Pombaboto kamate ana-ana ulumbua nto Masir
11
Nariamo sanggani i PUE nanguli ka i Musa, “Naria sangayapa kasusa kupakarata ri jaꞌi Magau Masir bo todeana. Maopu etu iꞌa kana mompaloga komi malai. Komi pura-pura kana rapopalaina nggari seꞌi. 2 Jadi ulimo ka tau-tau to Israel, nabeloka langgai nabeloka besi, ira kana merapi parewa bulawa bo salaka nggari jaꞌi ntau to Masir to nosinjori ante sapo ira.” 3 Naopu etu i PUE nompakalulu rara nto Masir manggita to Israel, pade i Musa mboto mpuꞌu-mpuꞌu nibila pangga-pangga bete magau bo todea to Masir.4 Nangulimo i Musa ka magau, “Iweꞌimo panguli i PUE: ‘Matongo wengina ngina Aku kana mompesayo Tana Masir. 5 Pura-pura ngana langgai ulumbua ri Masir kana mamate, mompamula nggari ana ulumbua magau sampe ri ana nu batua besi topombayu gando. Pade ana ulumbua nu pompatuwu woꞌu kana mamate pura. 6 Ri njumaongu Tana Masir kana raepe tau-tau nageo mpakamangga. Daꞌapa naria sanggani najadi iwetu nggaolu pade daꞌa mana woꞌu majadi tempo nggapurina. 7 Tapi ri bagia to nipetoꞌo nto Israel daꞌa ntoto mokuya-kuya, nau asu melolo daꞌa ntoto maria. Ante iwetu munjanimo Akumo i PUE to nompoposisala tau to Masir ante tau to Israel.’ ” 8 Kaopuna nanguli woꞌumo i Musa, “Pura-pura pangga betemu kana marata motimbakotu ri ngayoku merapi ala aku bo pura-pura todeaku malai. Maopu etu aku kana mompalasi tana eꞌi!” Naopu etu nalaimo i Musa nompalasi magau ante narau mpuꞌu rarana.
9 Daꞌapa etu najadi i PUE nanguli ka i Musa, “Daꞌa ntoto raparasaya magau nuapa mutesa ka iꞌa ala Aku mamala manggawia madea tandai to nipogumaa ri Tana Masir.” 10 Musa bo Harun nompowia pura-pura kabaraka etu ri ngayo Magau Masir, tapi i PUE nompakakoꞌo rarana sampe iꞌa daꞌa nompaloga to Israel malai nggari Tana Masir.