Musa bo Harun nantingayo Magau Masir
5
Naliu etu nalaumo i Musa bo Harun mantingayo Magau Masir, pade nangulimo ira ka iꞌa, “Iweꞌimo parenta i PUE, Alatala nto Israel, ‘Palogamo todeaku malai ala ira mamala mowia posusa ka Aku ri karawa baina.’ ”2 Nesonomo magau, “Isema i PUE etu sampe aku kana mantuki tesana pade mompaloga to Israel malai? Daꞌa ninjaniku i PUE etu pade tau to Israel daꞌa kupaloga malai.”
3 Nangulimo i Musa bo Harun, “Alatala nto Ibrania nosirata ante kami. Palogamo kami malau ri karawa baina tolu eo kasaena polumako ri jala ala kami mamala mombawai pesomba ka i PUE Alatala kami. Ane kami daꞌa mompowia etu, kami rapatesina ante juꞌa atau posipatesi.”
4 Tapi nangulimo magau ka i Musa bo Harun, “Nokuya komi madota manggeni tau-tau etu mompalasi pokarajaa ira? Panjilimo komi pura-pura mompapola pokarajaa komi! 5 Tau to Israel nantambai mpuꞌumo kadeana. Pade weꞌi-weꞌi komi madota ala ira menonto mokarajaa!”
6 Eo etu woꞌu magau nomparenta tau-tau to Masir to nombajagai to Israel bo mandoro nto Israel to nompasiayu pokarajaa roa ira iweꞌi: 7 “Neꞌe mana mombawai kada mpae ka tau to Israel rapowia ira batu bata. Palambamo ira mboto lau mangala kada mpae etu. 8 Tapi neꞌe rapakakura kadea nu batu bata to rapowia ira eo-eo, kana masimbayu! Nasondomo rara ira! Etu sampe ira nekakai nerapi ala rawai loga malau mombawai pesomba ka Alatala ira! 9 Pasuꞌu ira mokarajaa mpakatomopa ala ira masiwu-siwu ante pokarajaa pade daꞌa maria loga mangepe tesa-tesa dawa!”
10 Jadi nalaumo topojaga-topojaga bo mandoro-mandoro nanguli ka todea to Israel, “Panguli magau, komi mana rawai ka kada mpae. 11 Kana raelo komi mbotomo ri umba-umba. Tapi toramo, batu bata to rapowia komi riara saeo daꞌa mamala makura kadeana, nau aga sakedi!” 12 Jadi nalaumo to Israel nompesayo njumaongu Tana Masir mangelo kada mpae. 13 Eo-eo topojaga nompasuꞌu tau to Israel manggawia batu bata ewa kadeana tempo ira niwai ka kada mpae rapowia ira batu bata etu. 14 Topojaga-topojaga etu nombaboba tau to Israel to nionggotaka majadi mandoro mompakasiayu pokarajaa etu. Nekutanamo ira, “Nokuya todea komi daꞌa mana nowia batu bata nasimbayu kadeana ewa kadeana to nikawia ira bopia?”
15 Naopu etu nalaumo tau-tau to Israel to nionggotaka majadi mandoro mantingayo magau, pade nonguamo ira ka iꞌa, “Nokuya magau nompowia weꞌi ka kami batua-batuamu eꞌi? 16 Kami mana niwai ka kada mpae, tapi kami nipasuꞌu manggawia batu bata! Weꞌi-weꞌi kami niboba naupa kami daꞌa nasala. To nasala aga todea magau mboto!”
17 Nesonomo magau, “Nasondo mpuꞌumo rara komi! Etumo sabana komi batena nerapi ala aku mombawai loga ka komi malau mombawai pesomba ka i PUE! 18 Kalaumo mokarajaa! Komi mana rawai ka kada mpae, tapi batu bata to rapowia komi kana masimbayu kadeana, daꞌa mamala makura!”
19 Nangepe tesa magau etu nanotomo ka mandoro-mandoro to Israel etu nandasamo ira, sabana niepe ira tesa magau to nanguli batu bata to rapowia ira eo-eo kana masimbayu kadeana ewa to nipowia ira bopia. 20 Tempo ira nesuwu nggari sapo Magau Masir, nosintomumo ira ante i Musa bo Harun to nompopea ira ri sawalikuna. 21 Nangulimo mandoro-mandoro etu ka i Musa bo Harun, “Ninjani PUEmo powia komi! Iꞌa kana mombasuku komi! Komi etumo najadi saba sampe najaꞌa mpuꞌu rara magau bo pangga betena nanggita kami sampe ira madota mompatesi kami!”
Musa nongua ka i PUE Alatala
22 Naopu etu nalaumo i Musa nantingayo i PUE pade nanguli, “PUE, nokuya sampe Komi nompandasa todeamu to Israel iweꞌi? Nokuya Komi nompakau aku momai ri seꞌi? 23 Nompamula nggari tempo aku nalau nantingayo magau pade notesa nuapa to nipakaumu ka aku, iꞌa nompandasa todea eꞌi. Pade Komi daꞌa ntoto nowia nuapa-nuapa mantulungi ira!”