Roti manna ante tonji rombo
16
Naopu etu nalaimo pura-pura todea Israel nggari Elim, pade ri tanggal sampulu bo alima wula karombulana ira nalai nompalasi Tana Masir naratamo ira ri karawa baina nosanga ka Sin ri olo Elim bo Bulu Sinai. 2 Ri karawa baina etu nongua woꞌumo to Israel ka i Musa bo Harun. 3 Nangulimo ira, “Agina kami nipatesi i PUE ri Tana Masir! Ri setu kami namala nekatoko nanggoni bau ante roti sampe nabosu. Tapi weꞌi-weꞌi komi nanggeni kami ri seꞌi ri karawa baina eꞌi ala kami pura-pura mamateoro!”4 Pade nangulimo i PUE ka i Musa, “Aku kana mombanawusaka panggoni nggari langi ewa uja ka komi. Eo-eo todea kana malau mompasiromu panggoni etu sukana rakoni ira riara saeo. Ante powiaku etu Aku kana mombauji todeaku ala kunjani ane ira mantuki parentaku bara daꞌa. 5 Ri eo kaonoeona ira kana momporiapu panggoni to nipasiromu ira, etumo ronggani kadeana nggari kabiasa pompasiromu ira eo-eo.”
6 Jadi nangulimo i Musa bo Harun ka pura-pura to Israel, “Ngina ngguwia eꞌi kana ranjani komimo i PUEmo to nanggeni komi nesuwu nggari Tana Masir. 7 Naile mpadondo komi kana manggita tandaina karia i PUE ri tatongota, sabana niepenamo komi nongua ka Iꞌa. Mpuꞌu-mpuꞌu pongua komi etu daꞌa ka kami tapi ka i PUE. 8 PUE kana mombawai ka komi bau rakoni komi ngina ngguwia pade roti rakoni komi mpadondona sampe mabosumo taꞌi komi, sabana niepenamo pongua komi ka Iꞌa. Mpuꞌu-mpuꞌu pongua komi etu daꞌa nipawela komi ka kami tapi ka i PUE!”
9 Naopu etu nangulimo i Musa ka i Harun, “Pakaumo to Israel pura-pura momai mantingayo i PUE, sabana niepe PUEmo pongua ira etu.”
10 Tempo i Harun danotesa ka todea Israel, negolimo ira nangantoaka ri karawa baina, pade sampegoli nikita iramo reme i PUE riara kulimu.
11 Nangulimo i PUE ka i Musa, 12 “Niepekumo pongua nto Israel etu. Uli ka iramo, ngina ngguwia ira mamala manggoni bau, pade naile mpadondo ira mamala manggoni roti sampe mabosu taꞌi ira. Ante iwetu ranjani ira Aku eꞌimo i PUE Alatala ira.”
13 Ngguwiana etu naratamo tonji rombo nadea mpuꞌu sampe tana daꞌa mana nikita sabana kadea tonji etu. Pade tempo naeompadondo nanawumo loi nu betuꞌe ri sinjori potenda ira etu. 14 Sangga nosumoapa loi nu betuꞌe etu neumbamo sangaya ri bunggu ntana ri karawa baina to nanipi ewa ruke pade nalusu ewa loi nu betuꞌe naoko najadi es. 15 Sangga nanggita etu daꞌa ninjani ntau to Israel nuapa etu. Jadi nosimpekutanamo ira sambaꞌa bo sambaꞌa, “Nuapa etu?”
Nesonomo i Musa, “Eꞌimo panggoni to niwai i PUE ka komi. 16 Iweꞌimo parenta i PUE: ‘Komi simbau mompasiromu sakuya kadeana to niparaluu komi saongu-saongu njou, nte rolite sambaꞌa.’ ”
17 Jadi tau to Israel nompowia nuapa to nipakau ka ira. Naria to nompasiromu nadea, naria to nompasiromu aga sakedi. 18 Tempo nisuka ante posuka, tau nompasiromu nadea daꞌa ria pelabina, pade tau to nompasiromu sakedi, daꞌa ria kakurana. Simbau nompasiromu ewa to niparaluu ira.
19 Pade nangulimo i Musa ka ira, “Daꞌa ntoto mamala sambaꞌa tau mombaboli panggoni etu sampe naile, nau aga sakedi.”
20 Tapi naria bara sakuya mbaꞌa tau daꞌa nomparasaya tesa i Musa. Ira nomboli sagaꞌa panggoni etu. Tapi sangga naeompadondo nawaumo soa panggoni etu pade nakaulemo. Jadi nanggita etu naraumo rara i Musa.
21 Mpadondo-mpadondo ira nompasiromu panggoni etu sakuya niparaluu ira, pade ane nompamulamo eo napane, nagonumo panggoni to naboli ri bunggu tana. 22 Ri eo kaonoeona ira nompasiromu panggoni etu ronggani kadeana, etumo pata lite sambaꞌa. Naopu etu naratamo topanggeniaka ira nopakilu ka i Musa. 23 Nangulimo i Musa ka ira, “Iweꞌimo parenta i PUE: Naile eo mpondodo, etumo Eo Mpenonto to nagasa ala mepue ka i PUE. Jadi nuapa nipodota ratunu komi, tunumo eo eꞌi, pade nuapa nipodota rakalumba komi, kalumbamo eo eꞌi. Pade labina nggari eo eꞌi kana raboli komi sampe naile.”
24 Jadi labi panggoni daꞌa naopu nikoni ira niboli iramo sampe eona naile ewa to niparenta i Musa ka ira. Pade panggoni etu daꞌa nawau bara nakaule. 25 Nangulimo i Musa ka ira, “Konimo labi panggoni etu eo eꞌi, sabana eo eꞌi Eo Mpenonto ala mepue ka i PUE. Daꞌa maria panggoni etu rarata komi ri bunggu ntana eo eꞌi, nau aga sakedi. 26 Onoeo kasaena komi kana mompasiromu panggoni etu, tapi eo kapapituna Eo Mpenonto. Daꞌa ntoto maria panggoni manaꞌu eo etu.”
27 Naupa i Musa notesa ka ira iwetu, ri eo kapapituna kana naria bara sakuya mbaꞌa tau to Israel nadota mompasiromu panggoni, tapi daꞌa ntoto naria nirata ira nau aga sakedi. 28 Nanggita etu nangulimo i PUE ka i Musa, “Sampe nepia komi daꞌa madota mantuki parentaku bo atura-aturaku? 29 Toramo! Aku nombawai ka komi saeo majadi Eo Mpenonto. Etu sabana ri eo kaonona Aku nombawai ka komi panggoni nagana rakoni komi roeo. Tapi ri eo kapapituna pura-pura tau kana maroo metoꞌo ri petoꞌo ira mboto sambaꞌa bo sambaꞌa. Daꞌa namala ira mesuwu ri sawalikuna.” 30 Jadi etumo sabana ira nondodo ri eo kapapituna.
31 Panggoni etu niuli ntau to Israel “manna.”a Lenjena nabula ewa katumbara pade rasana namomi ewa roti nipowia ante ue noa. 32 Nangulimo i Musa, “Iweꞌimo parenta i PUE: ‘Alamo rolite manna raboli ka muli-mulimu, ala mamala rakita ira banepia panggoni to niwaiku ka komi riara karawa baina tempo Aku nanggeni komi nesuwu nggari Tana Masir.’ ”
33 Jadi nangulimo i Musa ka i Harun, “Alamo saongu kura, popesuamo manna etu rolite riara kura etu. Pade tuꞌumo kura etu ri ngayo i PUE ala raboli ka muli-mulita.”
34 Nangepe etu i Harun nangala kura niisina ante manna etu pade nituꞌuna ri sinjori peti pojanji ala raboliaka ri setu nantuki parenta i PUE ka i Musa. 35 Manna etu najadi panggoni ntau to Israel patampulu mpae kasaena sampe ira narata ri tana to nipetoꞌo ntau. Panggoni etu nikoni ira sampe ira narata ri pantaꞌa nu Tana Kanaan. 36 Posuka to nipake ntau nggaolu nosanga ka omer, to noisi rolite kadeana.