Meja mpotunju dupa
Kel. 37:25-28
30
Nanguli woꞌumo i PUE ka i Musa, “Kawiamo saongu meja nggari kayu akasia rapotunju dupa. 2 Meja etu kana mosulapa, kandatena bo karembana 45 senti bo kalangana 90 senti. Ri sokina patanjoki kana rapowia tandu to majadi saongu ante meja etu. 3 Bungguna pade wiwina patanjulapa etu ante tandu-tanduna kana ralapi bulawa to daꞌa ria galona pade ralili bulawa ri wiwina ntiku-ntiku. 4 Powia rongu gala bulawa ri wayo nu wiwina ntimali-malina raposuaraka kayu pokowa. 5 Kayu pokowa etu kana rapowia nggari kayu akasia pade ralapi ante bulawa. 6 Dikamo meja mpotunju dupa etu ri sawaliku kae powombo to naria ri ngayo Peti Pojanji, etumo ri ngayo tutu nu Peti Pojanji etu. Ri setu Aku kana mosintomu ante iko.7 Mpadondo-mpadondona tempo i Harun marata mompakasadia poindo iꞌa kana mombatunju dupa nawongi ri bunggu nu meja mpotunju dupa etu. 8 Etu kana rapowiana woꞌu tempo iꞌa mombatunju poindo ngguwiana ala batena maria pesomba dupa etu ratunju ri ngayoku sampe ri muli-mulina. 9 Neꞌe manggeni dupa ntanina rapotunju ri bunggu meja etu, pade neꞌe manggeni binata rapalabu bara pesomba panggoni, pade neꞌe mombatoli ue anggur ri bunggu meja etu. 10 Sanggani sampae i Harun kana mompowia ada pompakagasa meja etu ante mombakamburoi tandu-tandu patanjulapa nu meja etu ante lei binata to nipesomba mombasompo silaka. Etu kana rapowia butu-butu mpae sampe ri kasae-saena. Njumaongu meja mpotunju dupa etu nagasa mpuꞌu riara mpanggitaku.”
Doi pantolo tempo popabila to Israel
11 Pade nangulimo i PUE ka i Musa, 12 “Tempo mowia popabila to Israel, butu-butu mbaꞌa langgai kana mombayari doi pantolo korona ka Aku ala iꞌa neꞌe mawela kasusa tempo popabila etu rapowia. 13 Pura-pura tau to nireke riara popabila etu kana mombayari doi pantolo. Pade doi etu majadi pewai ka Aku. Kadeana kira-kira 6 gram salaka nantuki potimba to nipake ri Tenda Mpepue. 14 Pura-pura tau to rareke riara popabila etu kana mombawai pewai etu ka Aku, etumo butu-butu mbaꞌa langgai noumuru rompulu mpae labi. 15 Tau nakalumana daꞌa mamala mombayari melabi, pade tau nakasiasi daꞌa mamala mombayari makura tempo ira mombayari doi pantolo koro ira etu ka Aku. 16 Doi etu kana raala nggari jaꞌi ntau to Israel pade rapake rapangoli nuapa-nuapa niparaluu mepue ka Aku riara Tenda Mpepue. Doi etu doi pantolo koro to Israel pade Aku kana mantora bo manjaliku ira.”
Dula palangga rapombarama
17 Pade nangulimo i PUE ka i Musa, 18 “Kawiamo saongu dula ante kadana nggari tambaga. Bolimo dula etu ri olo Tenda Mpepue bo meja mpesomba, pade isimo ante ue. 19 Ue etu kana rapake i Harun ntaliana rapombarama pale bo kada ira 20-21 daꞌapa ira mesua riara Tenda Mpepue bara mompakamosu meja mpesomba manggeni pesomba rapalabu ka Aku. Ira kana mombarama pale bo kada ira ala daꞌa mamate. Atura etu kana ratuki ira bo muli-muli ira sampe ri kasae-saena.”
Minya ada
22 Pade nanguli woꞌumo i PUE ka i Musa, 23 “Alamo rampa-rampa to neliu nggabelona, 6 kilo minya wongi nosanga ka mur, 3 kilo kanino, 3 kilo towu nawongi, 24 6 kilo kayu teja. Pura-pura ratimba nantuki potimba to nipake ri Tenda Mpepue. Tambai woꞌu 4 lite lana zaitun 25 pade kawiamo minya ada rapombalana, powia topande mowia minya wongi. Etu kana majadi sangele minya ada to nagasana. 26 Pakemo galona etu mombalana Tenda Mpepue, Peti Pojanji, 27 meja rapomboli roti pesomba ante pura-pura parewana, kada mpoindo ante parewana, meja mpotunju dupa, 28 meja petoꞌo mpesomba rapalabu ante parewana, dula ante kadana. 29 Ante mombalana parewa-parewa etu batuana iko mompatani parewa etu ka Aku, ala pura-pura etu majadi magasa mpuꞌu riara mpanggitaku. Nuapa-nuapa mawela parewa etu kana majadi magasa.
30 Harun ntaliana woꞌu kana ralana ante minya etu ala ira rapatani majadi topanggeni agama mobago ka Aku. 31 Ulimo ka tau-tau to Israel iweꞌi: ‘Minya ada etu nipatani ka Aku sampe ri kasae-saena. 32 Neꞌe mombajunju minya etu ka tau-tau biasa. Pade neꞌe woꞌu mowia minya ntanina ante mompake galona etu. Minya etu nagasa riara mpanggitaku, pade kana rareke sangele nagasa mpuꞌu. 33 Isema-sema mowia minya ewa etu atau mombajunju minya etu ka tau daꞌa topanggeni agama, mana rareke todeaku.’ ”
Dupa
34 Pade nangulimo i PUE ka i Musa, “Alamo bara sakuya ngele rampa-rampa, pura-pura nasimbayu kadeana, etumo pulu nu dama, kuli nggari sangele kalumbe nosanga ka ‘lokan,’ pulu nggari kayu ‘rasamala’ to nawongi mpuꞌu, bo dupa nawongi. 35 Pakemo pura-pura etu mowia galo nu dupa nawongi powia topande mowia minya wongi. Tambai woꞌu gara ala dupa etu daꞌa mabali, sangele to nagasa riara mpanggitaku. 36 Sabagia nggari dupa etu kana rapombayu mpakalusu, pade ratuꞌu ri ngayo Peti Pojanji riara Tenda Mpepue petoꞌo kuposintomu ante komi. Dupa etu kana rareke komi anu nagasa mpuꞌu to nipatani ka Aku. 37 Neꞌe mowia dupa nasimbayu ewa etu ka komi mboto. Dupa etu kana rareke nagasa to nipatani ka Aku. 38 Isema-sema mowia dupa etu ala rapakena mboto mana rareke todeaku.”