Kasusa karongelena: Karata nu taraka
8
Naliu etu nangulimo i PUE ka i Musa, “Kalaumo iko mantingayo magau pade uli ka iꞌa tewaiku eꞌi: ‘Palogamo todeaku malau ala ira mamala mepue ri jaꞌiku. 2 Ane iko daꞌa mompaloga ira malau njumaongu tana eꞌi kana kusuku ante taraka. 3 Binangga Nil kana maponu ante taraka sampe mesuwu ri kabatana pade malau mesua riara njapomu, ri tombi paturumu bo ri paturumu, riara njapo pangga-pangga betemu bo todeamu, sampe mesua riara petoꞌo potunu roti bo kura pomporiapumu. 4 Taraka-taraka etu kana mekawantu mombapone koromu pade koro nu pura-pura pangga betemu bo todeamu.’ ”5 Pade nangulimo i PUE ka i Musa, “Pakaumo i Harun mombarayo-rayo lembauna ri baꞌa ue pura-pura, ri salu nu ue, ri keke, bo ri kola-kola ala taraka-taraka mesuwu nggariara ue mompakaponu Tana Masir.”
6 Jadi i Harun nombarayo-rayo lembauna ri baꞌa ue pura-pura riara Tana Masir, pade nesuwumo taraka nadea-dea sampe njumaongu Tana Masir naponu ante taraka. 7 Tapi tau-tau napande nowia sibali mata nompajala pangginjani ira pade ira woꞌu nompowia taraka nesuwu ri Tana Masir.
8 Naopu etu magau nompokio i Musa bo Harun pade nanguli, “Posambayamo ka i PUE ala Iꞌa mompopalai taraka-taraka eꞌi nggari jaꞌiku bo todeaku pade aku mompaloga todeamu malau mombawai pesomba ka i PUE.”
9 Nangulimo i Musa ka magau, “Nadamba mpuꞌu raraku momposambaya ka komi, i Tua. Damo komi mompakatantu tempona pade aku momposambaya ka komi, pangga-pangga betemu bo todeamu ala taraka etu mana ria ri sapo-sapo komi. Damo ri Binangga Nil maria.”
10 Nangulimo magau etu, “Posambayamo ka aku naile.”
Nesonomo i Musa, “Kupowiamo nuapa to niperapi komi, Tua. Ri setu pade ranjani komi daꞌa naria pue ntanina ewa i PUE Alatala kami. 11 Taraka-taraka kana malai nggariara njapo komi pade nggariara njapo nu pangga-pangga betemu bo nggariara njapo pura-pura todeamu. Mana maria taraka ri sapo, damo aga ri Binangga Nil.”
12 Naopu etu nalaimo i Musa bo Harun nggari jaꞌi magau. Pade nekakaimo i Musa ka i PUE ala Iꞌa mompakalipo taraka to nipakatuna ka magau etu. 13 PUE nompoiyo pomperapi i Musa etu, pade taraka-taraka riara njapo ntau, ri wanewe sapo pade riara panggawia namate puramo. 14 Tau-tau to Masir nompasiromu taraka-taraka to namate etu mpantambu-ntambumo sampe nawau mpuꞌu soana ri njumaongu tana etu. 15 Tapi tempo nanggita taraka-taraka etu namate puramo, nakoꞌo balimo rara magau. Ewa to niuli i PUE ka i Musa, magau daꞌa mana nadota mangepe tesa i Musa bo Harun.
Kasusa katolungelena: Karata nu sani
16 Pade nanguli woꞌumo i PUE ka i Musa, “Pakaumo i Harun mombaboba lembauna ri tana pade sowu ri njumaongu Tana Masir mabali majadi sani.” 17 Jadi i Harun nombaboba tana ante lembauna, pade sowu ri njumaongu Tana Masir nabali najadi sani nombatambu manusia bo binata-binata. 18 Tau-tau napande nowia sibali mata nompasimbuku nompowia sani iwetu woꞌu ante pangginjani ira to najaꞌa, tapi daꞌa newali nipowia ira. Ri umba-umba naria sani nombatambu manusia bo binata, 19 sampe tau-tau napande nowia sibali mata lau nanguli ka magau, “Eꞌimo powia Alatala!” Tapi magau etu kana nakoꞌo rarana, pade ewa to niuli i PUE ka i Musa magau etu daꞌa nadota mangepe pantesa i Musa bo Harun.
Kasusa kapatangelena: Karata nu lale
20 Pade nangulimo i PUE ka i Musa, “Pembangumo iko naile mpadondo malau mantingayo magau tempo iꞌa malau ri Binangga Nil, pade ulimo ka iꞌa iweꞌi: ‘PUE nanguli, palogamo todeaku malau mepue ka Aku! 21 Ane komi daꞌa mompaloga ira malau Aku kana mompakarata lale madea mpuꞌu ri jaꞌimu, ri jaꞌi pangga-pangga betemu bo todeamu bo riara njapo komi. Sapo-sapo komi to Masir pade njumaongu tana to nipetoꞌo komi kana maponu ante lale. 22 Aga Bagia Gosyen to nipetoꞌo todeaku daꞌa kupowia iwetu. Ri bagia etu daꞌa ntoto maria lale ala ranjani komi Aku, i PUE naria ri tana eꞌi. 23 Aku kana mompoposisala todeaku ante todeamu. Tandai to nipogumaa etu kana majadi naile.’ ”
24 Pade iwetu mamimo to nipowia i PUE. Naratamo nadea mpuꞌu lale riara njapo magau, riara njapo pangga-pangga betena pade ri njumaongu Tana Masir. Nandasa mpuꞌumo njumaongu Tana Masir sabana lale nadea leke etu.
25 Naliu etu magau nompokio woꞌumo i Musa bo Harun, pade niulina ka ira, “Kalaumo komi mombawai pesomba ka Alatalamu riara Tana Masir eꞌi!”
26 Tapi nangulimo i Musa ka magau, “Daꞌa mabelo kami mowia etu riara tana eꞌi, sabana tau to Masir kana marunggu rara manggita pesomba kami etu. Natantumo kami kana rarempe ira ante watu sampe mamate. 27 Kami kana malau ri karawa baina kira-kira tolumbengi ri jala kasaena. Ri setumo masipato kami mombawai pesomba ka i PUE Alatala kami ewa to niparentana ka kami.”
28 Pade nanguli woꞌumo magau, “Aku mompaloga komi malau mombawai pesomba ka i PUE Alatala komi ri karawa baina, aga neꞌe komi malau makawao gaga. Toramo, posambaya woꞌu ka aku.”
29 Nesonomo i Musa, “Ane aku malaimo aku kana mosambaya ka i PUE ala naile pura-pura lale malai nggari jaꞌimu, nggari jaꞌi pangga-pangga betemu bo todeamu. Aga neꞌe mana komi mombabagiu kami ante mombabonto-bonto polumako to Israel malau mombawai pesomba ka i PUE!”
30 Naopu etu nalaimo i Musa nompalasi magau, pade nosambayamo iꞌa ka i PUE. 31 Pade i PUE nompoiyo pomperapi i Musa. Nembua puramo lale etu nalai nompalasi sapo magau pade sapo-sapo pangga betena bo sapo-sapo todeana. Daꞌa mana ntoto naria sambaꞌa lale naboli. 32 Tapi naopu etu, nakoꞌo balimo rara magau sampe daꞌa nipalogana to Israel etu malai.