Newote Tasi Lei
14
Pade nangulimo i PUE ka i Musa, 2 “Ulimo ka to Israel ira kana megoli motenda mamosu ngata Pi-Hahirot ri olo ngata Migdol bo Tasi Lei mosintingayo ante ngata Baal-Zefon ri wiwi ntasi. 3 Magau Masir kana mompekiri komi aga naingu nalau-lau ri karawa baina, nitiku karawa baina ante tasi. 4 Aku kana mompakakoꞌo rara magau woꞌumo sampe iꞌa mombaraga komi. Tapi Aku kana mombadagi Magau Masir bo pura-pura tantarana sampe madea tau mombabila Aku. Pade tau-tau to Masir kana mangginjani Akumo i PUE.” Naopu etu nalaumo tau to Israel nompowia mpuꞌu ewa to niparenta i PUE ka ira.5 Sangga nangepe lele nanguli tau to Israel nalai puramo, nanjoso raramo magau bo pangga-pangga betena. Nangulimo ira, “Nuapa to nipowiata? Nokuya kita nompalamba to Israel etu nalai sampe mana ria batuata!” 6 Jadi nipakasadia magaumo kareta mposibalina ante tantara-tantarana malau mombaraga to Israel. 7 Nikenina onoatu kareta mposibali to neliu nggabelona nosanggani-nggani ante pura-pura karetana ntanina simbau ante balengga tantara. 8 PUE mpuꞌu-mpuꞌu nompakakoꞌo rara magau sampe iꞌa nombaraga to Israel tempo ira nalai nikalendu i PUE. a 9 Tantara-tantara Masir to nesawi jara bo pura-pura karetana ante topesawina nombaraga to Israel sampe nombarata ira ri potenda ira ri wiwi ntalinti namosu ngata Pi-Hahirot nosintingayo ante ngata Baal-Zefon.
10 Tempo to Israel nangantoaka, nikita ira magau Masir ante tantarana namosumo nombaraga ira. Naeka mpuꞌumo ira, pade nekakaimo ira ka i PUE. 11 Nangulimo ira ka i Musa, “Nokuya iko nanggeni kami nalai nggari Tana Masir? Bara daꞌa naria dayo ri setu rapombatana kami sampe iko nanggeni kami mamate ri karawa baina eꞌi? 12 Niuli kami mamimo bopia ri Tana Masir, ‘Palambamo kami majadi batua nto Masir! Neꞌe mombabago kami!’ Nabelopa kami najadi batua nto Masir pade mamate riara karawa baina eꞌi!”
13 Tapi nesonomo i Musa, “Neꞌe maeka! Taꞌamakamo! Komi kana manggita ngena nuapa rapowia i PUE mompakasalama komi! Tau to Masir to nikita komi weꞌi-weꞌi daꞌa mana ntoto rakita komi sampe ri kasae-saena! 14 PUE mbotomo kana mosibali ante tau to Masir etu manjaliku komi. Daꞌa paraluu komi mompowia nuapa-nuapa!”
15 Naopu etu nangulimo i PUE ka i Musa, “Nokuya iko aga nongare-ngare nekakai ka Aku nerapi tulungi? Pakaumo to Israel etu molumako magasi-gasi! 16 Onggotakamo lembaumu bo palemu ri baꞌa tasi! Ue tasi kana mogaꞌa sampe maria jala ri bunggu bone tasi nangau etu rapolumako nto Israel mewote mpaka ri sambotena. 17 Aku kana mompakakoꞌo rara to Masir sampe ira daꞌa menonto mombaraga to Israel, pade Aku kana mompopokita kuasaku ka Magau Masir, ka tantarana, ka topesawi kareta-karetana bo topesawi jara. 18 Pura-pura to Masir kana mangginjani Akumo i PUE tempo Aku mompopokita kuasaku ka Magau Masir bo tantarana nokareta bo topesawi jara etu.”
19 Naopu etu malaeka Alatala to nolumako nokolu ka tantara Israel nolinja nalau ri puri ira, pade kulimu nolenje mpotinja woꞌu nolinja ri puri ira 20 ri olo tantara to Masir bo tantara Israel. Kulimu etu nompakarumau lombona ri jaꞌi to Masir pade nompakareme tau to Israel, sampe njambengi ntua tantara Masir bo tantara Israel daꞌa namala mosipakamosu.
21 Pade i Musa nangonggotaka palena ri baꞌa tasi, pade i PUE nompopeburu poiri bete nggari kamataeona nombatawui tasi etu sampe natibagimo ue tasi etu najadi robagia. Njambengi poiri bete etu neburu sampe ue tasi etu nabali najadi tana ngau. 22 Pade tempo to Israel nolumako nombawote tasi etu ira nolumako ri bunggu bone nangau ante ue ri sabingga nggana bo ri sabingga njidi ira ewa leru.
23 Tantara to Masir ante jara ira pura-pura, kareta-kareta ira ante topesawi jara nombaraga nantuki tau to Israel mpaka ri tatongo tasi. 24 Tempo nabobayamo i PUE nanggita tantara Masir nggari apu bo kulimu nolenje mpotinja, pade nipakagadona ira. 25 Nipakalonjuna roda-roda kareta ira sampe nakaja mpuꞌu ira mapola. Nanggita etu nangulimo tantara Masir, “PUE nantulungi to Israel nangewa kita! Kamaimo kita malai nggari seꞌi!”
26 Pade nangulimo i PUE ka i Musa, “Onggotakamo palemu ri baꞌa tasi ala ue tasi etu manjili batena mompakalodo tantara Masir ante kareta-kareta ira bo topesawi jara.” 27 Jadi i Musa nangonggotaka palena ri baꞌa tasi, pade tempo bobayana etu nanjili batena ue tasi etu. Tau to Masir nompasimbuku mangowa malai nggariara ue tasi etu tapi daꞌa namala. PUE nompakalodo ira riara ue tasi etu. 28 Ue tasi etu nanjili ewa batena sampe nombaladu kareta-kareta bo jara nipesawi tantara. Pura-pura tantara Magau Masir to nombaraga to Israel ri tatongo tasi namate riara ue tasi etu. Daꞌa ria sambaꞌa to natuwu.
29 Tapi tempo tau to Israel nombawote tasi etu ira nolumako ri bunggu bone ngau ante ue tasi ri sabingga nggana bo ri sabingga njidi ewa leru. 30 Eo etu i PUE nompakasalama to Israel nggari pale ntau to Masir. Tau to Israel nanggita watabaku-watabaku tantara Masir nikeni balumba sampe ri talinti. 31 Tempo tau to Israel nanggita kuasa i PUE to nabetena to nipakena nombadagi to Masir, naekamo rara ira ri jaꞌi PUE sampe niparasaya ira mpuꞌumo i PUE bo batuana i Musa.