Atura-atura manjambei karugia
22
“Ane maria tau mangangga japi bara bimba pade rasambalena bara rapobaluna, iꞌa kana manjambei japi saongu majadi lima ongu japi. Waꞌa woꞌu bimba saongu kana rasambeina majadi pataongu bimba.2-4 Topangangga kana manjambei pura-pura parewa nipanganggana. Ane daꞌa maria nuapa rapanjambeina, iꞌa mboto kana rapobalu majadi batua manjambei parewa ntau nipanganggana etu. Ane to nipanganggana etu binata, bara japi, keledai bara bimba, rarata ri jaꞌi ntopangangga damatuwu, topangangga etu kana manjambei saongu-saongu binata ronggani kadeana.
Ane sambaꞌa topangangga nirata mesua raranjapo tempo nggawengina pade niboba sampe mamate tau nompatesi iꞌa etu daꞌa nasala. Tapi ane topangangga nipatesi tempo eona, topepatesi kana rareke masala.
5 Isema mompoewu binatana riara bondena mboto bara riara pampa nipotuja anggur pade binata etu mapola manggoni asele mpanggawia tau ntanina, pue binata etu kana manjambei karugia pue nu panggawia to nikoni binatana etu ante asele to neliu nggabelona nggari panggawiana mboto.
6 Isema mombatunju tinaluna mboto pade apu etu manggalele mapola ri tinalu tau ntanina sampe mompakapapu gando nitambunaka atau gando daꞌapa nikato atau njumaongu tinalu etu, tau nompakapapu etu kana manjambei karugia etu.
7 Rapana maria tau momboli parewana bara doina ri jaꞌi tau ntanina, tapi parewa bara doi etu nipangangga nggari sapo roana etu. Ane topangangga etu nirata ntau, iꞌa kana mombabayari ronggani kadeana oli mbara-mbara to nipanganggana etu. 8 Tapi ane topangangga etu daꞌa rarata, pue njapo nipomboli parewa bara doi etu kana rakeni ri ngayo Alatala. Ri setu iꞌa kana mojanji daꞌa iꞌa to nompangangga parewa bara doi to niboli ri sapona etu.
9 Ane mosinggarau ka mbara-mbara, bara japi, bara keledai, bara bimba, bara pakea, bara parewa ntanina to matonto, ane sambaꞌa manguli ‘Akumo puena!’ ira rombaꞌa kana rakeni ri ngayo Alatala. Pade tau to rapakatantu Alatala nasala kana manjambei ronggani kadeana ka pue mbara-mbara to nipakarugina etu.
10 Rapana maria tau mombapiara keledai, japi, bimba bara binata ntanina ka roana, tapi nggapurina binata etu mamate bara makoto kadana bara rakeni mpalai ntau pade daꞌa ria sabina. 11 Tau etu kana mojanji ri ngayo i PUE iꞌa mpuꞌu-mpuꞌu daꞌa nangangga bara nompakajuꞌa binata nipiarana etu. Ane mpuꞌu-mpuꞌu iꞌa daꞌa nompangangga binata etu pue binata etu mbotomo kana mombatanggu karugiana. Tau nompiara binata etu ka roana daꞌa paraluu manjambei karugiana. 12 Tapi ane binata etu rapangangga tau ntanina, tau nombapiara binata roana etu kana manjambei ka puena. 13 Ane binata etu rasoko binata nasoa, tau nompiara binata etu kana mompopokita labi wuku-wuku to naboli ka pue binata. Daꞌa paraluu iꞌa manjambei binata etu. 14 Ane sambaꞌa tau nompake binata roana pade binata etu makoto kadana bara mamate tempo puena daꞌa ria ri setu, tau nompake binata etu kana manjambei binata etu. 15 Tapi ane etu majadi pade nikita pue binata etu, tau nompake binata etu daꞌa paraluu manjambei binata etu. Ane binata etu nisewana, karugia etu nireke nesua ri doi sewa etu.”
Atura-atura ewa pogau sala
16 “Isema mombatanara sambaꞌa besi danarandoo to daꞌapa notingea pade mosampaturu ante iꞌa kana mombabayari ada mporongo besi etu pade momporongo iꞌa. 17 Tapi ane uma nu randoo etu daꞌa mompaloga anana etu raporongo langgai etu, langgai etu kana mombawai ada mporongo besi etu ka uma nu randoo sakuya kadeana ada mporongo sambaꞌa randoo.
18 Isema-sema besi medoti kana rapatesi. 19 Isema-sema mogau sala ante binata kana rapatesi. 20 Isema-sema mompakoni pue-pue ntanina, pade daꞌa aga mepue ka Aku i PUE, tau etu kana rapatesi.
21 Neꞌe mompakajaꞌa atau mompandasa tau topesowo ri ngata komi. Toramo, komi woꞌu nggamasae najadi topesowo ri Tana Masir. 22 Neꞌe mompandasa besi tobalu bara ngana pailu. 23 Ane komi mowia etu ri jaꞌi ira pade ira mekakai ka Aku, natantumo Aku kana mangepe pekakai ira. 24 Pade Aku kana marau raraku sampe mompatesi komi ante guma sampe rongo komi mboto kana majadi tobalu pade ana-ana komi majadi ngana pailu.
25 Ane komi mompopainda doi ka tau nakasiasi ri tatongo todeaku, neꞌe mombasungara iꞌa ewa topoinda momperapi ana doina. 26 Ane komi mangala baju roamu majadi panjokomu, baju etu kana rapopanjili komi ka iꞌa bali daꞌapa masolo eo, 27 sabana baju etu santonga lau rapasuana mompakapane korona. Ane baju etu daꞌa rapopanjili komi ka iꞌa nuapa woꞌumo rapobabana maturu? Ane iꞌa mekakai merapi tulungi ka Aku, natantumo Aku kana mangepe pekakaina, sabana Aku naasi mataku.
28 Neꞌe komi manguli sinjaꞌi Alatala, pade neꞌe mombajanjiaka topanggeniaka ngata komi.
29 Ri tempo to nipakatantu, waimo pesomba komi ka Aku, etumo sabagia nggari asele gando bo anggur komi. Neꞌe mompoara. Pade waimo ka Aku ana langgai komi ulumbua. 30 Waꞌa woꞌu ane japi, bimba bo towau. Wai ka Akumo ana ulumbua nu binata-binata etu. Ana-ana binata etu kana rapasanggani ka indona ntani pitueo kasaena, pade binata etu kana rakeni rapesomba ka Aku ri eo kawalueona.
31 Komi kana majadi todeaku to nagasana. Sabana etu neꞌe komi manggoni bau binata to namate nisoko binata nasoa. Waimo bau etu ka asu.”