Dade i Musa
15
Naopu etu nodademo i Musa bo tau to Israel nombatoiya i PUE iweꞌi:“Aku madota modade mombatoiya i PUE
sabana Iꞌa nalanga bo nabete mpuꞌu kuasana.
Pura-pura jara ante topesawina nitajiakana riara ntasi.
2 PUE nompakaroso aku sampe aku kana modade.
Iꞌamo to nompakasalama aku.
Iꞌa Alatalaku pade aku kana mombatoiya Iꞌa.
Iꞌamo to nisomba ntotuꞌaku, pade aku mompakabete sangana.
3 PUE tadulako to nakuasa,
i PUE sangana.
4 Tantara nu Magau Masir bo pura-pura karetana nitajiakana riara ntasi.
Tadulakona to naroso nalodo pura riara Tasi Lei.
5 Ira niome ntasi to nandala mpuꞌu,
ewa watu nanawu riara ntasi natudu ri bone.
6 PUE, karosomu to nabetena nipogumaaku.
Pura-pura balimu nipakamatemu ante kuasamu to nabetena.
7 Ante kabete kuasamu to nipogumaa Komi nompakaropu tau-tau nangewa Komi.
Rau raramu nompakaropu ira nasimbayu ewa jela apu nompalabu kada mpae.
8 Komi nantawui ue tasi ante nosamu
pade ue nobalulu nenggore nalanga.
Balumba bete naoko najadi ewa leru,
ue najadi nakoꞌo ri tatongo ntasi nandala.
9 Tau najadi balita nanguli,
‘Ira kana kuraga pade kusoko.
Pura-pura mbara-mbara etu kuala
pade kupake sampe mabasa mpuꞌu raraku.
Aku kana mombabitu gumaku,
ante paleku kana kupatesi ira.’
10 Tapi i PUE aga nombasuupaka nosamu
pade ue tasi nombaladu tau-tau to Masir.
Ira natala ewa tima nitajiaka natudu ri bunggu bone
riara ue to nandala.
11 Pue-pue umbana nasimbayu ante Komi, i PUE?
Isema to neliu nggalanga bo nagasa ewa Komi?
Isema to namala mompowia tandai-tandai nipogumaa?
Isema to nowia kabaraka-kabaraka?
12 Komi aga nangojo pale ngganamu
pade tau najadi balimu naopu niome dunia ntomate.
13 Komi nanggeniaka todeamu to nipakasalamamu,
sabana towemu daꞌa ria kaopu-opuna.
Ante karosomu to nabetena Komi nombanini ira
nalau mpaka ri tanamu to nagasana.
14 Manusia nangepe lelemu pade nolete-lete.
Tau-tau to Filistin nawiora rara.
15 Topanggeniaka-topanggeniaka nto Edom naeka mpuꞌu,
tadulako nto Moab nokalalete pura.
Tau-tau to Kanaan nolenggu pura.
16 Nawiora mpuꞌumo ira nanggita kabete kuasa i PUE.
Mana nenjuꞌi ira nasimbayu ewa watu
sampe todeamu, i PUE, moliu ri ngata ira,
sampe mapolamo todea to nitolomu.
17 Komi kana manggeniaka todeamu mpaka ri bulu to nijanjimu.
Ira kana maroo ri petoꞌo to nipelisimu majadi petoꞌomu mboto,
ri Sapo to nipowiamu mboto, i PUE.
18 PUE kana moparenta sampe ri kasae-saena.”
Dade Miryam
19 Tempo to Israel nombawote tasi ira nolumako ri tatongo tasi ri bunggu bone to nangau. Tapi tempo kareta-kareta nto Masir ante jara nipesawi tantara magau Masir nesua ri setu, i PUE nompopanjili bali ue tasi sampe ira namate nalodo. 20 Naopu etu i Miryam, sambaꞌa nabi, tuaka i Harun, nangala tamburen pade nosanggani-nggani ante pura-pura besi nokanda tamburen bo nojoge. 21 Nodademo i Miryam ka ira iweꞌi:
“Mai modademo kita mombabila i PUE,
sabana Iꞌa padagi to nipogumaa.
Pura-pura jara ante topesawina
nitajiakana riara ntasi.”
Ue napaꞌi
22 Naliu etu i Musa nanggeniaka tau to Israel nggari wiwi Tasi Lei nalau mpaka ri karawa baina nosanga ka Syur. Tolu eo kasaena ira nolumako nombaliunaka karawa baina etu daꞌa nombarata ue rainu. 23 Pade naratamo ira ri petoꞌo nosanga ka Mara, tapi ue ri setu napaꞌi mpuꞌu sampe daꞌa namala rainu. Etumo sabana petoꞌo etu nipoposanga ka Mara. a 24 Jadi nokagagutumo tau to Israel nanguli i Musa. Nekutanamo ira ka iꞌa, “Nuapamo rainuta?”
25 Nekakaimo i Musa ka i PUE, pade i PUE nompopokita ka iꞌa sanggoto kayu. Nialana nitajiakana riara ue etu, pade nabalimo ue etu najadi nabelo, namala rainu.
Ri setumo i PUE nombawai atura-atura ka ira, pade ri setu woꞌu Iꞌa nombauji ira. 26 Niulina ka ira, “Pariaramo Tesaku bo powiamo to nabelo riara mpanggitaku. Tukimo parenta-parentaku. Ane komi mompowia iwetu Aku daꞌa mombasuku komi ante mompengaya juꞌa ewa to niwaiku ka tau to Masir. Aku eꞌimo i PUE to nompakabelo juꞌamu.”
27 Naopu etu naratamo ira ri saongu petoꞌo sangana Elim. Ri setu naria sampulu rongu mata ue bo pitumpulu kayu kurma. Ri setumo ira notenda namosu mata ue etu.