Tenda Mpepue
Kel. 36:8-38
26
“Kawiamo saongu tenda ka Aku nggari sampulu bala kae linen to nalusu to nitanu ante bana naramata, nakamumu bo nalei. Kae etu kana rasuji ntau to napandena ante gambara malaeka kerub. 2 Sabala-sabala kae etu kana masimbayu kabetena, etumo kandatena 12 metere bo rembana 2 metere. 3 Lima bala kae kana raposiumpu majadi saongu powombo, pade lima bala ntanina kana rapowia iwetu woꞌu. 4 Powiamo pokaꞌi nggari kae naramata ri wiwi nu powombo rongu etu. 5 Simbau limampulu pokaꞌina rajau ri powombo etu ala mosintingayo. 6 Pade kawia woꞌumo limampulu pekaꞌi nggari bulawa rapangumpu robala powombo etu majadi saongu.7 Anu rapoata nu tenda etu kawiamo sampulu sabala kae nggari wulu ntowau. 8 Butu-butu bala kana masimbayu kabetena, etumo kandatena 13 metere bo rembana 2 metere. 9 Lima bala kana raposiumpu majadi saongu powombo, bo ono bala ntanina kana rapowia iwetu woꞌu. Umpuna kaonona kana ratilu rontilu ala mombatutu bagia kolu nu tenda etu. 10 Patakamo limampulu pokaꞌi ri wiwi powombo pamulana bo limampulu woꞌu ri wiwi powombo karobalana. 11 Pade kawia woꞌumo limampulu pekaꞌina nggari tambaga rasuaraka riara pokaꞌi-pokaꞌi etu ala robagia powombo etu mamala rapakasaongu majadi ata nu tenda. 12 Santongo bala kae labina etu rapotutu bagia puri nu tenda etu. 13 Ata nu tenda etu 1 metere nandatepa pade tenda. Jadi labina 50 senti ntimali-malina kana rapalamba waꞌamo mombatutu wiwi tenda. 14 Kawia woꞌumo rongu tutu rapotutu tenda etu, saongu nggari kulimba bimba tuama nalei, pade saongupa woꞌu nggari kulimba nalusu.
15 Kawiamo dopi-dopi nggari kayu akasia rapatido rapoleru nu tenda. 16 Butu-butu dopi etu kalangana 4 metere bo rembana 66 senti. 17 Ri tampa-tampana kana rapowia rongu potosu nosintoto ala dopi-dopi etu mamala rapopenggore. Kawiamo pura-pura dopi iwetu. 18 Ri bagia pulu nu tenda etu kawiamo rompulu mbeba dopi 19 ante patampulu ongu polampina nggari salaka, rongu-rongu ri wayo butu-butu dopi, saongu-saongu ri wayo butu-butu potosu. 20 Ri bagia tasina kawiamo rompulu mbeba dopi 21 ante patampulu ongu polampina nggari silaka, rongu-rongu ri wayo butu-butu dopi. 22 Ri bagia puri nu tenda, ri sabingga kasolona, kawiamo onombeba dopi, 23 pade kawia woꞌu rombeba dopi ka soki-sokina ri bagia purina. 24 Dopi ri sokina ntimali etu kana raposiumpu nggari bagia kelena sampe ri kalangana, pade rapataka saongu lau gala. Rombeba-rombeba dopi to majadi sokina kana rapowia iwetu. 25 Jadi pura-pura maria walumbeba ante sampulu onoongu polampi salaka, etumo rongu polampi ri kele butu-butu dopi.
26 Kawia woꞌumo sampulu limampeka polondona nggari kayu akasia, etumo limampeka rapolondo sabingga nggana, 27 limampeka rapolondo ri sabingga njidi, pade limampekapa rapolondo ri bagia puri nu tenda ri sabingga kasolona. 28 Kayu rapolondo ri tatongona kana rapataka ante kalangana santongo dopi sampe malau ri tampana ntimali-mali. 29 Dopi-dopi bo kayu rapolondo etu kana ralapi ante bulawa. Pade gala-gala rapombatande kayu rapolondo etu woꞌu kana rapowia nggari bulawa.
30 Patakamo tenda etu nantuki jonjo to nipopokita ka iko ri bunggu bulu.
31 Kawiamo powombo rapotombi riara tenda etu. Kawiamo powombo etu nggari kae nalusu to nitanu ante bana naramata, nakamumu bo nalei. Sujimo kae etu ante gambara kerub. 32 Loemo powombo etu ante pekaꞌi bulawa ri patampeka tinja kayu akasia to nilapi bulawa. Tinja etu kana rapataka ri pataongu polampi to nipowia nggari salaka. 33 Patakamo powombo etu ri wayo pekaꞌina pade bolimo Peti Pojanji noisi rongu watu nipotulisi ante parenta-parenta Alatala riara powombo etu. Powombo etu kana mompopogaꞌa Petoꞌo to Nagasa ante Petoꞌo to Neliu Nggagasa. 34 Tuꞌumo tutu Peti Pojanji ri bunggu petina riara Petoꞌo to Neliu Nggagasa. 35 Pade bolimo meja nipomboli roti to nipesomba ka i PUE ri sawaliku powombo etu riara Petoꞌo to Nagasa ri sabingga tasina, pade kada mpoindo ri sabingga puluna riara tenda etu.