Kasusa kalimangelena: Pompatuwu nto Masir namate
9
Naopu etu nanguli woꞌumo i PUE ka i Musa, “Kalaumo iko mantingayo magau pade ulimo ka iꞌa iweꞌi: ‘I PUE, Alatala nto Ibrani nanguli, palogamo todeaku malau ala ira mamala mepue ka Aku! 2 Ane komi daꞌa mompaloga ira malai tapi aga mantaꞌamaka ira, 3 Aku kana mompakawela juꞌa to najaꞌa mpuꞌu ka pompatuwu komi to Masir, etumo jara, keledai, unta, japi, bimba bo towau komi. 4 Aku kana mompoposisala pompatuwu nto Israel bo pompatuwu nto Masir. Daꞌa ntoto maria pompatuwu nto Israel mamate nau aga saongu. 5 Etu kana majadi ri tana eꞌi, pade nipakatantuku majadi naile.’ ”6 Naeo to nailena nipowia i PUE mpuꞌumo ewa to niulina etu. Namate puramo pompatuwu nto Masir. Tapi pompatuwu nto Israel daꞌa ntoto naria to namate nau aga saongu. 7 Magau nompakau tau lau momparesa pompatuwu nto Israel, pade mpuꞌu-mpuꞌu daꞌa ria pompatuwu ira to namate, nau aga saongu. Tapi naupa iwetu magau bate-batena nakoꞌo rarana. Daꞌa nipalogana to Israel malai.
Kasusa kaonongelena: Juꞌa bisu
8 Pade nanguli woꞌumo i PUE ka i Musa bo Harun, “Kau alamo bara sakuya nggaku sowu nggari awu topomempe. Pade Musa kana manggamburaka sowu etu ri laerawa ri ngayo magau. 9 Sowu etu kana membua masombu ri Tana Masir. Manusia bo binata to mawela sowu etu kana mabisu pura sampe manana majadi baka.”
10 Jadi nalaumo i Musa bo Harun nangala sowu nggari awu topomempe nikeni ira nantingayo magau. Musa nombakamburaka sowu etu mpaka ri laerawa pade to Masir bo binata ira nipakawela bisu to nanana pade nepogu najadi baka. 11 Tau-tau napande nowia sibali mata daꞌa mana namala malau ri jaꞌi Musa sabana koro ira woꞌu naponu ante baka bisu nasimbayu ewa todea ntanina riara Tana Masir. 12 Tapi i PUE nompakakoꞌo woꞌumo rara Magau Masir sampe daꞌa nadota iꞌa mangepe pantesa i Musa bo Harun ewa to niuli i PUE ka i Musa.
Kasusa kapitungelena: Uja es
13 Nanguli woꞌumo i PUE ka i Musa, “Pembangumo iko naile mpadondo malau mantingayo magau, pade ulimo ka iꞌa iweꞌi: ‘I PUE, Alatala nto Ibrani nanguli, palogamo todeaku malau mepue ka Aku! 14 Ane iko daꞌa mompaloga ira, tempo eꞌi Aku kana mompakawela kasusa ka iko mboto pade ka pangga-pangga betemu bo todeamu, ala ranjani komi daꞌa ria ntanina to nasimbayu ante Aku riara dunia eꞌi. 15 Ane rapana Aku madota mombasuku iko bo todeamu ante juꞌa to najaꞌa, natantumo komi kana maropu puramo. 16 Tapi Aku nompalamba komi matuwu ala Aku mamala mompopokita kuasaku ka komi ala sangaku matolele ri njumaongu dunia. 17 Iko batena nompandasa todeaku pade daꞌa madota manggabasaka ira. 18 Jadi naile mpadondo kira-kira tempo weꞌi woꞌu, Aku kana mompakadunggu uja es to najaꞌa mpuꞌu anu daꞌapa ria simbayuna najadi ri Tana Masir nompamula nggari tempo nggaolu sampe weꞌi-weꞌi. 19 Sabana etu parentamo tau manggeni pompatuwu bo mpengele-ngele to naria ri karawana ri kauluna. Pura-pura tau bo pompatuwu ri sawalikuna to daꞌa ria pekauluna kana mamate rarunju uja es etu.’ ”
20 Naria bara sakuya mbaꞌa pangga bete magau to naeka nangepe tesa i PUE etu. Jadi nompari-mparimo ira nalau nanggeni batua-batua bo pompatuwu ira mesua riara njapo ala neꞌe mawela uja es etu. 21 Tapi naria ntanina daꞌa nomparasaya tesa i PUE etu. Ira nompalamba waꞌamo batua bo pompatuwu ira ri karawana.
22 Pade nangulimo i PUE ka i Musa, “Onggotakamo palemu mpaka ri laerawa ala uja es etu madunggu ri Tana Masir mombarunju manusia, pompatuwu ira bo mompengaya tuja-tuja ri tinalu.” 23 Tempo i Musa nangonggotaka lembauna mpaka ri laerawana i PUE nompakapogu guntu bete pade nompakadunggu uja es, bo kila damo mparea sampe ri tana. 24 Nadunggumo uja es pade kila damo mparea ri tatongona. Etumo uja es to neliu nggajaꞌa to najadi ri Tana Masir nompamula nggari nggaolu sampe weꞌi-weꞌi. 25 Ri njumaongu Tana Masir pura-pura nuapa to naria ri sawalikuna namate nawela uja es etu, nabeloka manusia, nabeloka pompatuwu. Pade pura-pura tuja-tuja ri panggawia nipakagero bo kayu-kayu nipakakoto rangga-ranggana. 26 Aga ri Bagia Gosyen to nipetoꞌo to Israel daꞌa naria uja es.
27 Naliu etu magau nompokio i Musa bo Harun pade niulina ka ira, “Nasilakamo aku tempo eꞌi. PUE to nakono. Aku ante todeaku nasalamo powia kami. 28 Posambayamo ka i PUE sabana nandasa mpuꞌumo kami nawela guntu bete bo uja es etu. Aku kana mompaloga komi malai. Komi mana paraluu metoꞌo ri seꞌi.”
29 Nangulimo i Musa ka magau, “Ane aku mesuwumo nggariara ngata eꞌi ri sawalikuna, aku kana mangonggotaka paleku mosambaya ka i PUE. Tempo etu guntu kana menonto pade uja es kana mauramo ala ranjani komi dunia eꞌi i PUEmo puena. 30 Tapi ninjaniku komi bo pangga-pangga betemu daꞌapa naeka ri jaꞌi i PUE Alatala.”
31 Ante nawela uja es etu naropu puramo kawoko ramia to nituja bo jelai,b sabana kawoko rami lako nosese pade jelai bulina lako nesuwu. 32 Tapi gando bo pae ntanina daꞌa naropu sabana daꞌapa natuwu.
33 Nalaimo i Musa nompalasi magau nesuwu ri sawaliku ngata. Ri setu iꞌa nangonggotaka palena nosambaya ka i PUE. Tempo etu woꞌu nenontomo guntu bete pade nauramo uja es pade uja mana nadunggu ri tana. 34 Tempo magau nanggita uja es bo uja naura bo guntu bete nenonotomo, sangganipa woꞌu iꞌa nowia silaka. Iꞌa ante pangga-pangga betena nompakakoꞌo rara ira. 35 Ewa niuli i PUE ka i Musa nakoꞌo mpuꞌumo rara magau, pade daꞌa nipalogana to Israel malai.