TENDA MPEPUE BO PAREWA-PAREWANA NIPOWIA (Pasal 25-40)
Pewai to rakeni todea rapowia Tenda Mpepue
Kel. 35:4-9
25
Pade nangulimo i PUE ka i Musa, 2 “Pakaumo tau-tau to Israel manggeni pewai ka Aku. Isema nadota rarana kana manggeni pewaina. 3 Iweꞌimo pewai-pewai to masipato mutarima nggari jaꞌi ira: bulawa, salaka, tambaga, 4 kae linen to nalusu, bana wol naramata,a nakamumu bo nalei, kae nipowia nggari wulu towau, 5 kulimba bimba tuamana to nalei, kulimba nalusu, kayu akasia, 6 lana mpoindo, rampa-rampa rapowia minya ada bo dupa nawongi, 7 watu krisopras bo mpengaya watu nasuli ntanina raporamba baju “efod” bo tutu bombara topanggeni agama.8 Pakaumo todea mowia tenda ka Aku ala Aku mamala metoꞌo ri tatongo ira. 9 Tenda bo mpengaya parewana kana rapowia nantuki jonjo kupopokita ka iko.”
Peti Pojanji
Kel. 37:1-9
10 “Powiamo saongu peti pojanji nggari kayu akasia, kandatena 110 senti, rembana bo kalangana simbau 66 senti. 11 Peti etu kana ralapi ante bulawa to daꞌa ria galona bagia riarana bo sawalikuna, pade wiwi ntalilina rakawia nggari bulawa. 12 Pade kawia woꞌumo pataongu gala bulawa raposuaraka kayu pokowa peti etu. Pataka gala-gala etu ri kada peti, rongu sabingga. 13 Kawia woꞌu kayu rapokowa peti etu nggari kayu akasia nilapi ante bulawa. 14 Kayu pokowa etu kana rasuaraka riara gala-gala ri kada peti etu ala mamala rakowa. 15 Kayu pokowa etu kana raboli ri gala-gala peti pojanji etu, neꞌe rakaliaka. 16 Pade riara peti etu kana radika watu to nitulisi parenta-parenta to kuwai ka iko.
17 Kawia woꞌu tutu peti etu nggari bulawa to daꞌa ria galona. Tutu etu rauli “Petoꞌo Pantolo Silaka.”b Kandatena 110 senti bo rembana 66 senti. 18 Pade kawia woꞌu rongele nolenje mpomalaeka nosanga ka Kerub nggari bulawa nipempe. 19 Kerub etu kana radika saongu-saongu ri tampa ntimali tutu nu peti pojanji rapakasaongu ante tutu etu. 20 Ira kana rapoposintingayo metiro pade kapina menggaka mompakaulu tutu nu peti etu. 21 Tuꞌumo rongu watu to nitulisi parenta-parentaku riara peti pade tutumo peti etu. 22 Ri baꞌa nu tutu peti etu ri olo rombaꞌa kerub to mompakaulu tutu peti etu Aku kana mosirata ante iko pade mombawai ka iko pura-pura parentaku ka tau-tau to Israel.”
Meja rapomboli roti pesomba
Kel. 37:10-16
23 “Kawiamo meja nggari kayu akasia, kandatena 88 senti, rembana 44 senti bo kalangana 66 senti. 24 Lapimo meja etu ante bulawa to daꞌa ria galona, pade kawia woꞌumo wiwi ntalilina nggari bulawa. 25 Kawiamo wiwi nu meja nggari bulawa lima nggoya pale karembana. 26 Pade kawiamo pataongu gala bulawa pade patakamo ri sokina patanjoki namosu kadana. 27 Gala etu kana mamosu wiwina rapombasuaraka kayu pokowa ala meja etu mamala raposikowa. 28 Kayu pokowa etu kana rapowia nggari kayu akasia pade ralapi ante bulawa. 29 Kawia woꞌumo baki-baki, suraya-suraya, jolo-jolo bo panombo-panombo rapotoli ue anggur to rapesomba. Parewa etu pura-pura kana rakawia nggari bulawa to daꞌa ria galona. 30 Meja etu kana raboli ri ngayoku riara Petoꞌo to Neliu Nggagasa, pade ri bunggu nu meja etu batena rapakasadia roti pesomba ka Aku.”
Kada mpoindo
Kel. 37:17-24
31 “Kawiamo kada mpoindo nggari bulawa to daꞌa ria galona. Kada mpoindo etu ante potandena bo puꞌuna kana rakawia nggari bulawa nipempe, bunga-bunga raporamba bo pantakana bo sesena kana majadi saongu ante potandena bo puꞌuna. 32 Ri puꞌuna kana rakawia onompenga ranggana, tolumpenga sabingga. 33 Ri pura-pura ranggana etu kana rakawia ramba ewa tolunjese bunga badam ante sesena bo pantakana. 34 Ri puꞌuna kana rapowia woꞌu ramba ewa patanjese bunga badam ante sesena bo pantakana. 35 Ri wayo nu butu-butu ranggana etu kana rakawia saongu pantaka nu bunga. 36 Jadi njumaongu kada mpoindo ante pantaka-pantakana bo rangga-ranggana kana rakawia nggari sanggoto bulawa daꞌa ria galona to nipempe.
37 Kawiamo papitu poindo rapataka ri wuntu kada mpoindo etu ala reme nggari poindo etu mombawanta ri koluna. 38 Kawiamo parewa mompakagasa sumbuna bo dulana nggari bulawa to daꞌa ria galona. 39 Pakemo 35 kilo bulawa to daꞌa ria galona rapowia kada mpoindo ante parewa-parewana etu. 40 Jagaimo ala pura-pura parewa etu rakawia nantuki jonjo to nipopokita ka iko ri bunggu bulu eꞌi.”