Ue nesuwu nggari watu bete
Bil. 20:1-13
17
Naliu etu nalai woꞌumo pura-pura tau to Israel nompalasi karawa baina Sin pade nolinja-linja ri umba-umba niparenta i PUE ka ira. Naria sanggani ira notenda ri Rafidim, tapi ri setu daꞌa ntoto naria ue rainu. 2 Jadi sangganipa ira nongua ka i Musa pade nanguli, “Wai ka kami ue rainu!”Nesonomo i Musa, “Nokuya komi nongua ka aku pade nompesoba i PUE?”
3 Tapi todea etu nabai mpuꞌu tambolo ira pade nongua mpuꞌu ka i Musa. Nangulimo ira, “Nokuya komi nanggeni kami nesuwu nggari Tana Masir? Ala kami bo ana-ana kami bo binata-binata kami aga mamate mabai tambolo ri seꞌi?”
4 Nangepe etu nekakaimo i Musa ka i PUE. Niulina, “Nuapa kupowia ante todea eꞌi? Kitamo, ira madota mombarempe aku ante watu!”
5 Nangulimo i PUE ka i Musa, “Pokiomo bara sakuya mbaꞌa nggari topanggeniaka ira pade polumakomo mosanggani ante ira mokolu ka todea etu. Keni woꞌu lembaumu to nipombabobamu Binangga Nil. 6 Aku kana mekanggore ri ngayomu ri bunggu watu bete ri Bulu Horeb. Iko kana mombaboba watu bete etu ante lembaumu, pade ue kana mesuwu nggari watu etu sampe todea mamala manginu.” Nangepe etu i Musa nowia mpuꞌumo ewa to nipakau i PUE ka iꞌa riara mpanggita topanggeniaka-topanggeniaka nto Israel. 7 Petoꞌo etu nipoposangana Masa,a sabana ri setumo tau to Israel nompesoba i PUE ante nanguli, “Iwenumo? PUE nosanggani-nggani ante kita bara daꞌa?” Pade petoꞌo etu woꞌu nipoposanga Meriba,b sabana ri setumo tau to Israel nosinggarau ante i Musa.
Posipatesi ante tau to Amalek
8 Naliu etu naratamo tau to Amalek mosipatesi ante tau to Israel ri Rafidim. 9 Nangulimo i Musa ka Yosua, “Pelisimo tau malau mosipatesi mangewa tau to Amalek. Naile aku kana mekanggore ri buntina etu manjoko lembau nu Alatala.”
10 Yosua nompowia nuapa to niparenta i Musa ka iꞌa. Iꞌa nalau nosipatesi nangewa tau to Amalek. Tempo etu i Musa, i Harun bo i Hur nalau nantende ri bunggu bunti to namosu setu nanggita tau nosipatesi. 11 Ane i Musa nangonggotaka palena tau to Israel nedagi. Tapi ane palena nitaꞌurakana, tau to Amalek nedagi. 12 Tempo pale i Musa namagamo, i Harun bo i Hur nangala watu nipekatoko i Musa. Pade i Harun bo Hur nekanggore ri sabingga njidi pade ri sabingga nggana Musa nombatande palena ala bate-batena mationggotaka sampe nasolo eo. 13 Ante iwetu tau to Amalek nidagi tantara Yosua.
14 Pade nangulimo i PUE ka i Musa, “Tulisi puramo nuapa to najadi eꞌi riara saongu buku ala etu batena ratora. Ulimo ka Yosua Aku kana mompakaropu tau to Amalek sampe ira mana ranjani ntau ri dunia eꞌi.”