Atura-atura mombalanti Harun ntaliana majadi topanggeni agama
Im. 8:1-36
29
Pade nangulimo i PUE ka i Musa, “Iweꞌimo akala mompatani i Harun ntaliana ala ira mamala mantui bago manggeni pesomba ka Aku. Alamo saongu japi tuamana to danamuda bo rongu bimba tuamana to nadoli. 2 Pade nggari sowu gando to neliu nggabelona powiamo roti daꞌa nidika ragi, roti kue to nipowia ante lana zaitun, bo roti nanipi nirere lana zaitun. 3 Roti etu kana radika riara tonda pade rakeni rapesomba ka Aku nosanggani-nggani ante japi bo rongu bimba etu.4 Maopu etu kenimo i Harun ntaliana mpaka ri pewobo Tenda Mpepue pade diumo ira ri setu ante ue. 5 Popasua pakea mpepue ka i Harun; etumo kameja, baju efod, baju ndoe riara nu baju efod, tutu bombara bo pompoꞌu kope. 6 Dikamo songgo ri balenggana pade patakamo ramba bulawa to niuki “Nagasa riara mpanggita i PUE.” 7 Pade alamo minya ada ratoli ri balengga i Harun mombalanti iꞌa majadi topanggeni agama. 8 Maopu etu pakaumo ana-anana momai pade popasua ka ira kameja-kameja 9 bo pompoꞌu kope, pade dika songgo ri balengga ira. Iwetumo akala mombalanti i Harun ntaliana majadi topanggeni agama. Etumo katantuna to malaku sampe ri kasae-saena.
10 Maliu etu kenimo japi tuamana etu ri ngayo Tenda Mpepue, pade i Harun ntaliana kana mombadika pale ira ri balengga japi etu. 11 Maopu etu sambalemo japi etu ri ngayoku, ri pewobo Tenda Mpepue. 12 Alamo sabagia nggari lei japi etu pade reremo ka tandu-tandu meja mpesomba. Pade labi lei etu kana ratoli ri kele nu meja mpesomba etu. 13 Maopu etu alamo lomu to nombabungu taꞌina, kuli nu atena bo rongu wua kopena ante lomuna pade palabumo etu ri bunggu meja mpesomba. 14 Aga bau, kuli bo taꞌi nu japi etu kana rapalabu ri sawaliku potenda nto Israel. Etumo pesomba mombasompo silaka ntau to nionggotaka majadi topanggeni agama etu.
15 Maliu etu alamo saongu bimba tuamana, pade pakaumo i Harun ntaliana mombadika pale ira ri balengga bimba etu. 16 Sambalemo binata etu pade alamo leina rajunju ri meja mpesomba patanjulapa. 17 Pade bimba etu kana ratompo, pade isi rarana bo paꞌana kana ratapasi pade raboli mpasanggani-nggani ante balenggana bo nuapa to nitompo etu. 18 Maopu etu palabumo njumaongu bimba etu ri bunggu meja mpesomba majadi pesomba rapalabu ka Aku. Soa nu pesomba rapalabu etu kana mompakadamba raraku.
19 Pade ala woꞌumo bimba tuamana ntanina etu, pade pakaumo i Harun ntaliana mombadika pale ira ri balengga bimba etu. 20 Sambalemo binata etu pade ala sabagia nggari leina etu rarere ka talinga nggana i Harun ntaliana, ri katumpu pale nggana ira, bo ri katumpu kada nggana ira. Labi nu lei etu kana rajunju ka patanjulapa wiwi meja mpesomba. 21 Pade alamo sakedi lei nggari bunggu meja mpesomba bo sakedi minya ada rakamburoi ka i Harun ntaliana ante pakea ira. Ante rapowia iwetu, i Harun bo ana-anana ante pakea ira kana rapatani ka Aku.
22 Pade alamo lomu nggari bimba tuamana etu ante lelona nalomu, lomu to nombabungu taꞌina, kuli nu atena, rongu wua kope ante lomuna bo timpu ngganana. Etumo bimba tuamana rapombalanti topanggeni agama. 23 Nggari tonda niisi roti daꞌa nidika ragi to nipesomba ka Aku alamo saongu roti, bo saongu roti kue to nipowia ante lana zaitun, bo saongu roti nanipi to nirere lana. 24 Dikamo pura-pura panggoni etu riara mpale i Harun ntaliana pade pakaumo ira mangonggotaka pade mompopokita etu ka Aku majadi pesomba. 25 Maopu etu alamo panggoni etu nggari jaꞌi ira pade palabumo ri bunggu meja mpesomba ri bunggu pesomba to nipalabu ri setu paneꞌa. Soa pesomba etu kana mompakadamba raraku. 26 Alamo bangasu nu bimba tuamana to nipake mombalanti Harun etu pade onggotakamo rapopokita ka Aku majadi pesomba. Etumo bagiamu.
27 Riara ada mombalanti Harun ntaliana majadi topanggeni agama, bangasu bo paꞌa nu bimba to nipake tempo ada etu kana rapatani ka topanggeni agama majadi bagia ira. 28 Etumo kabotuku to daꞌa mamala rabali. Tempo todeaku marata manggeni pesomba posinggabelo ira, bangasu bo paꞌa nu bimba etu bagia i Harun ntalianana. Etumo pewai nto Israel ka Aku nggari pesomba posinggabelo ira.
29 Pakea mpepue i Harun kana rapasumulina ala mulina woꞌu mamala mompake pakea etu tempo ira ratoli ka minya ada bo ralanti majadi topanggeni agama. 30 Ana i Harun to manjambei umana majadi topanggeni agama to mesua ri Tenda Mpepue mantui bagona riara Petoꞌo Nagasa kana mompake pakea etu pitu eo kasaena.
31 Alamo bau bimba tuamana to nipake tempo pombalanti i Harun ntaliana pade poriapumo ri petoꞌo to nireke nagasa riara mpanggitaku. 32 Bau etu kana rakoni i Harun ntaliana ri pewobo Tenda Mpepue nosanggani-nggani ante labi roti riara tonda. 33 Ira kana manggoni panggoni etu pura-pura to nipake mombasompo silaka tempo ira nilanti bo nipatani majadi topanggeni agama. Aga topanggeni agama to mamala manggoni panggoni etu, neꞌe tau ntanina, sabana panggoni etu nagasa riara mpanggitaku. 34 Ane maria bau bara roti etu naboli sampe mpandondona, labina etu kana rapalabu mpakaopu. Daꞌa mamala rakoni, sabana panggoni etu nireke nagasa.
35 Ada mombalanti i Harun ntaliana etu kana rapowia pitu eo kasaena nantuki to niparentaku ka iko. 36 Eo-eo saongu japi pomawa kana rapesomba majadi pesomba mombasompo silaka. Ante pesomba etu meja mpesomba rapakagasa. Pade meja etu kana ralana ante lana zaitun ala rapatani ka Aku. 37 Powiamo ada iwetu pitu eo kasaena mompatani meja etu ka Aku ala majadi magasa mpuꞌu riara mpanggitaku. Nuapa-nuapa mawela meja mpesomba etu rareke magasa.”
Pesomba eo-eo
Bil. 28:1-8
38 “Eo-eo ri bunggu meja mpesomba etu kana rapesomba rongu ana bimba noumuru sampae. 39 Saongu kana rapesomba tempo mpandondona pade saongu tempo ngguwiana. 40 Mosanggani ante ana bimba to rapesomba mpandondona kana rapesomba woꞌu rolite sowu gando to nabelona ntoto ragalo ante salite lana zaitun. Pade toli woꞌu salite ue anggur ri meja mpesomba etu majadi pesomba panginu. 41 Ana bimba to rapesomba ngguwiana kana rapesomba ante akala masimbayu, mosanggani-nggani ante sowu gando nigalo lana zaitun, bo ue anggur. Soa nu pesomba to rapalabu etu kana mompakadamba raraku. 42 Pesomba rapalabu etu kana rapesomba eo-eo ri ngayoku namosu pewobo Tenda Mpepue sampe ri kasae-saena. Ri setumo Aku kana mosintomu ante komi pade motesa ka komi. 43 Pade Aku kana mosintomu woꞌu ante tau-tau to Israel, pade petoꞌo etu kana majadi magasa nggari kuasa bo remeku to maria ri setu.
44 Aku kana mompakagasa Tenda Mpepue bo meja mpesomba, pade i Harun ntaliana kana kupatani majadi topanggeni agama mobago ka Aku. 45 Aku kana metoꞌo ri tatongo ntau to Israel pade Aku kana majadi Alatala ira. 46 Pade ira kana mangginjani Akumo, i PUE Alatala to nanggeni ira nesuwu nggari Tana Masir ala Aku mamala metoꞌo ri tatongo ira. Akumo i PUE Alatala ira!”