Pakea ntopanggeni agama
Kel. 39:1-7
28
“Pokiomo tuakamu i Harun bo ana-anana i Nadab, Abihu, Eleazar bo Itamar, pade patanimo ira majadi topanggeni agama. 2 Powiamo pakea topanggeni agama ka i Harun ala iꞌa magaya rakita ntodea pade rabila ira. 3 Pokio puramo tau-tau topande mojau to niwaiku ka pompakule. Pakaumo ira mowia pakea ka i Harun ala iꞌa mamala rapatani mobago ka Aku, etumo majadi topanggeni agama. 4 Iweꞌimo pakea to rapowia ira: tutu bombara, baju “efod,” baju ndoe, kameja to nisuji, songgo bo pompoꞌu kope. Pakea ntopanggeni agama etu kana rapowia ira ka tuakamu i Harun bo ana-anana ala ira mamala mobago ka Aku ewa topanggeni agama. 5 Pakea etu kana rapowia nggari bana naramata, nakamumu bo nalei, bana bulawa bo kae linen nalusu.”Baju efod
6 “Baju efod woꞌu kana rapowia nggari kae linen nalusu to niwera ante bana bulawa, naramata, nakamumu bo nalei, etumo powia ntau mpuꞌu-mpuꞌu napande. 7 Kana maria rongu lui pompoꞌu ri winga nijau ri wiwi baju efod ntimali-mali ala mamala raposiumpu. 8 Pade pompoꞌu kope kana rapowia nggari kae to nasimbayu ante baju efod, etumo kae linen nalusu to niwera ante bana bulawa, naramata, nakamumu bo nalei, pade rajau ri baju efod ala majadi saongu.
9-10 Alamo rongu watu ake pade elo woꞌu sambaꞌa topande bulawa mombauki sanga ana Israel sampulu rombaꞌa ri watu etu nantuki sunjuna, simbau aono sanga ri saongu watu. 11 Sanga etu kana rauki ri watu etu nasimbayu ewa tau mowia stempel. Pade watu etu kana rapataka riara wiwi bulawa to nirandu mpakagaya. 12 Pade watu etu kana rapataka ri lui winga nu baju efod majadi tandai popatora ka muli sampulu rombaꞌa ana Israel. Ante iwetu i Harun kana manggeni sanga-sanga nto Israel ri ngayo i PUE majadi tandai popatora. 13-14 Ntanina nggari wiwi bulawa etu, kana rakawia woꞌu rongu rante nggari bulawa daꞌa ria galona to nikaloro ewa lui pade rapataka ri wiwi bulawa etu.”
Tutu bombara
Kel. 39:8-21
15 “Powiamo tutu bombara ka topanggeni agama ala rapakena tempo iꞌa madota mangginjani dota i PUE. Powiamo etu nasimbayu ante baju efod ante kae linen to nalusu bo bana bulawa bo bana naramata, nakamumu bo nalei. 16 Lenjena nosulapa ratilu rontilu, kandatena bo rembana simbau 22 senti. 17 Ri tutu bombara etu kana rapataka patanjala watu sinji to nasulina. Ri jala pamulana watu delima, watu krisolit bo watu baiduri sepah. 18 Ri jala karonjalana watu zamrud, watu nilam bo watu intan. 19 Ri jala katolunjalana watu lazuardi, watu akik bo watu kecubung. 20 Ri jala kapatanjalana watu beril, watu yakut, bo watu ratna cempaka. Ane watu sampulu rongu etu, wiwina kana ralili bulawa nirandu. a 21 Kana maria sampulu rongu watu etu rapombatora sampulu rombaꞌa ana Israel. Ri butu-butu watu etu kana rauki saongu sanga nggari sampulu rombaꞌa ana Israel ewa tau mowia stempel.
22 Powiamo ka tutu bombara etu rompenga rante bulawa daꞌa ria galona to nikaloro. 23 Pade powia woꞌu rongu gala bulawa rapataka ri rowuntu ri baꞌa nu tutu bombara etu, 24 pade suaraka rompenga rante bulawa etu riara nu gala etu. 25 Wuntu rante ntanina etu kana rapataka ri rongu wiwi bulawa to nirandu, ala tutu bombara etu namala raposiumpu ante bagia ngayo nu baju efod. 26 Powia woꞌumo rongu gala bulawa rapataka ri wuntu kele tutu bombara etu riarana sampe mosirata ka baju efod. 27 Naopu etu powia woꞌu rongu gala bulawa ntanina rapataka ri bagia ngayo lui winga nu baju efod ntimali, namosu ri posiumpu mpojauna kelena ri sabingga baꞌana pompoꞌu kope. 28 Gala-gala nu tutu bombara etu kana raposiumpu ante lui naramata ri gala baju efod ala tutu bombara etu batena ri baꞌa pompoꞌu kope pade daꞌa montoya.
29 Tempo i Harun mesua ri Petoꞌo to Nagasa iꞌa kana manggeni sanga-sanga ana Israel to niuki ri tutu bombarana etu ala Aku, i PUE, batena mantora todeaku. 30 Pade bolimo Urim bo Tumimb riara tutu bombara etu ala rapake i Harun ane iꞌa mantingayo Aku. Ante iwetu i Harun batena manggeni parewa to mamala rapakena mangginjani dotaku ka todea Israel.”
Pakea ntanina ka topanggeni agama
Kel. 39:22-31
31 “Baju ndoe to nipake riara nu baju efod kana rapowia pura nggari kae naramata. 32 Tambolo baju kana ri tatongona, pade wiwina kana rapakaroso ante lele to nitanu ala daꞌa maseri. 33 Ri wayo nu baju ndoe etu kana rapataka ramba nolenje mpowua delima to nipowia nggari bana naramata, nakamumu bo nalei. Pade powia woꞌu banggula bulawa nggedi rapompataka ri olo ramba wua delima etu 34 sampe banggula-banggula etu raposiolo-olo ante ramba wua delima ri wayo nu baju etu. 35 Baju etu kana rapake i Harun tempo iꞌa mantui bagona ewa topanggeni agama. Tempo iꞌa mesua mantingayo Aku ri Petoꞌo Nagasa bara mesuwu nggari setu moni nu banggula etu kana raepe, ala iꞌa daꞌa mamate.
36 Powiamo sangele ramba nggari bulawa to daꞌa ria galona, pade tulisimo ri setu, “Nagasa riara mpanggita i PUE.” 37 Patakamo ramba etu ri songgo bagia koluna ante lui naramata. 38 Ante iwetu ramba etu kana ri kire i Harun, tandaina iꞌa mbotomo to mombatanggu kasala ntodea Israel ane ira nowia sala tempo manggeni pesomba ira ka Aku. Ramba etu kana tunggai nipake i Harun ala pesomba to rakeni ntodea kana kukonoa rara.
39 Kana ratanu woꞌu kameja to nisuji bo songgo i Harun nggari kae linen nalusu pade pompoꞌu kope kana rasuji. 40 Powiamo kameja, pompoꞌu kope bo songgo ka ana-ana i Harun ala ira magaya rakita ntodea bo rabila ira. 41 Ane nasadia pasuamo pakea etu ka tuakamu i Harun bo ana-anana, pade tolimo lana zaitun ri balengga ira. Ante iwetu ira kana ralanti pade rapatani mantui bago manggeni pesomba ka Aku.
42 Powia woꞌu poruka mbuku ka ira nggari kae linen to nalusu, kandatena nggari kope sampe ri timpu ala mombatutu bagia koro anu daꞌa masipato rakita. 43 Poruka etu kana rapake Harun ntaliana tempo mesua ri Tenda Mpepue atau mompakamosu Meja Mpesomba manggeni pesomba ri Petoꞌo Nagasa, ala neꞌe ira mamate sabana natekita bagia koro anu daꞌa masipato rakita. Atura etu kana malaku ka i Harun bo muli-mulina sampe ri kasae-saena.”