Meja mpesomba
Kel. 38:1-7
27
“Kawiamo saongu meja mpesomba nggari kayu akasia. Lenjena mosulapa, kandatena bo karembana 2,2 metere pade kalangana 1,3 metere. 2 Ri soki-sokina baꞌana kana rapowia tandu-tandu to majadi saongu ante meja etu. Njumaongu meja mpesomba etu kana ralapi ante tambaga. 3 Powiamo pomboli sowu, sero, loya-loya, garpu bo petoꞌo pomboli apu. Etu pura-pura kana rapowia nggari tambaga. 4 Pade kawia woꞌumo kaoa tambaga nisua pade patakamo pataongu gala tambaga ri soki patanjoki. 5 Kaoa etu kana radika ri wayo wiwi nu meja mpesomba etu ala kalangana santongo kalanga nu meja etu. 6 Pade kawia woꞌumo kayu pokowa meja mpesomba nggari kayu akasia nilapi tambaga. 7 Kayu etu rasuaraka riara gala-gala ntimali-mali tempo mombakowa meja mpesomba etu. 8 Kawiamo meja etu nggari dopi nitombi nantuki jonjo to nipopokita ka iko ri bunggu bulu.”Lalowo nu Tenda Mpepue
Kel. 38:9-20
9 “Kawiamo lalowo ri ntiku-ntiku tenda etu to niwala powombo nipowia nggari kae linen to nalusu. Ri bagia puluna kandatena kana 44 metere, 10 nitande rompulu tinja tambaga, simbau ante polampi tambaga bo pekaꞌina bo polondona nipowia nggari salaka. 11 Powia woꞌumo iwetu ri bagia tasina.
12 Ri bagia kasolona kandatena kana 22 metere ante powombona bo sampulu mpeka tinjana bo sampulu ongu polampina. 13 Ri bagia pebuluna to naria bobaana, kandatena kana 22 metere woꞌu. 14-15 Ri sabingga njidi bo nggana nu bobaa etu kana rapataka powombo, kandatena simbau 6,6 metere ante tolumpeka tinja riara toluongu polampi.
16 Ri bobaana kana rapataka powombo 9 metere kandatena to nipowia nggari kae linen to nalusu to nitanu ante bana naramata, nakamumu bo nalei, to niwera ante posuji. Kawia woꞌu patampeka tinja bo pataongu polampi rapombaloe powombo etu. 17 Pura-pura tinja ri lalowo etu kana raposiumpu ante polondo salaka. Pekaꞌina kana rapowia nggari salaka bo polampina kana rapowia nggari tambaga. 18 Lalowo etu kandatena 44 metere pade rembana 22 metere, pade kalangana 2,2 metere. Powombo lalowo etu kana rapowia nggari kae linen to nalusu bo polampina rapowia nggari tambaga. 19 Pura-pura parewa ntanina to nipake riara Tenda Mpepue, pura-pura panto rapompataka Tenda bo powombo ri lalowo etu kana rapowia nggari tambaga.”
Poindo Tenda Mpepue bo lanana
Im. 24:1-4
20 “Pakaumo tau-tau to Israel manggeni lana zaitun daꞌa ria galona to neliu nggabelona rapake ri poindo ri tendaku ala poindo etu mamala majela. 21 Harun bo ana-anana kana mompasiayu poindo etu ala batena majela ri ngayoku nggari ngguwiana sampe mpadondona ri Tenda Posirata, ri sawaliku powombo to niloe ri ngayo Peti Pojanji. Parenta etu kana ratuki nto Israel bo muli-muli ira sampe ri kasae-saena.”