Ngana langgai ulumbua nijuju ka i PUE Alatala
13
Nangulimo i PUE ka i Musa, 2 “Pura-pura ngana langgai ulumbua kana rajuju ka Aku. Pura-pura ngana langgai ulumbua nto Israel pade pura-pura ana binata tuamana ulumbua, Akumo puena.”Eo Bete Roti daꞌa nidika ragi
3 Naopu etu nangulimo i Musa ka tau to Israel, “Eo eꞌi i PUE nombakabasaka komi ante kabete kuasana, sampe komi namala nesuwu nggari Tana Masir, petoꞌo komi nipobatua. Sabana etu eo eꞌi kana ratora komi ntoto. Neꞌe ntoto komi manggoni roti to nidika ragi. 4 Eo eꞌi ri wula pamulana to nosanga ka wula Abib komi nalai nompalasi Tana Masir. 5 Tempo nggaolu i PUE nojanji ka totuꞌa komi ante janjina Iꞌa kana mombawai ka komi tana nto Kanaan, to Het, to Amori, to Hewi bo to Yebus. Jadi maliu i PUE manggeni komi mpaka ri tana to nakalumana bo naboya etu, mpae-mpae riara wula Abib komi kana mowia ada eꞌi. 6 Riara pitu eo kasaena komi kana manggoni roti daꞌa nidika ragi, pade ri eo kapapituna komi kana mowia posusa mombabila i PUE. 7 Riara pitu eo kasaena etu komi mamala manggoni aga roti daꞌa nidika ragi, pade daꞌa mamala maria ragi ri njumaongu ngata komi nau aga rakita daꞌa mamala. 8 Pade ri pamulana posusa etu komi kana manguli ka ana-ana komi langgai iweꞌi: ‘Kita mowia ada eꞌi ala mombatora pura-pura nuapa to nipowia i PUE tempo kita nalai nompalasi Tana Masir.’ 9 Posusa eꞌi majadi popatora ka komi nasimbayu ewa tandai nipoꞌu ri palemu atau ri kiremu. Posusa eꞌi kana mompopatora komi ala matundu riara Atura-atura i PUE, sabana i PUE nombasuwuraka komi nggari Tana Masir ante kabaraka to nabete mpuꞌu. 10 Jadi komi kana mosusa mompakabete eo etu butu-butu mpae ri tempo to nipakatantu.”
Ada ngana ulumbua
11 Nangulimo i Musa ka tau to Israel, “PUE kana manggeni komi mpaka ri Tana nto Kanaan to nijanjina ante nojanji ka komi bo totuꞌa komi nggaolu. Ane tana etu majadi tana komimo, 12 komi kana mombajuju ka i PUE butu-butu ana langgai ulumbua bo ana binata tuamana ulumbua. Etu pura-pura i PUE puena. 13 Tapi butu-butu ana keledai tuamana ulumbua kana ratolo komi nggari jaꞌi PUE ante mombawai saongu ana bimba manjambei ana keledai etu. Ane komi daꞌa madota mombatolo keledai etu, tambolona kana rakoto. Waꞌa woꞌu ana-ana komi langgai ulumbua kana ratolo komi.
14 Ane ri eo nggapurina ana komi mekutana ka komi, ‘Nuapa batuana ada eꞌi?’ komi kana mombasono ira iweꞌi: ‘Ante kabarakana to nabete mpuꞌu i PUE nanggeni kita nesuwu nggari Tana Masir, petoꞌota nipobatua. 15 Tempo Magau Masir nompakakoꞌo rarana daꞌa nadota nompaloga kita malai, i PUE nompatesi pura-pura ana langgai ulumbua nto Masir, nabeloka ana manusia, nabeloka ana nu binata-binata. Etumo sabana kita kana mombajuju butu-butu ana tuama ulumbua nu binatata majadi pesomba ka i PUE, pade butu-butu mbaꞌa ngana langgai ulumbua kana ratolota.’ 16 Kabiasa etu kana majadi tandai pepatora ka komi, nasimbayu ewa tandai nipoꞌu ri palemu atau ri kiremu. Ante iwetu komi batena mantora i PUE to nanggeni komi nesuwu nggari Tana Masir ante kabarakana to nabete.”
Kulimu nolenje mpotinja bo apu nolenje mpotinja
17 Naliu Magau Masir nompaloga tau to Israel nalai, Alatala daꞌa nanggeni ira nojala nombaliunaka tana nto Filistin, naupa jala etumo to namosuna. Sabana nipekiri Alatala, “Ane ranjani to Israel ira kana mosipatesi ante bali, neꞌe-neꞌe ira manjoso rara sampe manjili bali mpaka ri Tana Masir.” 18 Jadi etu sampe Alatala nanggeni ira negoli nojala ri karawa baina mpaka ri Tasi Lei. Tempo ira nalai nggari Tana Masir ira nanggeni parewa mposibali ewa tau malau mosipatesi.
19 Tempo ira nalai i Musa nompakau tau nanggeni wuku-wuku Yusuf, sabana tempo Yusuf danatuwu iꞌa nompakau tau to Israel mojanji ante janjina mowia to niulina. Nitewaina ira iweꞌi: “Tempo Alatala mantulungi komi banepia, wuku-wukuku kana rakeni komi malai nggari Tana Masir eꞌi.”
20 Tau-tau to Israel nompalasi ngata Sukot pade notenda ri ngata Etam namosu karawa baina. 21 Tempo eona i PUE nokolu ka to Israel riara kulimu nolenje mpotinja ala mompakanoto jala ka ira, pade tempo nggawengina Iꞌa nokolu ka ira riara apu nolenje mpotinja ala mombawanta jala. Ante iwetu tau to Israel namala nolumako ri eona bo nggawengina. 22 Njineo kulimu etu nokolu ka ira, pade njambengi apu naria ante ira.