Bezaleel bo Aholiab nipelisi i PUE mowia Tenda Mpepue ante parewana
Kel. 35:30-36:1
31
Pade nangulimo i PUE ka i Musa, 2 “Nipelisikumo i Bezaleel ana Uri, makumpu i Hur nggari muli Yehuda, 3 pade niwaikumo ka iꞌa Nosa Nagasaku. Niwaikumo ka iꞌa pangginjani, pompakule bo kapandena riara mpengele-ngele pokarajaa. 4 Nataꞌumo iꞌa mowia nia bo mompowia parewa-parewa nggari bulawa, salaka bo tambaga. 5 Nataꞌu iꞌa nosampu watu losa rapasua ri sinji, pade nataꞌu woꞌu iꞌa norandu kayu bo mpengaya kapande ntanina. 6 Pade nipelisiku woꞌu Aholiab, ana Ahisamakh nggari muli i Dan ala iꞌa mamala mantulungi i Bezaleel. Pade niwaikumo kapande ka butu mbaꞌa tau napande ala ira mamala mompowia pura-pura nuapa to niparentaku ka iko: 7 etumo, Tenda Mpepue, Peti Pojanji bo tutuna, bo pura-pura parewa riara tenda etu. 8 Etumo, meja ante parewana, kada mpoindo bulawa to daꞌa ria galona ante pura-pura parewana, meja mpotunju dupa, 9 meja petoꞌo mpesomba rapalabu ante parewa-parewana, dula ante kadana rapombarama topanggeni agama, 10 pakea mpepue ka i Harun ntaliana to rapake ira tempo ira mantui bago manggeni pesomba ka Aku, 11 minya ada bo dupa nawongi ka Petoꞌo Nagasa. Etu pura-pura kana rapowia ira mantuki jonjo to niparentaku ka iko.”Atura-atura ri Eo Mpenonto
12 Pade nangulimo i PUE ka i Musa, 13 “Ulimo ka tau-tau to Israel iweꞌi: ‘Toramo eo-eo mpenonto to nipakatantuku. Sabana eo etu kana majadi tandaina mompakanoto ka komi naria pojanjiku ante komi bo muli-mulimu ala ranjani komi Akumo i PUE to nompakagasa komi.
14 Komi kana mantora eo etu sabana etumo eo to nagasa ka komi. Isema-sema manjapuaka eo etu kana rasuku mamate. Isema-sema mokarajaa ri eo etu kana rapakaropu nggari tatongo komi. 15 Niwaiku ka komi ono eo mokarajaa, tapi eo kapapituna eo mpenonto to nireke nagasa riara mpanggitaku. Isema-sema mokarajaa ri eo mpenonto etu kana rapatesi. 16 Tau-tau to Israel sampe muli-muli ira kana mantora eo etu ewa popatora pojanjiku ante ira sampe ri kasae-saena. 17 Eo etu kana majadi popatora pojanji to nipowiaku ante tau-tau to Israel sampe ri kasae-saena. Sabana riara tempo ono eo Aku nompajadi langi bo dunia, pade ri eo kapapituna nenontomo Aku ala mangosaraka.’ ”
18 Naopupa i PUE notesa ante i Musa ri bunggu Bulu Sinai iwetu, niwaina ka iꞌa rongu watu to nitulisi noisi parenta-parentana to nitulisi Alatala mboto.