Alatala nombawai ka Musa kuasa mompowia tandai to nipogumaa
4
Nesonomo i Musa, “Tapi iwenu, PUE, ane tau-tau to Israel daꞌa momparasaya pade daꞌa madota mompetalinga pantesaku? Nuapa kupowia ane ira manguli, ‘PUE daꞌa nompopokita korona ri jaꞌimu?’ ”2 Nekutanamo i PUE ka i Musa, “Nuapa ri palemu etu?”
Nesono i Musa, “Lembau.”
3 Nangulimo i PUE, “Tendeaka lembaumu etu ri tana!”
Musa nombatendeaka lembauna ri tana, pade lembau etu nabali najadi ule. Pade nangowa nalaimo i Musa nggari ule etu. 4 Tapi nanguli woꞌumo i PUE ka iꞌa, “Pakamosumo ule etu pade sokomo lelona!” Jadi nalaumo i Musa nompakamosu ule etu pade nisokonamo lelona. Iwetu i Musa nanjoko lelona nabalimo ule etu najadi lembau mpanjili ri palena. 5 Pade nangulimo i PUE, “Powiamo iwetu ala tau-tau to Israel momparasaya Aku eꞌimo i PUE, Alatala ntotuꞌa ira Abraham, Ishak bo Yakub, to nompopokita koroku ri jaꞌimu.”
6 Pade nanguli woꞌumo i PUE ka i Musa, “Suaraka palemu riara bajumu.” Jadi i Musa nombasuaraka palena riara bajuna. Tempo iꞌa nangosu palena nggariara bajuna, nikitana palena etu nawela juꞌa bete, nabula ewa salju.
7 Pade nangulimo i PUE, “Suaraka mpanjili palemu etu riara bajumu.” Jadi Musa nowia iwetu, pade tempo iꞌa nangosu palena nabelo balimo palena etu, nasimbayu ewa kulina ntanina.
8 Pade nanguli woꞌumo i PUE, “Ane ira daꞌa madota momparasaya iko atau daꞌa mompariara tandai to nipogumaa pamulana etu, ira kana momparasaya tandai karongganina etu. 9 Tapi ane ira daꞌa madota momparasaya rongele tandai to nipogumaa etu bo daꞌa madota mangepe tesamu, kau alamo sakedi ue nggari Binangga Nil pade tubarakamo ue etu ri tana. Pade ue etu kana mabali majadi lei ri tana ngau etu.”
10 Tapi nanguli i Musa ka i PUE, “O, Pue, aku eꞌi daꞌa nataꞌu notesa nggari bopiamo sampe Komi notesa ka aku weꞌi-weꞌi. Natomo mpuꞌu sumbaku bo jilaku motesa.”
11 Nangulimo i PUE ka iꞌa, “Isema nompowia sumba bo jila manusia? Isema nompakajadi manusia mabobo pade mabongo? Isema nompakajadi manusia mamala manggita bara maburo? Natantumo Aku, i PUE! 12 Kalaumo iko, pade Aku kana mantulungi iko motesa pade mompatuduki ka iko nuapa masipato mutesa.”
13 Tapi nesono woꞌumo i Musa, “O, Pue, kuperapi neꞌe mompakau aku! Pakaumo tau ntanina!”
14 Jadi naraumo rara i PUE nangepe tesa i Musa, pade niulina, “Iwenumo ane tuakamu i Harun muli nto Lewi? Ninjaniku iꞌa nataꞌu notesa. Pade weꞌi-weꞌi iꞌa riara mpolumakona momai ri seꞌi mosirata ante iko. Iꞌa kana madamba manggita iko. 15 Iko kana motesa ka iꞌa pade uli ka iꞌa puramo nuapa to masipato ratesana. Aku kana mantulungi komi rombaꞌa motesa pade mompatuduki ka komi nuapa masipato rapowia komi. 16 Harun kana majadi wakelemu motesa ka todea Israel. Iꞌa kana muposumba pade iko rarekena ewa Alatalana mboto. 17 Kenimo lembaumu etu ala iko mamala mowia tandai-tandai to nipogumaa ante lembau etu.”
Musa nanjili mpaka to Tana Masir
18 Naopu etu nanjilimo i Musa mpaka ri jaꞌi matuꞌana Yitro, pade niulina ka iꞌa iweꞌi: “Palogamo aku manjili mpaka ri Tana Masir malau mantalioda sampesuwu-sampesuwuku, bara danatuwu ira ria.”
Nesonomo Yitro, “Kalaumo, perapi doa iko masalama.”
19 Daꞌapa i Musa nalai nggari Tana Midian, i PUE nanguli ka iꞌa, “Panjilimo iko mpaka ri Tana Masir, sabana namate puramo tau to madota mompatesi iko.” 20 Jadi i Musa nompakeni rongona bo ana-anana, nipopesawina ira ri bengo keledai pade nalaimo ira mpasanggani-nggani mpaka ri Tana Masir. Pade nikenina woꞌu lembau nu Alatala etu ri palena.
21 Nangulimo i PUE ka i Musa, “Niwaikumo kuasa ka iko mompowia tandai-tandai to nipogumaa. Jadi ane manjilimo iko ri Tana Masir powia puramo tandai-tandai to nipogumaa etu ri ngayo Magau Masir. Tapi Aku kana mompakakoꞌo rarana sampe iꞌa daꞌa mompaloga to Israel malai. 22 Iko kana manguli ka magau etu iweꞌi: ‘Aku nitewai i PUE motesa ka komi iweꞌi: Israel anaku, anaku ulumbua. 23 Aku nompakau iko mompaloga anaku etu malai nggari Tana Masir ala mepue ka Aku, tapi iko daꞌa nompaloga ira. Sabana etu Aku kana mompatesi anamu ulumbua.’ ”
24 Ri potenda i Musa ri tatongo jala mpaka ri Tana Masir naratamo i PUE ri jaꞌi Musa madota mompatesi iꞌa. 25 Tapi rongona i Zipora nangala saongu watu nataja nombasuna anana langgai pade kuli nu uti etu nipeꞌena ri kada i Musa. Niuli Zipora, “Iko eꞌi mpuꞌu-mpuꞌu rongo lei ka aku.” 26 Niulina iwetu nantesa ada mposuna. Nanggita etu daꞌa najadi i Musa nipatesi i PUE. a
27 Tempo etu nangulimo i PUE ka i Harun, “Kalaumo iko ri karawa baina momposintomu ka i Musa.” Jadi nalaumo i Harun nosintomu ante i Musa ri Bulu nu Alatala. Narata ri setu niekina tuaꞌina etu. 28 Pade i Musa nombatesa puramo ka i Harun nuapa to nipakau i PUE kana rapasimbayuna, pade nitesana woꞌu tandai-tandai to nipogumaa to nipakau i PUE kana rapowiana.
29 Naopu etu napolamo ira sampe ri Tana Masir. Narata ri setu nipasiromu ira puramo totuꞌa-totuꞌa nto Israel, 30 pade nitesa i Harun ka ira puramo nuapa to nitewai i PUE ka i Musa. Pade i Musa nompowia tandai-tandai to nipogumaa ri ngayo tau dea etu. 31 Nangepe bo nanggita etu pura-pura, nomparasayamo ira. Tempo ira nangepe tesa i Musa nanguli i PUE nompariara to Israel pade nikitana kasusa ira nipobatua bo nipandasa ntau to Masir, notimbakotumo ira nombasomba i PUE.