira parantau nolenje mpoana japi nggari bulawa nigonu, pade notimbakotumo ira nombasomba bo nanggeni pesomba ka parantau etu. Niuli ira, ‘To Israel! Eꞌimo pue to nanggeni kita nesuwu nggari Tana Masir!’
9 Ninjaniku tau-tau etu mpuꞌu-mpuꞌu nakoꞌo rara. 10 Neꞌe mompasimbuku mombalawa Aku. Narau mpuꞌumo raraku ri jaꞌi ira sampe Aku madota mompakaropu ira. Tapi iko bo mulimu kana kupajadi saongu ngata bete.”
11 Tapi nangulimo i Musa ka i PUE Alatala, “O, PUE, neꞌe marau ri jaꞌi todeamu etu! Komimo to nompakasalama ira nggari Tana Masir ante kuasa bo karosomu to nabetena! 12 Ane Komi mompakaropu ira, tau-tau to Masir kana manguli Komi aga nanggeni todea etu nesuwu nggari ri Tana Masir ala rapatesi Komi ri bagia buluna sampe maropu ira nggari dunia eꞌi! Neꞌe rapowia iwetu, PUE! Agina rabalimo niamu etu pade neꞌe mompakajaꞌa todeamu etu. 13 Toramo batuamu Abraham, Ishak bo Yakub. Toramo pojanjimu ka ira to niulimu ka ira ante nojanji iweꞌi: ‘Aku kana mompakadea-dea mulimu nasimbayu ewa betuꞌe ri langi, pade njumaongu tana to nijanjiku eꞌi kuwai ka ira majadi tana ira mboto sampe ri kasae-saena.’ ” 14 Jadi nangepe etu nabalimo nia i PUE. Daꞌa najadi Iꞌa nompakaropu todea Israel ewa to niulina paneꞌa.
15 Naopu etu notuamo i Musa nggari bulu etu nanggeni rongu watu to nitulisi ntimali-mali ante parenta Alatala. 16 Watu etu nipowia pade nitulisi Alatala mbotomo.
17 Tempo i Musa danotua, roana Yosua to nomporoa iꞌa pangane nangepe tau-tau to Israel nongare-ngare. Jadi nangulimo iꞌa ka i Musa, “Naria kakanano posibali nggari petoꞌo potenda ria!”
18 Tapi nangulimo i Musa, “To niepeku daꞌa pongare padagi bara pongare tau nidagi. To niepeku wamba ntopodade!”
19 Sangga namosumo i Musa ri petoꞌo potenda nto Israel nikitana parantau nolenje mpoana japi ante tau dea nojoge-joge ri setu. Nanggita etu narau mpuꞌumo rarana sampe nitajiakana rongu watu to nitulisi etu ri kente nu bulu sampe narege. 20 Pade nialana parantau ana japi to nipowia ira nigonuna pade nipombayuna mpakaoya, pade nikamburakana ri ue. Naopu etu nipakaunamo tau-tau to Israel manginu ue etu.
21 Pade nangulimo iꞌa ka i Harun, “Nuapa to nipowia ira ka iko sampe iko nompalamba ira nowia silaka to najaꞌa etu?”
22 Nesonomo i Harun, “Neꞌe marau, Tua. Ninjani komi mbotomo iwenu todea eꞌi batena nasadia mowia to najaꞌa. 23 Ira nanguli ka aku iweꞌi: ‘Daꞌa ninjani kami nuapa to najadi ante i Musa etu to nanggeni kami nesuwu nggari Tana Masir. Jadi powia ka kamimo pue to mamala manggeniaka kami.’ 24 Jadi aku nompakau ira, ‘Isema-sema naria ramba-ramba bulawa kana rawonjuna rawai ka aku.’ Pade etu nipowia ira. Pura-pura ramba etu nitajiakaku riara apu, pade nesuwumo ana japi eꞌi!”
25 Nikita i Musa i Harun nompalamba tau-tau to Israel najadi ewa jara nakabasaka nggariara wala, sampe ira masipato rapongei-ngei nu bali ira. 26 Jadi nenggoremo iꞌa ri jala mpesua mpaka ri petoꞌo potenda etu pade nongare, “Isema mosabingga ka i PUE kana momai ri seꞌi!” Nangepe etu naratamo pura-pura muli i Lewi nantatiku i Musa. 27 Pade nangulimo iꞌa ka ira, “I PUE, Alatala nto Israel nomparenta komi mangala gumamu pade malau mompesayo pura-pura petoꞌo potenda eꞌi, nggari sabingga eꞌi sampe ri pantaꞌana guria, pade mompatesi sampesuwu-sampesuwu bo roa-roa komi!”
28 Muli-muli i Lewi etu nantuki parenta i Musa, pade eo etu kira-kira tolunjobu mbaꞌa tau namate nipatesi ira. 29 Naopu etu nangulimo i Musa ka muli i Lewi etu, “Eo eꞌi komi nipatani ka i PUE, sabana komi nasadia mompatesi ana-ana bo sampesuwu-sampesuwu komi mboto! Sabana etu komi niwai PUE ka rasi eo eꞌi!”
30 To naile mpadondona nangulimo i Musa ka tau dea, “Komi nowia silaka bete! Tapi weꞌi-weꞌi aku mantende bulu mpaka ri jaꞌi PUE. Bara aku mamala merapi ala i PUE mombaampungi komi.”
31 Jadi nanjilimo i Musa mantingayo i PUE pade niulina, “Todea etu nowia silaka to nabetena! Nipowia ira pue ntanina nggari bulawa! 32 Tapi kuperapi ala Komi mombaampungi silaka ira. Ane daꞌa, pakalipomo sangaku nggari buku nipotulisimu sanga ntodeamu.”
33 Nesonomo i PUE, “Aga tau to nowia silaka ri jaꞌiku to rapakalipo sangana nggari buku etu. 34 Kalaumo iko weꞌi-weꞌi manggeni ira mpaka ri petoꞌo to niuliku ka iko bopia. Malaekaku kana mokolu ka komi. Tapi kana marata tempona ira kusuku sabana silaka-silaka ira.”
35 Naliu etu i PUE nompakajuꞌa todea etu ante juꞌa to najaꞌa mpuꞌu, sabana ira nompasuꞌu i Harun nowia parantau ana japi bulawa etu.