Kasusa kawalungelena: Karata nu nggaboro nadea-dea
10
Pade nangulimo i PUE ka i Musa, “Kalaumo iko mantingayo magau woꞌumo. Aku nompakakoꞌo rarana bo rara pangga-pangga betena ala Aku namala nowia kabaraka-kabaraka to nipowiaku ri tatongo ira. 2 Pade etu woꞌu nipowiaku ala komi mamala mombatesa ka anamu bo makumpumu banepia iwenu Aku nompomore-more to Masir pade iwenu Aku nowia kabaraka-kabaraka ri tatongo ira, ala ranjani komi pura Akumo i PUE.”3 Jadi nalau woꞌumo i Musa bo Harun nantingayo magau, pade niuli ira, “Iweꞌimo pantesa i PUE, Alatala nto Ibrani, ‘Sampe nepiapa iko daꞌa mekou ri jaꞌiku? Palambamo todeaku malai ala ira mamala mepue ka Aku. 4 Ane iko daꞌa mompaloga ira malai, naile Aku kana mompakau nggaboro mpaka ri tanamu eꞌi. 5 Ira kana madea mpuꞌu sampe bunggu ntana nipetuꞌu ira mana mamala rakita ntau. Pade labi nu tuja-tuja bo kayu anu daꞌa namate tempo uja es kana maopu rakoni nggaboro etu. 6 Sapomu bo sapo nu pangga-pangga betemu bo sapo nu pura-pura to Masir kana maponu ante nggaboro. Kasusa etu meliu nggajaꞌa nggari pura-pura nuapa to nirasai totuꞌa komi nompamula nggari nggaolu sampe weꞌi-weꞌi.’ ” Naopu nanguli iwetu nalaimo i Musa nompalasi magau.
7 Sangga nalaipa i Musa nekutanamo pangga-pangga bete magau ka iꞌa, “Sakuyapa kasaena tau etu mompakasusa kita? Palambamo tau to Israel malai mepue ka i PUE Alatala ira. Iwenumo! Daꞌapa nanoto ka magau nagero ntotomo ngatata eꞌi?”
8 Naopu etu i Musa bo Harun nipokio magau mantingayo iꞌa woꞌumo. Pade niulina ka ira, “Weꞌi-weꞌi mamalamo komi malau mepue ka i PUE Alatala komi. Tapi isema pura komi malau?”
9 Nesonomo i Musa, “Kami pura-pura, nabeloka ngana muda, nabeloka totuꞌa, nabeloka ana-ana kami. Pade rakeni woꞌu japi, bimba, bo towau kami sabana kami kana mompowia posusa bete mombabila i PUE.”
10 Nangulimo magau, “Neꞌe rasarumaka kupaloga komi manggeni besi bo ana-ana komi! Ninjanikumo naria patuju komi to najaꞌa! 11 Daꞌa mamala! Aga langgai mamala malau mepue ane komi mpuꞌu-mpuꞌu aga madota malau mepue ka i PUE!” Naopu etu i Musa bo Harun nipopalai nggari jaꞌi magau.
12 Pade nangulimo i PUE ka i Musa, “Onggotakamo palemu ri laerawa mombatingayo Tana Masir ala nggaboro marata manggoni pura-pura tuja-tuja to daꞌa namate nawela uja es.”
13 Jadi i Musa nangonggotaka lembauna ri laerawa nombatingayo Tana Masir pade i PUE nompopeburu poiri bete nggari sabingga kamataeona nakantawui ri Tana Masir njineo njambengi. Tempo naeomo nadea mpuꞌu nggaboro nikeni mpoirimo, 14 sampe njumaongu Tana Masir naponu ante nggaboro wetu kadeana. Daꞌapa naria sanggani nggaboro wetu kadeana nikita ntau nggaolu, pade daꞌa mana woꞌu majadi iwetu ri eo nggapurina. 15 Njumaongu bunggu ntana nipetuꞌu nggaboro-nggaboro etu sampe najadi nawuri nikita. Ira nanggoni pura-pura to daꞌapa namate tempo uja es, nabeloka tuja-tuja ri panggawia, nabeloka wua-wua kayu. Daꞌa mana naria tawa naramata naboli ri njumaongu Tana Masir.
16 Nanggita etu magau nasalisa nompokio i Musa bo Harun pade nanguli ka ira, “Aku eꞌi nasilakamo ri jaꞌi PUE Alatala komi pade ri jaꞌi komi woꞌu. 17 Kuperapi ampungi komimo silakaku sangganipa eꞌi pade posambayamo ka i PUE Alatala komi ala Iꞌa manggabasaka aku nggari pesuku to mepakamate eꞌi!”
18 Naopu etu nalaimo i Musa nompalasi magau pade nosambayamo iꞌa ka i PUE. 19 Pade i PUE nombagoliaka poiri bete etu majadi poiri nggari kasolona to narimboso mpuꞌu. Poiri etu nombawaroaka nggaboro etu mpaka riara Tasi Lei, nau sambaꞌa naboli ri Tana Masir daꞌa mana ntoto naria. 20 Tapi i PUE nompakakoꞌo woꞌumo rara magau sampe iꞌa daꞌa mana woꞌumo nompaloga to Israel malai.
Kasusa kasiongelena: Tana Masir nipakarumau njuꞌu
21 Naopu etu nanguli woꞌumo i PUE ka i Musa, “Onggotakamo palemu mpaka ri laerawa ala Tana Masir majadi marumau njuꞌu.” 22 Jadi i Musa nangonggotaka palena mpaka ri laerawa pade Tana Masir najadi narumau njuꞌu tolueo kasaena. 23 Tau-tau to Masir mana namala nanggita nuapa-nuapa pade mana namala nalau ri umba-umba. Aga ri petoꞌo nto Israel batena narawa.
24 Nanggita etu magau nompokio i Musa pade niulina, “Kalaumo komi mepue ka i PUE. Besi-besi bo ngana-ngana mamala malau mpasanggani-nggani, tapi japi, bimba bo towau komi daꞌa namala rakeni!”
25 Tapi nangulimo i Musa, “Komi kana mompaloga kami manggeni binata rapesomba bo ratunu kami ka i PUE Alatala kami. 26 Pura-pura pompatuwu kami kana rakeni, nau sambaꞌa daꞌa mamala raboli, sabana nggari pompatuwu etumo rapelisi kami sanu majadi pesomba ka i PUE Alatala kami. Marata ri setu pade ranjani kami binata umbana rapelisi majadi pesomba ka i PUE.”
27 Tapi i PUE nompakakoꞌo rara magau sampe daꞌa nadota iꞌa mompaloga to Israel malai. 28 Nangulimo magau ka i Musa, “Palaimo iko nggari ngayoku! Neꞌe mana mantingayo aku! Sabana ane iko manggita aku woꞌu, eo etumo iko kana mamate!”
29 Nesonomo i Musa, “Nabelo. Aku mana mantingayo komi.”