6
Pade nangulimo i PUE ka i Musa, “Weꞌi-weꞌi kana mukita nuapa kupowia ka magau etu. Ante kuasaku iꞌa kana kupasuꞌu mombakabasaka todeaku. Ante kuasaku to nabetena iꞌa kana kupasuꞌu mompopalai ira nggari tana eꞌi.” Alatala nojanji mombakabasaka to Israel nggari Tana Masir
2 Pade nangulimo Alatala ka i Musa, “Aku eꞌimo i PUE. 3 Aku nompopanjani koroku ka Abraham, Ishak bo Yakub ante sanga ‘Alatala to Neliu Nggakuasa.’ Tapi Aku daꞌa nompopanjani koroku ka ira ante sanga ‘i PUE.’ 4 Aku woꞌu nompowia pojanji ante ira. Aku nojanji mombawai Tana Kanaan ka ira, tana to nipetoꞌo ira nggaolu ewa topesowo. 5 Niepekumo pekakai tangi nto Israel to nipobatua nto Masir, pade nitorakumo pojanjiku etu.
6 Jadi uli ka todea to Israel iweꞌi: ‘Akumo i PUE! Aku kana mombakabasaka komi nggari pepandasa nto Masir. Aku kana mombakabasaka komi nggari jaꞌi to Masir to nompobatua komi. Aku kana mantolo komi ante mompopokita kabete kuasaku pade mombasuku tau-tau to Masir ante pesuku to natomona. 7 Komi kupajadi todeaku, pade Akumo majadi Alatala komi. Kana ranjani komimo Akumo i PUE Alatala komi to nanggabasaka komi nggari jaꞌi ntau to Masir to nompobatua komi. 8 Komi kana kukeni mpaka ri tana to nijanjiku ante nojanji ka Abraham, Ishak bo Yakub. Tana etu kana kuwai ka komi majadi tana komi mbotomo. Aku eꞌimo i PUE!’ ”
9 Pura-pura tewai i PUE etu nitesa i Musa ka tau to Israel, tapi daꞌa niparasaya ira i Musa, sabana nandasa gagamo niepe ira nipobatua to Masir sampe naopumo rara ira.
10 Naliu etu nangulimo i PUE ka i Musa, 11 “Kalaumo uli ka Magau Masir iweꞌi: ‘Palogamo tau to Israel mompalasi Tana Masir.’ ”
12 Tapi nesonomo i Musa ka i PUE, “Tau-tau to Israel mboto daꞌa madota mangepe pantesaku. Natantumo Magau Masir daꞌa woꞌu madota mangepe tesaku sabana aku daꞌa nataꞌu notesa!”
13 Iwetumo to najadi tempo i PUE nompakau i Musa bo Harun manggeni tewaina ka tau-tau to Israel bo Magau Masir pade nomparenta ira manggeni tau-tau to Israel mesuwu nggari Tana Masir.
Tuntu sunju ntotuꞌa Musa bo Harun
14 Iweꞌimo tuntu sunju ntotuꞌa i Musa bo Harun:
Ruben ana ulumbua Yakub noana patambaꞌa ngana langgai nosanga ka i Henokh, i Palu, i Hezron, bo i Karmi.
Ira etu to najadi totuꞌa nu muli i Ruben.
15 Simeon noana onombaꞌa ngana langgai to nosanga ka Yemuel, Yamin, Ohad, Yakhin, i Zohar bo i Saul to nipoanaka besi to Kanaan.
Ira etu to najadi totuꞌa nu muli i Simeon.
16 Lewi noana tolumbaꞌa ngana langgai nosanga ka i Gerson, i Kehat bo i Merari.
Ira etumo to najadi totuꞌa nu muli i Lewi.
Lewi natuwu sampe satu tolumpulu bo pitumpae.
17 Gerson noana rombaꞌa ngana langgai nosanga ka i Libni bo i Simei.
18 Kehat noana patambaꞌa ngana langgai nosanga ka Amram, Yizhar, i Hebron bo Uziel.
Kehat natuwu sampe satu tolumpulu bo tolumpae.
19 Merari noana rombaꞌa ngana langgai nosanga ka i Mahli bo i Musi.
Etu puramo muli-muli nggari jaꞌi Lewi ante totuꞌa-totuꞌa ira.
20 Amram nomporongo Yokhebed tuaꞌi umana mboto, pade ira njamboko noana ka i Harun bo i Musa. Amram natuwu sampe satu tolumpulu bo pitumpae.
21 Yizhar noana tolumbaꞌa ngana langgai nosanga ka i Korah, i Nefeg bo i Zikhri.
22 Uziel woꞌu noana tolumbaꞌa ngana langgai to nosanga ka i Misael, Elsafan bo i Sitri.
23 Harun nomporongo Eliseba ana Aminadab bo sampesuwu i Nahason. Eliseba noana ka i Nadab, Abihu, Eleazar bo Itamar.
24 Korah noana tolumbaꞌa ngana langgai nosanga ka Asir, Elkana bo Abiasaf.
Ira etumo najadi totuꞌa nggari muli i Korah.
25 Eleazar ana langgai i Harun nomporongo sambaꞌa besi ana i Putiel, pade ira noana ka i Pinehas.
Iwetu puramo totuꞌa-totuꞌa nu muli i Lewi.
26 Harun bo i Musa etumo to niparenta i PUE manggeniaka todea to Israel mesuwu mompalasi Tana Masir nantuki lunu-lunu ira. 27 Ira rombaꞌa etumo to nalau notesa ka Magau Masir nerapi ala iꞌa mompaloga to Israel malai nggari Tana Masir.
Parenta i PUE ka Musa bo Harun
28 Tempo i PUE notesa ka i Musa ri Tana Masir 29 niulina ka iꞌa iweꞌi: “Akumo i PUE. Uli ka Magau Masir puramo nuapa to niuliku ka iko.”
30 Tapi nesonomo i Musa ka i PUE, “Aku eꞌi daꞌa nataꞌu notesa. Natantumo Magau Masir daꞌa madota mangepe pantesaku!”