Pompakaroso pojanji Alatala ante todea to Israel
24
Naliu etu nangulimo i PUE ka i Musa, “Pantendemo mantingayo Aku, pade keni woꞌumo i Harun, i Nadab, Abihu bo pitumpulu mbaꞌa totuꞌa to Israel. Daꞌapa mamosu ante Aku komi pura-pura kana motimbakotu mombasomba Aku. 2 Aga sambaꞌamu lau mamala mompakamosu Aku. Ira ntanina daꞌa mamala. Pade todea daꞌa mamala mantende ri buluna eꞌi.”3 Nangepe etu nalaumo i Musa nombatesa pura-pura tesa bo parenta i PUE ka todea. Sangga nangepe etu nangulimo ira, “Pura-pura nuapa to nitesa i PUE etu kana ratuki kami.” 4 Naopu etu i Musa nantulisi pura-pura to nitesa i PUE.
To nailena nasadondo mpuꞌu nipowianamo saongu petoꞌo mpesomba ka i PUE ri kente nu bulu etu, pade nipopenggorena sampulu rongu tinja watu to nombagambara muli nu sampulu rombaꞌa ana Israel to najadi todea Israel. 5 Naopu etu nipakauna bara sakuya mbaꞌa kabilasa nggari tatongo to Israel malau manggeni pesomba rapalabu ka i PUE pade manjambale bara sakuya ongu japi majadi pesomba posinggabelo to Israel ante i PUE. 6 Naopu japi etu nisambale, sabagia nggari lei japi etu niala i Musa nitolina riara panombo-panombo, pade sabagia nikamburoina ri bunggu petoꞌo mpesomba etu. 7 Naliu etu nialana Buku Pojanji to noisi pura-pura parenta to niuli i PUE pade nibasana mpakamangga ka todea.
Sangga nangepe tesa etu nangulimo ira, “Kami kana matutu mantuki pura-pura nuapa to nitesa i PUE etu.”
8 Naopu etu i Musa nangala lei japi nggariara panombo etu pade nikamburoina ka tau dea ante nanguli, “Lei eꞌimo nompakaasa Pojanji i PUE ante komi ewa to nipakanoto riara tesa-tesa eꞌi.”
9 Naliu etu nantendemo i Musa, i Harun, i Nadab, Abihu bo pitumpulu mbaꞌa totuꞌa nto Israel mpaka ri bulu etu 10 pade ri setu ira nanggita Alatala nto Israel nenggore ewa ri bunggu jaula nipowia nggari watu nilam damo neringgila pade nagawu ewa langi damo nagasa. 11 Topanggeniaka-topanggeniaka nto Israel etu nanggita Alatala, tapi naupa iwetu ira daꞌa nipakaropu Alatala. Ri setu ira nanggoni bo nanginu mpasanggani-nggani.
Musa ri bunggu Bulu Sinai
12 Naopu etu nanguli woꞌumo i PUE ka i Musa, “Pantende woꞌumo iko mantingayo Aku ri bunggu bulu eꞌi. Karoomo ri seꞌi pade kuwai ka iko watu nitulisi ante atura-atura bo parenta-parentaku ala rapatuduki ka tau-tau to Israel.”
13 Naopu etu nalaumo i Musa bo anabuana nosanga ka Yosua nantende mpaka ri bulu nu Alatala etu. 14 Daꞌapa nalai niuli i Musa ka totuꞌa-totuꞌa nto Israel etu, “Popea komimo ri seꞌi sampe kami manjili bali. Harun bo i Hur naria ri seꞌi ante komi. Isema-sema maria parakarana mamala marata ri jaꞌi ira rombaꞌa ala parakara etu ratangara.”
15 Naopu etu nantendemo i Musa ri Bulu Sinai, pade naria kulimu nombabungu bulu etu. 16 Pade reme i PUE nanaꞌu ri bunggu Bulu Sinai. Onoeo kasaena bulu etu nibungu kulimu etu, pade ri eo kapapituna notesamo i PUE ka i Musa nggariara kulimu etu. 17 Tempo etu tau-tau to Israel nanggita reme i PUE nombabungu bunggu bulu etu ewa jela apu nombatunju tinalu bete. 18 Napolamo i Musa nantende bulu etu nibungu kulimu. Pade naroomo iꞌa ri setu patampulu eo bo patampulu mbengi kasaena.