Yitro nalau nanggita i Musa
18
Yitro, matuꞌa i Musa to najadi sambaꞌa topanggeni agama ri Tana Midian. Iꞌa nangepe nuapa to nipowia Alatala ka i Musa bo todeana to Israel tempo Iꞌa nanggeni ira nesuwu nggari Tana Masir.2 Tempo bopia i Musa nompakau rongona i Zipora nanjili netoꞌo ri jaꞌi umana ri Tana Midian 3 nosanggani-nggani ante rombaꞌa anana langgai. Ana ulumbua i Musa nipoposangana i Gersom,a sabana tempo pesuwuna i Musa nanguli, “Aku eꞌi topesowo ri tana ntau.” 4 Ana i Musa karombaꞌana nipoposangana Eliezer,b sabana tempo pesuwuna i Musa nanguli, “Alatala to nisomba umaku nantulungi aku sampe aku daꞌa nipatesi Magau Masir.”
5 Tempo i Musa ante tau to Israel notenda ri karawa baina namosu Bulu nu Alatala, nalaumo Yitro nosanggani-nggani ante rongo i Musa bo rombaꞌa anana langgai etu lau manggita i Musa. 6 Daꞌapa ira nalau naria kareba nipakatu Yitro ka i Musa to nanguli, “Aku, matuꞌamu Yitro, marata ri jaꞌimu mosanggani-nggani ante rongomu bo rombaꞌa anamu.”
7 Jadi nesuwumo i Musa nombatomunaka matuꞌana etu. Sangga naratapa Yitro notimbakotumo i Musa ri ngayona pade niekina. Ira nosimpekutana kareba sambaꞌa bo sambaꞌa, pade nalau nesua riara tenda i Musa. 8 Ri setu i Musa nombatesa puramo ka matuꞌana nuapa to nipowia i PUE ka Magau Masir bo todeana ala manggabasaka tau to Israel nggari Tana Masir. Nitesana woꞌu pura-pura kasusa to nirasai ira riara mpolumako ira pade iwenu i PUE nompakasalama ira.
9 Nadamba mpuꞌumo rara Yitro nangepe pura-pura to nabelo to nipowia i PUE ka tau to Israel tempo Iꞌa nanggabasaka ira nggari jaꞌi ntau to Masir. 10 Niulina, “Ratoiyamo pade rabilamo i PUE to nompakasalama komi nggari pale magau Masir bo todeana! Ratoiyamo i PUE sabana Iꞌa nanggabasaka tau to Israel nggari pobatua ira! 11 Weꞌi-weꞌi ninjanikumo i PUE neliu nggakuasa nggari pue-pue ntanina, sabana pura-pura etu nipowiana ka tau to Masir to nompandasa tau to Israel ante nasombo.” 12 Naliu etu Yitro, matuꞌa i Musa nanggeni binata rapalabu majadi pesomba ka Alatala nosanggani-nggani ante bara sakuya ongu binata ntanina ala rapesomba ka Iꞌa. Pade naratamo i Harun bo pura-pura totuꞌa nto Israel nanggoni mpasanggani ante Yitro matuꞌa i Musa ri ngayo Alatala.
Musa nangonggotaka topotangara nto Israel
Ul. 1:9-18
13 Naeo to nailena nekatokomo i Musa nombatangara tau to Israel. Nadea mpuꞌu tau narata ratangara sampe todea kana nompopea ri ngayo i Musa nggari mpandondona sampe nawengi. 14 Tempo Yitro nanggita nuapa pura to nipowia i Musa ka todea Israel nekutanamo iꞌa ka i Musa, “Nuapa to nipowiamu ka todea eꞌi? Nokuya aga iko njambaꞌamu mombatangara todea? Ira aga nenggore ri ngayomu nggari mpandondona sampe nawengi!”
15 Nesonomo i Musa, “Todea etu narata ri jaꞌiku ala mangginjani dota Alatala. 16 Ane naria tau nosinggarau ira kana rakeni ri jaꞌiku ala aku mombatangara ira pade mompasimbayu ka ira parenta-parenta bo atura-atura Alatala.”
17 Nangepe etu nangulimo Yitro, “Daꞌa nabelo ane iwetu. 18 Iko aga nompakalenge koromu mboto bo tau-tau to narata mekitangara. Bago etu natomo gaga. Daꞌa nompakule iko mantuina njambaꞌamu lau. 19 Epemo pepatudukiku eꞌi pade Alatala kana mantulungi iko. Nabelo mpuꞌu iko najadi wakele nu todea ri ngayo Alatala pade manggeni parakara ira etu ri jaꞌina. 20 Iko kana mompatuduki ka ira parenta-parenta bo atura-atura Alatala pade popokita ka ira jala nggatuwu to nabelo bo nuapa to masipato rapowia ira. 21 Tapi ntanina nggari etu iko kana mompelisi bara sakuya mbaꞌa langgai to nanoto nggari tatongo tau dea pade mangonggotaka ira majadi balengga manggeniaka tau sanjobu, pade balengga manggeniaka tau satu pade balengga manggeniaka tau limampulu, pade balengga manggeniaka tau sampulu mbaꞌana. Ira kana tau maeka ri jaꞌi Alatala, to namala raparasaya pade tau daꞌa madota rasogo. 22 Pakaumo ira majadi topotangara ri tatongo todea. Parakara-parakara to nakajana namala rakeni ira ri jaꞌimu, tapi parakara-parakara to nangaꞌana namala ratangara ira mboto. Ante iwetu iko kana rapakangaꞌa sabana ira mantulungi komi mantui bago etu. 23 Ane iko mowia nuapa to nitesaku eꞌi, pade etu woꞌu raparenta Alatala ka iko, kana mupakule mantui bagomu pade pura-pura tau narata ratangara kana manjili ante madamba rarana.”
24 Jadi i Musa nangepe tesa matuꞌana pade nantuki pura-pura pepatudukina etu. 25 Nipelisina tau to nanoto nggari tatongo tau to Israel pade nionggotakana ira najadi balengga manggeniaka tau sanjobu mbaꞌana, tau satu mbaꞌana, tau limampulu mbaꞌana pade tau sampulu mbaꞌana. 26 Ira najadi topotangara-topotangara ka todea Israel. Ane naria parakara to nakajana, etu nikeni ira mpaka ri jaꞌi Musa. Tapi parakara-parakara to nangaꞌana nitangara ira mbotomo.
27 Naliu etu nosimpogaꞌamo i Musa ante matuꞌana Yitro, pade nanjilimo Yitro mpaka ri ngatana mboto.