Atura-atura nosinggawela ante batua
Ul. 15:12-18
21
“Wai ka tau to Israel atura-atura iweꞌi: 2 ‘Ane komi mangoli batua nggari komi sangata mboto, etumo tau to Ibrani, iꞌa kana mokarajaa ka komi onompae kasaena. Marata ri kapitumpaena iꞌa kana rakabasaka ante daꞌa mombabayari doi nipangoli komi iꞌa. 3 Ane rapana iꞌa danaloa tempo najadi batuamu pade norongo ri purina, rongona besi etu daꞌa mamala mantuki iꞌa tempo iꞌa rakabasaka. Tapi ane rapana iꞌa norongomo tempo najadi batua, rongona mamala mantuki iꞌa ane iꞌa rakabasaka. 4 Ane tau nangoli batua etu mompoporongo batuana etu ante sambaꞌa besi batua woꞌu, pade besi etu moana, besi bo anana etu bagia nu madika. Jadi ane batua langgai etu rakabasakamo, rongona besi ante ana-anana daꞌa mamala mantuki iꞌa.5 Tapi ane rapana batua etu manguli ka madikana iꞌa nompotowe rongona bo ana-anana etu bo madikana, pade daꞌa madota rakabasaka, 6 madikana etu kana manggeni batua etu mantingayo Alatala ri sapo mpodade. Batua etu kana rapakau mekanggore metinduku ri tinja pewobo sapo mpodade etu, pade madikana kana mombatosu talinga batua etu. Ante iwetu batua etu majadi batua sampe mamate.
7 Ane sambaꞌa besi nto Ibrani rapobalu umana majadi batua, besi etu daꞌa mamala rakabasaka maopu onompae nasimbayu ewa batua langgai. 8 Ane rapana besi to nioli madikana ala raporongona etu daꞌa rapodamba rara nu madikana, madikana etu kana mompaloga besi etu ratolo ntau. Daꞌa mamala iꞌa mompobalu besi etu ka topesowo, sabana madikana etu daꞌa nanoa nompowia iꞌa, etumo iꞌa daꞌa nompakadupa pojanjina ka besi etu. 9 Ane iꞌa mangoli batua besi ala rapoporongo ka anana langgai, batua besi etu kana rarekena ewa anana mboto. 10 Ane madika etu moradua, iꞌa damasipato mombawai panggoni bo pakea bo mosampaturu ante rongona pamulana. 11 Ane rapana iꞌa daꞌa madota mompowia tolungele etu ka rongona pamulana, iꞌa kana mombakabasaka batua besi. Doina nipangoli batua besi etu daꞌa mana rapopanjili ka iꞌa.’ ”
Atura-atura nosinggawela ante tau nasoa
12 “Isema mombaboba tau sampe mamate kana rasuku woꞌu sampe mamate. 13 Tapi ane iꞌa mombaboba tau daꞌa nitunggaina, aga nipalamba Alatala majadi, topepatesi etu kana malai mpaka ri saongu petoꞌo to kupakatantu ka komi. Ri setu iꞌa rakalendu. 14 Tapi ane tau monia pade ratunggaina mompatesi tau ntanina pade maliu etu iꞌa malai mekalendu ri petoꞌo pesomba ka Aku, tau etu kana raala nggari petoꞌo pesomba etu pade rasuku sampe mamate.
15 Isema mombaboba umana bara indona kana rasuku mamate.
16 Isema mompangaꞌe tau ntanina kana rasuku sampe mamate naupa tau nipangaꞌe etu nipobalunamo bara danariapa riara njapona.
17 Isema mombajanjiaka umana bara indona kana rasuku mamate.
18-19 Ane tempo tau mosinggarau sampe sambaꞌa mombaboba roana ante watu bara mombajaguru roana tapi daꞌa nipatesina, iꞌa daꞌa rasuku. Ane tau niboba etu kana maturu sabana najuꞌa niboba, tapi ngina iꞌa mamala membangu pade molumako nau aga nolembau, tau nombaboba iꞌa kana mombatanggu pakuli nto juꞌa etu sampe mabelo pade manjambei karugia sakuya kasaena iꞌa najuꞌa.
20 Isema mombaboba batuana langgai bara batuana besi sampe mamate kana rasuku. 21 Tapi ane batua etu mabelo maopu sambengi rombengi, madikana etu daꞌa rasuku, sabana batuana anuna mboto.
22 Ane maria bara sakuya mbaꞌa langgai mosibaga pade maria sambaꞌa nggari jaꞌi ira mawela besi to natiana sampe besi etu malonju anana tapi daꞌa mabela korona, tau nawela besi etu kana mombabayari wayana sakuya raperapi rongo nu besi etu pade to rakasituju ntopotangara. 23 Tapi ane besi etu matomo belana sampe majuꞌa mpuꞌu, pesuku tau nawela iꞌa etu kana masimbayu ante kajaꞌa to nipowiana, etumo nosa rasambei ante nosa, 24 mata rasambei ante mata, ngisi rasambei ante ngisi, pale rasambei ante pale, kada rasambei ante kada, 25 bela rasambei ante bela, bela ratunju ante apu rasambei ante bela ratunju ante apu, pade bangga rasambei ante bangga.
26 Isema mombaboba mata batuana sampe batua etu maburo, iꞌa kana mombakabasaka batuana etu. Etumo majadi panjambei matana. 27 Ane tau mombaboba batuana langgai bara batuana besi sampe mapongga ngisina, batua etu kana rakabasaka. Etumo majadi panjambei ngisina to napongga etu.”
Waya tau nombapiara binata
28 “Ane saongu japi tuamana mombatandu langgai bara besi sampe mamate, japi etu kana rarempe ante watu sampe mamate, pade bauna daꞌa mamala rakoni. Aga pue japi etu daꞌa rasuku. 29 Tapi ane japi tuamana etu nabiasa metandu, pade nipopatoramo ka puena tapi puena etu daꞌa nombajagai japi etu sampe mombatandu tau ntanina sampe mamate, japi etu kana rarempe ante watu sampe mamate, pade puena woꞌu kana rasuku mamate. 30 Tapi ane pue japi etu niwai loga mombatolo katuwuna ante doi, iꞌa kana mombabayari sakuya kadeana to niperapi sampesuwu ntomate etu. 31 Ane tau namate nitandu japi ngana langgai bara ngana besi, atura etu woꞌu rapake. 32 Ane tau namate nitandu japi sambaꞌa batua langgai bara batua besi, pue japi etu kana mombabayari tolumpulu mpeka doi salakaa ka madika nu batua to namate etu, pade japi etu kana rarempe ante watu sampe mamate.
33 Isema mangala poladu buwu bara mombakae buwu pade daꞌa mombaladu buwu etu sampe maria japi bara keledai roana manawu riara buwu etu, 34 pue buwu etu kana mombabayari panjambei karugia pue binata etu, tapi iꞌa mamala mangala binata namate etu ka iꞌa mboto. 35 Ane japi tuamana mombatandu japi tau ntanina sampe mamate, japi tuamana to natuwuna etu kana rapobalu, pade doi oli japi etu kana rapobagi ira. Waꞌa woꞌu bau japi to namatena kana rabagi ira. 36 Tapi ane japi etu nabiasamo nombatandu roana, pade japi etu daꞌa nijagai puena, pue japi etu kana manjambei japi to namate etu ante japi ntanina to natuwu, pade japi to namatena etu mamala raalana.”