Posusa Paska pamulana
12
Nangulimo i PUE ka i Musa bo Harun ri Tana Masir, 2 “Wula eꞌi kana rareke komi wula pamulana riara pombareke mpaena. Wula eꞌimo wula pamulana. 3 Ulimo ka pura-pura to Israel parenta iweꞌi: ‘Tanggal sampulu wula eꞌi pura-pura totuꞌa langgai kana mompelisi saongu ana bimba rakoni ira sanjapo ngina. 4 Ane maria ira sanjapo etu daꞌa nadea sampe daꞌa rapakule ira manggoni mpakaopu saongu ana bimba etu, ira kana mosanggani ante tau nosinggamosu sapo ira ala ira mamala manggoni mpakaopu ana bimba etu. Bau etu kana ratibo-tibo nantuki kadea ira to nanggoni mpasanggani-nggani. Pakasadia bau ana bimba etu nantuki pompakule ira manggoni sambaꞌa bo sambaꞌa. 5 Komi mamala mompelisi bimba bara towau, tapi aga tuamana umuruna sampae to nadoli. 6 Ana bimba bara towau etu kana raboli komi ntani riara wala sampe tanggal sampulu ampa. Eo etu ngguwiana pura-pura todea to Israel kana manjambale ana bimba etu. 7 Maopu etu kana raala sakedi leina ragese ri tinja pewobo ntimali pade ri baꞌa nu pewobo sapo nipanggoni ira etu.8 Wengina etu woꞌu, bau etu kana ratunu pade rakoni ira ante uta mapaꞌi pade roti daꞌa nidika ragi. 9 Neꞌe manggoni bau etu nggamata bara to nikalumba. Tapi bau etu kana ratunu sanggani ante balenggana, paꞌana, bo isi rarana. 10 Neꞌe raboli komi nau aga sakedi bau etu sampe maeo mpandondona. Ane maria labina kana rapalabu komi sampe maopu.
11 Tempo manggoni komi kana masadia mamimo malai ante mompake pakea mpolumako ante sandala ri kadamu bo lembau ri palemu. Komi kana manggoni masalisa. Etumo Eo Bete Paska i PUE.
12 Wengina etu Aku kana mompesayo Tana Masir mompatesi pura-pura ngana langgai ulumbua, nabeloka ana ulumbua manusia, nabeloka ana ulumbua binata-binata. Pade Aku kana mombasuku pue-pue to nisomba nto Masir. Akumo i PUE. 13 Lei ana bimba nigese ri pewobo sapo komi etu majadi tandaina ri sapo nipetoꞌo komi. Ane Aku manggita lei etu, komi kana kuliunaka, daꞌa kupatesi komi tempo Aku mombasuku tau-tau to Masir. 14 Eo etu kana ratora komi majadi Eo Bete i PUE. Etu kana ratora pade rapowia komi mpae-mpae sampe ri muli-muli komi.’ ”
Posusa Roti Daꞌa Nidika Ragi nipakatantu i PUE
15 Nangulimo i PUE, “Tempo mantuki eo bete etu pitueo kasaena komi daꞌa mamala manggoni roti nidika ragi. Eo pamulana ragi to naria ri sapo komi kana ratajiaka puramo. Sabana ane tempo pitueo kasaena etu maria tau manggoni roti nidika ragi, tau etu daꞌa mana rareke todeaku to Israel. 16 Eo pamulana pade eo kapapituna komi kana masiromu mepue ka Aku. Eo etu neꞌe ntoto mokarajaa nuapa-nuapa. To mamala rapowia komi aga mompakasiayu panggoni.
17 Posusa Roti Daꞌa Nidika Ragi etu kana ratora bo ratuki komi iwetu ala mombatora tempo Aku nanggeni komi todeaku nesuwu nggari Tana Masir. Eo Bete etu kana ratora bo ratuki komi mpae-mpae sampe ri muli-muli komi. 18 Riara wula pamulana mompamula nggari tanggal sampulu ampa nggawengina marata ri tanggal rompulu bo saongu nggawengina, komi daꞌa mamala manggoni roti nidika ragi. 19 Pitu eo kasaena etu daꞌa ntoto mamala maria ragi riara njapo komi. Isema-sema manggoni panggoni nidika ragi tempo etu mana ntoto rareke todeaku, nabeloka iꞌa topesowo ri tana komi, nabeloka iꞌa tau to Israel. 20 Daꞌa ntoto mamala rakoni komi panggoni nidika ragi. Ri umba-umba nipetoꞌo komi, kana rakoni komi roti daꞌa nidika ragi tempo posusa etu.”
Eo Bete Paska pamulana
21 Naopu etu i Musa nompokio pura-pura totuꞌa nto Israel pade niulina ka ira, “Kalaumo komi mangala ana bimba rapake komi saongu njapo mantuki posusa etu, pade sambalemo ana bimba Paska etu. 22 Maopu etu ala komi sampoꞌu kawoko hisop ratome riara panombo nipomboli komi lei ana bimba etu, pade gesemo lei etu ri tinja pewobo ntimali sapo komi bo ri baꞌa pewobo etu. Daꞌa namala komi mesuwu nggariara njapo komi nau aga sambaꞌa sampe maeo mpadondona. 23 PUE kana molumako mompesayo tana eꞌi ala mompatesi to Masir. Tempo Iꞌa manggita lei ana bimba ri tinja pewobo ntimali bo ri baꞌa pewobo komi, Iꞌa kana mombaliunaka sapo komi etu. Daꞌa rapalogana malaeka kamatea mesua riara njapo komi mompatesi komi.
24 Parenta eꞌi kana ratuki komi ante mulimu sampe ri kasae-saena. 25 Ane mesuamo komi ri tana to nijanji i PUE ka komi, kana rapowia komi Eo Bete eꞌi. 26 Ane ana-ana komi mekutana, ‘Nuapa batuana ada eꞌi?’ 27 kana rasono komi iweꞌi: ‘Eꞌimo pesomba Eo Bete Paska mombabila i PUE, sabana Iꞌa nombaliunaka sapo-sapo nto Israel ri Tana Masir tempo Iꞌa nompatesi pura-pura ana langgai ulumbua nto Masir pade nompalamba ana-anata natuwu!’ ” Nangepe tesa etu nekadedemo to Israel nombasomba i PUE. 28 Pade nalaumo ira nompowia nuapa to niparenta i PUE ka i Musa bo Harun.
Kasusa kasampulungelena: Ana-ana ulumbua nto Masir nipatesi
29 Tongo wengi etu i PUE nompatesi pura-pura ana langgai ulumbua nto Masir, nabeloka ana ulumbua magau to nomparenta Tana etu, nabeloka ana ulumbua tau nitarunggu, nabeloka ana-ana ulumbua nu pura-pura binata. 30 Wengina etu nembangumo magau, pangga-pangga betena bo pura-pura to Masir. Pade ri njumaongu Tana Masir naria tau nageo nantete ante namangga, sabana ri pura-pura sapo nto Masir naria tau namate.
31 Wengina etu woꞌu magau nompokio i Musa bo Harun pade nanguli ka ira, “Palaimo komi nggari seꞌi! Palasi komimo ngataku eꞌi! Kalaumo komi ante tau-tau to Israel mombasomba i PUE ewa niperapi komi! 32 Keni komi puramo japi, bimba, towau pade palaimo! Perapi woꞌu rasi ka aku nggari jaꞌi PUE!”
33 Tau-tau to Masir woꞌu nompasese tau to Israel ala ira masalisa malai mompalasi ngata etu. Nanguli ira, “Ane komi daꞌa masalisa malai nggari seꞌi kami pura-pura kana mamate!” 34 Pade tau-tau to Israel nangala puramo kura da naria isina gando daꞌa nidika ragi nibungu ira ante buya nipasinaka ira. 35 Nipowia ira woꞌu to niparenta i Musa ka ira, etumo nomperapi parewa bulawa, salaka, pakea pade parewa ntani-ntanina nggari jaꞌi ntau to Masir to nosinjori ante sapo ira. 36 PUE nompakalulu rara tau to Masir sampe ira nombawai pura-pura parewa bulawa, salaka, pakea pade parewa ntanina to niperapi to Israel etu. Ante iwetu to Israel nanggeni nadea mpuꞌu kakalumana nalai nggari Tana Masir.
Tau to Israel nompalasi Tana Masir
37 Naopu etu nalaimo tau to Israel nompalasi ngata Raamses mpaka ri ngata Sukot. Kadea ira to nolumako nalai etu onoatu njobu mbaꞌa langgai, daꞌa nireke besi bo ngana-ngana. 38 Nadea mpuꞌu japi, bimba bo towau nikeni ira. Pade nadea mpuꞌu tau daꞌa to Israel woꞌu netuki. 39 Ira nantunu roti daꞌa nidika ragi to nikeni ira nggari Tana Masir. Roti etu daꞌa nidika ragi sabana ira nipasuꞌu malai masalisa sampe daꞌa nakapo nompakasadia baku.
40 Tau-tau to Israel netoꞌo ri Tana Masir patatu bo tolumpulu mpae kasaena. 41 Ewa nisuka eo kaganana patatu bo tolumpulu mpaena ira netoꞌo ri Tana Masir, nalaimo ira todea i PUE nggari tana etu. 42 Wengina etu i PUE nombajagai to Israel nesuwu nggari Tana Masir. Jadi wengi etu najadi wengi pepatora ala mombabila i PUE. Butu-butu mpae tau to Israel kana mainga-inga mombatora wengi etu sampe ri kasae-saena.
Atura-atura posusa Paska
43 Nangulimo i PUE ka i Musa bo Harun, “Iweꞌimo atura-atura posusa Paska: ‘Tau ntanina daꞌa to Israel daꞌa mamala manggoni bau bimba to nipesomba ri Eo Paska. 44 Tapi batua to nioli komi mamala manggoni bau etu ane iꞌa nisunamo. 45 Aga tau topesowo atau tau nigaji komi daꞌa mamala manggoni bau etu.
46 Pura-pura bau Paska etu kana rakoni raranjapomu, daꞌa mamala rakeni ri sawalikuna. Neꞌe rakoto komi wukuna nau aga sampeka. 47 Pura-pura to Israel kana mantuki posusa Paska etu.
48 Tau-tau daꞌa nisuna daꞌa mamala manggoni panggoni Paska etu. Ane maria tau daꞌa to Israel metoꞌo ri tatongo komi madota manggoni panggoni Paska ala mombabila Aku, pura-pura langgai riara njapo ira kana rasuna ntani ruru. Maopu etu ira mamala mantuki posusa etu nasimbayu ewa tau to Israel. 49 Atura-atura etu nasimbayu ka tau to Israel pade ka tau daꞌa to Israel to netoꞌo ri tatongo komi.’ ”