7
Pade nangulimo i PUE ka i Musa, “Kitamo! Aku nompajadi iko ewa Alatala ri ngayo Magau Masir, pade tuakamu i Harun kana mompasimbayu tesamu ka iꞌa ewa sambaꞌa nabimu. 2 Iko kana mompapola ka i Harun nuapa pura to niparentaku ka iko. Pakaumo i Harun manguli ka magau iꞌa kana mompaloga tau-tau to Israel malai mompalasi Tana Masir. 3 Tapi Aku kana mompakakoꞌo rara magau, pade nau damo Aku mompowia madea kabaraka bo tandai to nipogumaa ri Tana Masir 4 iꞌa daꞌa madota mompangala tesamu. Sabana etu Aku kana mombasuku Tana Masir ante pesuku to neliu mpuꞌu katomona. Maliu etu pade Aku manggeni pura-pura todeaku to Israel mesuwu nggari tana etu. 5 Tempo Aku mombasuku Tana Masir pade manggeni todeaku mesuwu nggari setu, kana ranjani tau-tau to Masir Aku eꞌimo i PUE.”6 Naopu etu i Musa bo Harun nompowia puramo nuapa to niparenta i PUE ka ira. 7 Tempo ira nalau notesa ka Magau Masir, i Musa noumuru walumpulu mpaemo pade i Harun noumuru walumpulu tolumpae.
Lembau Harun nabali najadi ule
8 Nangulimo i PUE ka i Musa bo Harun, 9 “Ane magau momperapi komi mompowia tandai to nipogumaa, pakaumo i Harun mangala lembauna pade mombatendeaka lembau etu ri tana ri ngayo magau. Lembau etu kana mabali majadi ule.”
10 Jadi nalaumo i Musa bo Harun nantingayo magau, pade nipowia ira puramo ewa to niparenta i PUE ka ira. Harun nombatendeaka lembauna ri bunggu ntana ri ngayo magau bo pangga-pangga betena. Pade lembau etu najadi ule. 11 Sangga nanggita powia etu magau nompokio tau-tau ri Tana Masir to naria pangginjanina bo tau-tau napande nowia sibali mata, pade ira woꞌu nompowia tandai to nipogumaa etu ante pangginjani ira to najaꞌa. 12 Ira nombatendeaka lembau ira sambaꞌa bo sambaꞌa ri bunggu ntana pade lembau ira etu najadi ule woꞌu. Aga lembau i Harun nalau nangome lembau-lembau ira. 13 Tapi naupa iwetu magau bate-batena nakoꞌo njuꞌu rarana. Daꞌa nadota iꞌa nangepe pantesa i Musa bo Harun, ewa niuli i PUE mamimo ka ira.
TANA MASIR NIRATA KASUSA BETE (Pasal 7:14-13:51)
Kasusa pamulana: Ue nabali najadi lei
14 Naliu etu nangulimo i PUE ka i Musa, “Magau etu mpuꞌu-mpuꞌu nakoꞌo rarana. Iꞌa daꞌa ntoto madota mompaloga tau to Israel malai. 15 Jadi naile mpadondo kalaumo iko mpaka ri jaꞌina tempo iꞌa malau ri Binangga Nil ewa kabiasana. Kenimo lembaumu to namala nabali majadi ule, pade popeamo karatana ri wiwi binangga etu. 16 Pade ulimo ka iꞌa iweꞌi: ‘I PUE, Alatala nto Ibrani nompakau aku nanguli ka i Tua, ala komi mompaloga todeana to Israel malau mepue ka Iꞌa ri karawa baina. Tapi sampe weꞌi-weꞌi komi daꞌa nadota nangepe pantesana. 17 Sabana etu, i PUE nanguli nggari powiaku eꞌi kana ranjani komi Iꞌamo i PUE. Lembau eꞌi kuboba ri bunggu Binangga Nil pade ue etu kana mabali majadi lei. 18 Bau-bau ri binangga etu kana mamate, pade uena kana mawau soana sampe mana mamala rainu komi to Masir.’ ” Iwetumo panguli i PUE.
19 Pade nanguli woꞌumo i PUE ka i Musa, “Pakaumo i Harun mangala lembauna pade mombarayo-rayo ri baꞌa pura-pura ue ri Tana Masir, etumo ri binangga, ue keke, ue kola bo ue-ue ntanina. Ue etu kana mabali majadi lei. Ri njumaongu tana kana maria lei, nau ue ri pombolina to nipowia nggari kayu bo ri gumba watu. Pura-pura kana majadi lei.”
20 Musa bo Harun nompowia puramo nuapa to niparenta i PUE ka ira. Ri ngayo magau bo pangga-pangga betena i Harun nangonggotaka lembauna nombaboba Binangga Nil, pade pura-pura ue ri binangga etu najadi lei. 21 Bau-bau ri binangga etu namate puramo pade nawaumo soana sampe mana namala rainu ntau to Masir. Ri njumaongu Tana Masir naria lei.
22 Tapi tau-tau napande nowia sibali mata woꞌu nompowia iwetu ante pangginjani ira to najaꞌa sampe magau batena nakoꞌo rarana. Ewa to niuli i PUE ka i Musa, magau daꞌa ntoto nadota nangepe tesa i Musa bo Harun. 23 Iꞌa aga nanjili ri sapo ante daꞌa ntoto nompariara ntaꞌi nuapa to najadi etu nau aga sakedi. 24 Pura-pura to Masir nombakae buwu ri wiwi Binangga Nil mangelo ue rainu, sabana ue nggari binangga etu daꞌa namala rainu.
25 Naeo nawengi pitumbengimo kaliuna i PUE nombabali ue ri Binangga Nil najadi lei.