Tau to Israel ri Bulu Sinai
19
1-2 Naopu etu nalaimo to Israel nggari ngata Rafidim, pade ri tanggal saongu wula toluongu naliu ira nompalasi Tana Masir, naratamo ira ri Karawa Sinai. Narata ri setu notendamo ira nompakamosu Bulu Sinai etu. 3 Pade nantendemo i Musa ri bulu etu mosirata ka Alatala.Notesamo i PUE ka i Musa nggari bulu etu nompakau iꞌa nompatolele ka tau to Israel, muli Yakub etu iweꞌi: 4 “Nikita komi mbotomo nuapa to nipowiaku ka tau to Masir, pade iwenu Aku nanggeni komi mpaka ri jaꞌiku ri seꞌi ante kabete kuasaku nasimbayu ewa tonji lowe nanggeni anana ri bunggu kapina. 5 Weꞌi-weꞌi ane komi matutu mantuki tesaku pade mpuꞌu-mpuꞌu manjoko pojanjiku, komi kupajadi todeaku mboto. Pura-pura manusia ri dunia Akumo puena, tapi komi kana majadi todeaku to mpuꞌu-mpuꞌu nipotoweku. 6 Komi majadi todea to nagasa riara mpanggitaku, pade komi pura-pura kana majadi topanggeni agama to mantulungi Aku.” Iwetumo panguli i PUE to rapasimbayu i Musa ka tau to Israel.
7 Naopu etu notuamo i Musa nggari bulu etu pade nipokiona puramo totuꞌa-totuꞌa nto Israel, pade nipasimbayuna ka ira pura-pura nuapa to nitesa i PUE ka iꞌa. 8 Nangepe tesa etu, nesono sangganimo tau to Israel, “Pura-pura to niparenta i PUE kana ratuki kami.” Naopu etu nalaumo i Musa nanggeni pesono ira etu ka i PUE.
9 Pade nangulimo i PUE ka i Musa, “Aku kana marata ri jaꞌimu riara kulimu nggapu. Pura-pura tau dea etu kana mangepe suaraku motesa ante iko, pade mompamula nggari eo etu ira kana momparasaya iko.”
Nangepe etu i Musa nompasimbayu ka i PUE nuapa to niuli todea to Israel.
10 Pade nanguli woꞌumo i PUE ka i Musa, “Weꞌi-weꞌi kalaumo mosirata ka tau dea etu, pade pakaumo ira eo eꞌi bo naile mompakasadia koro ira mepue ka Aku. Pakaumo ira mantapasi pakea ira. 11 Nepua ira kana masadiamo, sabana eo etu Aku kana manaꞌu ri bunggu Bulu Sinai riara mpanggita todea etu. 12 Powiamo tandaina majadi pantaꞌana mantalili bulu eꞌi to daꞌa mamala raliunaka ira. Pade ulimo ka ira iweꞌi: ‘Pakabelo-belo! Neꞌe mantende ri bulu etu bara aga mombalonggo kente nu bulu etu. Sabana isema-sema mombalonggo bulu etu natantumo kana rasuku mamate. 13 Ira kana rarempe ante watu atau rapana. Pade watabaku tau etu daꞌa mamala rasoko pale ntau. Kana rapalamba waꞌamo. Nau manusia nau binata pura-pura to mombaliunaka pantaꞌana etu kana rasuku mamate. Aga tempo ira mangepe moni kololio mandate tau dea etu mamala mantende ri bulu etu.’ ”
14 Naopu etu notuamo i Musa nggari bulu etu nosirata ante tau dea. Pade nipakauna ira mompakasadia koro ira mepue ka i PUE. Nangepe etu todea nantapasi pakea ira ala masadia mepue. 15 Pade nangulimo i Musa ka ira, “Nepua komi kana masadia puramo. Weꞌi-weꞌi totuꞌa langgai bo totuꞌa besi kana mantaꞌamaka mosampaturu.”
16 Naratamo eo katolueona, tempo dampadondona naria guntu bo kila, pade kulimu to nakumba mpuꞌu nombabungu Bulu Sinai. Pade nariamo moni kololio namangga mpuꞌu. Pura-pura tau riara potenda nto Israel nolalete ante naeka rara.
17 Musa nanggeni tau dea etu nesuwu nalau nosirata ante Alatala, pade ira nenggore namosu Bulu Sinai etu. 18 Njumaongu Bulu Sinai nibungu rangasu sabana i PUE nanaꞌu ri setu riara apu. Rangasu etu neonggotaka ewa rangasu apu nombatunju tinalu pade njumaongu bulu nogoya ewa lingu bete. 19 Moni kololio etu nantambai kasaena nantambai karoꞌona. Musa notesa ante Alatala pade Alatala nombasono iꞌa nggariara guntu etu.
20 Tempo etu nanaꞌumo i PUE ri bunggu Bulu Sinai, pade nipokiona i Musa malau mosirata ante Iꞌa ri bunggu bulu etu. Jadi nantendemo i Musa mpaka ri bunggu bulu etu. 21 Sangga naratapa iꞌa ri setu notesamo i PUE ka iꞌa, “Potuamo mompopatora ka tau dea etu neꞌe mombaliunaka pantaꞌana mompasimbuku manggita Aku. Sabana ane ira mombaliunaka pantaꞌa etu natantumo madea mpuꞌu ira kana mamate. 22 Iwetu woꞌu topanggeni-topanggeni agama. Ane ira madota mompakamosu Aku ira kana mompakagasa koro ira ntani ruru. Ane daꞌa, ira kana kusuku mamate.”
23 Nangulimo i Musa ka i PUE, “Tau dea etu daꞌa mamala mantende wemai sabana Komi mboto nanguli ka kami bulu eꞌi petoꞌo nagasa pade kami kana mowia tandaina majadi pantaꞌana ri ntalilina pade mompariara pantaꞌa-pantaꞌa etu.”
24 Nesonomo i PUE, “Potuamo pade kenimo i Harun mpaka wemai. Tapi topanggeni-topanggeni agama ante todea pura-pura daꞌa mamala momai mombaliunaka pantaꞌana mpaka ri jaꞌiku. Ane ira momai mombaliunaka pantaꞌa etu, ira kana kusuku mamate.”
25 Jadi notuamo i Musa nosirata ante tau dea, pade nitesanamo tewai-tewai i PUE etu ka ira.