Sampulu parenta i PUE
Ul. 5:1-21
20
Pade notesamo Alatala. Iweꞌi puramo tesa-tesana: 2 “Aku eꞌimo i PUE Alatala komi to nanggeni komi nesuwu nggari Tana Masir, petoꞌo komi nipobatua.3 Neꞌe komi mepue ka pue ntanina. Aga Aku to masipato rapepue komi.
4 Neꞌe komi mompowia parantau nolenje mpobaranuapa to naria ri langi, ri dunia, atau to naria riara ue.
5 Neꞌe komi motimbakotu ri ngayo parantau ewa etu atau mombasomba ira, sabana Aku, i PUE Alatala komi najuꞌa raraku nanggita komi mepue ka pue ntanina.
Aku kana mombasuku tau to nomporau Aku sampe ri mulina katoluntapina bo ri kapatantapina.
6 Tapi Aku kana mompopokita toweku ka njobu-njobu muli ntaua to nompotowe Aku pade natutu nantuki parentaku.
7 Neꞌe komi sambara manguli sangaku, i PUE Alatala komi, sabana Aku kana mombasuku isema-sema to manguli sangaku sambara.
8 Toramo Eo Mpenonto bo bilamo eo etu ewa eo to nagasa.
9 Naria loga aono eo kasaena komi mokarajaa.
10 Tapi eo kapapituna etu eo mpenonto ka i PUE Alatalamu.
Ri eo etu neꞌe komi mokarajaa, nabeloka komi, nabeloka ana-ana komi, nabeloka batua-batua komi, nabeloka binata-binata komi, nabeloka tau topesowo ri ngata komi.
11 Sabana riara aono eo Aku nompajadi langi, dunia, tasi pade nompengele-ngele isina. Tapi ri eo kapapituna Aku nenonto. Etumo sabana Aku, i PUE nombagane eo mpenonto pade nompakatantu eo etu ewa eo to nagasana.
12 Bilamo indo umamu ala mandate umurumu matuwu ri tana kuwai ka komi.
13 Neꞌe mepatesi.
14 Neꞌe mogau sala ante tau daꞌa rongomu mboto.
15 Neꞌe mangangga.
16 Neꞌe modawa ri ngayo ntopotangara.
17 Neꞌe maino raramu manggita anu tau ntanina, nabeloka sapona, nabeloka rongona, nabeloka batuana, nabeloka japina, nabeloka keledaina, nabeloka bara nuapa to naria ri jaꞌina.”
To Israel naeka
Ul. 5:22-33
18 Tempo tau-tau to Israel nangepe guntu bo moni kololio pade nanggita kila bo Bulu Sinai nibungu rangasu nokalaletemo ira ante nawiora rara. Nenggoremo ira nggawao 19 pade nanguli ka i Musa, “Agina komi motesa ka kami pade kami kana momparasaya tesamu! Aga neꞌe Alatala motesa ka kami. Mamate pura kami ngina!”
20 Nesonomo i Musa, “Neꞌe maeka! Alatala narata mombauji komi ala komi mekou ri jaꞌina sampe mana madota mowia silaka.”
21 Tapi todea batena nenggore nggawao, aga i Musa njambaꞌana nalau nompakamosu kulimu nggapu damo narumau etu ri petoꞌo nikarata nu Alatala.
Atura-atura manggeni pesomba ka Alatala
22 Naopu etu nangulimo i PUE ka i Musa, “Pakaumo tau to Israel iweꞌi: ‘Nikita komi mbotomo iwenumo Aku notesa ka komi nggari suruga. 23 Jadi neꞌe mepue ka pue-pue ntanina. Aga Aku masipato rapepue komi. Neꞌe rapowia komi parantau salaka bara bulawa rasomba komi.
24 Powiamo saongu petoꞌo mpesomba ka Aku nggari tana, pade ri setumo rapantuꞌu komi bimba bo japi majadi pesomba rapalabu bo pesomba posinggabelo. Ri umba-umba petoꞌo kupakatantu ka komi mombasomba Aku, Aku kana marata mombagane komi. 25 Ane komi mompowia petoꞌo mpesomba nggari watu ka Aku, neꞌe rapowia nggari watu nipaꞌa, sabana watu nibingga ante paꞌa iwetu nireke natantoru riara mpanggitaku, mana namala rapake manggeni pesomba ka Aku. 26 Pade neꞌe woꞌu mompowia petoꞌo mpesomba to nalanga gaga sampe kana rapone ante tangga, ala neꞌe rakita ntau bagia koromu to daꞌa masipato rakita.’ ”