Atura-atura nosinggawela ante kanoana bo asi mata ri jaꞌi roa
23
“Neꞌe komi mompatolele kareba-kareba daꞌa nakono. Neꞌe mantulungi tau najaꞌa ante nodawa ri ngayo ntopotangara.2 Neꞌe mompasiala pokainggu tau dea mompowia kajaꞌana. Ane majadi sabi ri ngayo ntopotangara neꞌe aga mantuki pokainggu tau dea ante nodawa mompakadenggo atura-atura. 3 Neꞌe mosabingga ka tau nakasiasi riara mpotangara.
4 Ane komi manggita japi atau keledai ntau najadi balimu natonto, keni mpanjilimo ka puena. 5 Ane komi manggita keledai nu balimu natipaluku sabana natomo gaga panggenina, neꞌe aga rapalamba waꞌamo. Tulungimo tau etu mompopekanggore keledaina.
6 Ane tau nakasiasi marata manggeni parakara ri potangara, tangaramo iꞌa ante manoa. 7 Pakakawaomo nggari pepangadu to daꞌa nakono. Neꞌe ntoto rasuku mamate tau nanoa bara tau daꞌa ria salana, sabana Aku kana mombasuku tau mowia kajaꞌana ewa etu.
8 Neꞌe mantarima doi rapombasogo komi, sabana doi etumo mompakajadi tau maburo notona sampe iꞌa daꞌa mamala manggita to nakonona, pade mompakarugi tau-tau nanoa.
9 Neꞌe mompandasa tau topesowo ri tana komi. Ninjani komi mbotomo katuwua tau topesowo, sabana bopia komi najadi topesowo ri Tana Masir.”
Atura-atura mpae kapapituna bo eo kapapituna
10 “Onompae komi mamala mombatuja panggawia komi pade mangala aselena. 11 Tapi mpae kapapituna tana etu kana rakitanaka komi. Palambamo anu natuwu mboto ri panggawia komi ka tau nakasiasi bo labina ka binata nggakayu. Iwetu woꞌu rapowia komi ante pampa nipotuja anggur bo zaitun.
12 Ono eo riara santipa komi mamala manggawia pura-pura panggawia komi, tapi eo kapapituna komi kana mondodo ala binata-binata komi, batua-batua komi bo topesowo ri ngata komi mamala mondodo woꞌu.
13 Toramo mpakabelo-belo nuapa pura to niuliku ka komi. Neꞌe komi mekakai ka pue-pue ntanina, nau aga sangana neꞌe rauli komi.”
Atura-atura nosinggawela ante tolungele eo bete
Kel. 34:18-26, Ul. 16:1-17
14 “Tolunggani sampae komi kana mompowia eo bete mombabila Aku. 15 Ri tempo to nipakatantumo, komi kana mompowia Posusa Roti Daꞌa Nidika Ragi. Pitu eo kasaena komi kana manggoni roti daꞌa nidika ragi ewa niparentaku ka komi. Kawiamo posusa etu riara wula Abib sabana riara wula etumo komi nesuwu nggari Tana Masir.
Ane komi marata mepue ri jaꞌiku, neꞌe marata ante pale ntoya.
16 Komi kana mompowia woꞌu Posusa Pokato tempo komi mangala asele pamulana nggari panggawia komi.
Pade komi kana mompowia Posusa Mompasiromu Asele Ntanaa ri kaopu mpae tempo komi mompasiromu asele ntinalu komi.
17 Tolunggani sampae etu pura-pura langgai kana marata mantingayo Aku, i PUE to Neliu Nggalanga.
18 Tempo komi manggeni pesomba ka Aku, neꞌe rakeni komi lei nu binata to nisambale komi majadi pesomba etu nosanggani ante bara nuapa anu nidika ragi. Pade neꞌe sampe lomu to nikeni komi majadi pesomba raboli sampe naile.
19 Butu-butu mpae komi kana manggeni asele ntana komi pamulana to neliu nggabelo mpaka ri sapo i PUE Alatala komi.
Bau ana bimba atau towau daꞌa namala raporiapu ante ue njusu indona.”
Janji bo parenta i PUE ka to Israel
20 “Aku mompakau malaekaku mokolu ka komi manggalendu komi riara mpolumako komi pade manggeni komi mpaka ri tana to nipakasadiakumo ka komi. 21 Pariaramo bo tukimo tesana. Neꞌe mangewa iꞌa, sabana iꞌa etu nipakauku. Ane komi mangewa iꞌa komi daꞌa ntoto raampungina. 22 Tapi ane komi matundu ri jaꞌina pade mantuki pura-pura parentaku, Aku mboto mosibali ante balimu bo tau-tau to mangewa komi. 23 Malaekaku kana mokolu ka komi pade manggeni komi mpaka ri tana nto Amori, to Het, to Feris, to Kanaan, to Hewi bo to Yebus, pade ira pura-pura kana kupakaropu. 24 Neꞌe ntoto komi motimbakotu mombasomba pue ira, neꞌe mompasiala ira mompakoni pue-pue ira etu. Komi kana mompakaropu parantau-parantau to nisomba ira, pade tinja-tinja watu nipake ira mepue kana rapakarege. 25 Ane komi mepue ka Aku, i PUE Alatala komi, Aku kana mombagane panggoni bo panginu komi, pade pura-pura juꞌa kupakakawao nggari jaꞌi komi. 26 Riara ngata komi daꞌa maria besi malonju anana, pade daꞌa woꞌu maria besi magampa. Aku mompakandate umuru komi.
27 Tau-tau riara ngata to rakalau komi kupowia maeka ri jaꞌiku. Ira pura-pura kupakaingu. Pura-pura bali komi kupowia mangowa malai mompalasi komi. 28 Pade Aku mompakau patuntu mokolu ka komi mompopalai to Hewi, to Kanaan bo to Het ala komi mamala mompakapola polumako komi. 29 Ira etu daꞌa kupopalai sanggani riara tempo sampae, ala tana etu neꞌe majadi rara nggayu, pade binata-binata nggakayu neꞌe mantambai sampe madea gaga. 30 Tapi ira etu kupopalai sakedi-sakedi sampe mantambai kadea komi mombakuasai tana etu.
31 Pantaꞌa nu tana komi etu kupakatantu mompamula nggari Tasi Lei sampe ri Tasi Tongo,b pade nggari karawa baina sampe ri Binangga Efrat. Kana kuwai ka komi kuasa mompopalai pura-pura tau to netoꞌo ri tana etu. 32 Neꞌe ntoto komi mompowia pojanji ante pue ngata etu atau ante pue-pue to nisomba ira. 33 Neꞌe rapalamba ira metoꞌo riara ngata komi ala komi neꞌe mowia silaka ri jaꞌiku ante mantuki ira mombasomba pue-pue to nisomba ira. Sabana natantumo ane komi mantuki ira mombasomba pue-pue ira, komi kana manawu riara silaka.”